فيديو: إيجاد محيط دائرة بمعلومية قطرها

باعتبار ٧/٢٢ قيمة 𝜋 التقريبية‎، ما الفرق بين محيط دائرة قطرها ٦٣ سم ومحيط دائرة أخرى قطرها ٤٩ سم؟

٠٢:٢٦

‏نسخة الفيديو النصية

باعتبار اتنين وعشرين على سبعة قيمة 𝜋 التقريبية. ما الفرق بين محيط دائرة قطرها تلاتة وستين سنتيمتر ومحيط دائرة أخرى قطرها تسعة وأربعين سنتيمتر؟

وخلّينا في الأول نفتكر إن محيط الدايرة بيساوي 𝜋 في طول قطر الدايرة. وفي نفس الوقت بيساوي اتنين 𝜋 نق. ونق اللي هو نص القطر؛ لأن اتنين في نص القطر هتبقى هي هي طول القطر. ففي السؤال مطلوب مننا إننا نوجد الفرق بين محيطين الدايرتين. عندنا دايرة قطرها تلاتة وستين سنتيمتر، ودايرة تانية قطرها تسعة وأربعين سنتيمتر. فهنحسب محيط كل دايرة فيهم، وبعد كده هنوجد الفرق بين المحيطين. فهنبدأ بالدايرة اللي طول قطرها تلاتة وستين سنتيمتر. وزي ما قلنا إن محيط الدايرة بيساوي 𝜋 في طول القطر. ومُعطى عندنا قيمة 𝜋 التقريبية باتنين وعشرين على سبعة، وطول قطر الدايرة اللي هو تلاتة وستين سنتيمتر. فلمّا نعوّض هتبقى اتنين وعشرين على سبعة في تلاتة وستين سنتيمتر. فلمّا نحسبها هتبقى بتساوي مية تمنية وتسعين سنتيمتر، وهيبقى ده محيط الدايرة الأولى اللي عندنا.

بعد كده هنوجد محيط الدايرة اللي طول قطرها تسعة وأربعين سنتيمتر. فبنفس الطريقة هيبقى محيط الدايرة بيساوي 𝜋 في طول القطر. وعندنا طول القطر تسعة وأربعين سنتيمتر، و 𝜋 اتنين وعشرين على سبعة. فهنبدأ نعوّض، فهتبقى اتنين وعشرين على سبعة في تسعة وأربعين سنتيمتر. فلمّا نحسبها هتبقى بتساوي مية أربعة وخمسين سنتيمتر. وهو ده محيط الدايرة التانية اللي طول قطرها تسعة وأربعين سنتيمتر.

لكن المطلوب في السؤال إننا نوجد الفرق بين محيط الدايرتين. وعشان نوجد الفرق بين المحيطين، يبقى هنطرح محيط الدايرة اللي قطرها تلاتة وستين سنتيمتر، ناقص محيط الدايرة اللي قطرها تسعة وأربعين سنتيمتر. فهتبقى بتساوي مية تمنية وتسعين ناقص مية أربعة وخمسين. فلمّا نحسبها هتبقى بتساوي أربعة وأربعين سنتيمتر. وبالتالي هيبقى الفرق بين محيطين الدايرتين هو أربعة وأربعين سنتيمتر.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.