فيديو: ضرب عدد من ثلاثة أرقام في عدد من رقمين

يوضح الفيديو خطوات ضرب عدد من ثلاثة أرقام فى عدد من رقمين مع أمثلة توضيحية.

١٠:٠٤

‏نسخة الفيديو النصية

ضرب عدد من ثلاثة أرقام في عدد من رقمين.

هنتعلّم إزّاي نقدر نضرب أي عدد بيتكون من تلات أرقام في عدد آخر بيتكوّن من رقمين. هنشوف ده من خلال المثال.

لو عرفنا إن ندى بتستهلك ميتين خمسة وسبعين دقيقة شهريًّا على هاتفها المحمول. عايزين نعرف كم دقيقة تستهلكها في سنة.

إحنا عارفين إن السنة فيها اتناشر شهر. يبقى عشان نقدر نجيب استهلاك ندى في السنة، إحنا محتاجين نحسب حاصل ضرب ميتين خمسة وسبعين، اللي هو استهلاكها من الدقائق في الشهر؛ في اتناشر.

هنبدأ بتقدير حاصل الضرب. هنقرّب الميتين خمسة وسبعين لأقرب قيمة مكانية. أكبر قيمة مكانية في أول عدد عندنا هنا هي المئات. فهنقربه لأقرب مية. فهيبقى تلتمية. والاتناشر أكبر قيمة مكانية فيها هي العشرات، فهنقربها لأقرب عشرة. يعني دلوقتي محتاجين نجيب حاصل ضرب تلتمية في عشرة، اللي هو هيطلع تلات آلاف. يعني تقديرنا لاستهلاكها في السنة من الدقايق هو تلات آلاف.

دلوقتي بقى هنحسب حاصل الضرب الدقيق. هنبدأ أول خطوة هنضرب الاتنين اللي في الآحاد دي في الميتين خمسة وسبعين. هتطلع النتيجة عندنا … اتنين في خمسة، هنبدأ من أصغر قيمة مكانية لأكبر قيمة مكانية. اتنين في خمسة بعشرة. صفر ونحط الواحد فوق خانة العشرات. اتنين في سبعة بأربعتاشر، زائد الواحد اللي عندنا ده يبقى خمستاشر. خمسة، ونكتب الواحد فوق خانة المئات. وبعدين نكمل عملية الضرب اتنين في اتنين تبقى بأربعة. زائد الواحد اللي فوق ده، هتبقى خمسة. دي كانت أول خطوة. يعني حاصل ضرب الاتنين في الميتين خمسة وسبعين، اللي هي الخمسمية وخمسين.

الخطوة اللي بعد كده هنضرب الواحد اللي في العشرات ده، اللي هو بيكافئ عشرة؛ في الميتين خمسة وسبعين. هنحط الصفر اللي هو نتيجة الضرب في عشرة. وبعدين نضرب الواحد في ميتين خمسة وسبعين. هيدينا ميتين خمسة وسبعين. يعني حاصل ضرب الواحد اللي هو … عفوًا … العشرة لأن الواحد دي في خانة العشرات، لمّا نضربه في ميتين خمسة وسبعين، هيدينا ألفين سبعمية وخمسين. كده الخطوة دي هي حاصل ضرب العشرة في الميتين خمسة وسبعين.

الخطوة اللي بعد كده هنجمع حواصل الضرب الجزئية دي. ونطلع حاصل الضرب النهائي. صفر زائد صفر هيساوي خمسـ … عفوًا صفر. وخمسة زائد خمسة تساوي عشرة. صفر، وبعدين نحط الواحد فوق خانة المئات. واحد زائد خمسة ستة زائد سبعة تلتاشر. تلاتة، ونحط الواحد فوق خانة الآلاف. واحد زائد اتنين يساوي تلاتة. يبقى تلات آلاف وتلتمية هو ده حاصل الضرب الدقيق اللي حصلنا عليه، واللي بيمثّل استهلاك ندى من الدقايق في السنة. واللي ممكن نوضحها على الشكل اللي قدامنا ده.

إحنا بنجيب حاصل ضرب ميتين خمسة وسبعين، اللي هي عبارة عن ميتين، زائد سبعين، زائد خمسة. في اتناشر، اللي هي عبارة عن عشرة، زائد اتنين. هنبدأ نعمل عمليات الضرب ونجمّع النتائج في الآخر.

بنضرب الآحاد في آحاد العدد اللي فوق. يعني اتنين في خمسة، هتبقى النتيجة عشرة. هنحطها هنا، وبعدين نضرب الاتنين في عشرات العدد اللي فوق. يعني في سبعين. هتبقى النتيجة مية وأربعين، هنحطها هنا. بعدين نضرب الاتنين في مئات العدد اللي فوق، يعني في ميتين. فهتبقى النتيجة ربعمية. وهنحطها هنا.

وبعدين بنضرب عشرات العدد اللي تحت في آحاد العدد اللي فوق. يعني عشرة في خمسة، هتدينا خمسين. هنحطها هنا. وبعدين نضربه في عشرات العدد اللي فوق. عشرة في سبعين، هتدينا سبعمية. وبعدين نضربه في مئات العدد اللي فوق في عشرة في ميتين. هتدّينا ألفين.

بتجميع حواصل الضرب الجزئية اللي حصلنا عليها دي، هنوصل للنتيجة اللي هي تلات آلاف وتلتمية، اللي هي استهلاك ندى من الدقائق في السنة.

عشان نتأكد من منطقية الحل اللي إحنا وصلنا له، هنقارنه بحاصل الضرب التقديري اللي جبناه في الأول، اللي هو كان تلات آلاف. هنلاقي إن التلات آلاف قريبة من التلات آلاف وتلتمية. وكده يبقى اتأكدنا من معقولية الحل اللي حصلنا عليه.

في صفحة جديدة هنشوف مثال تاني: اشترت مدرَسة خمسة وعشرين جهاز حاسب آلي. تمن كل منهم سبعمية تسعة وأربعين جنيهًا. فما الثمن الكلي للأجهزة؟

يعني محتاجين نحسب الثمن الكلي. يعني عايزين نجيب حاصل ضرب سبعمية تسعة وأربعين، اللي هو سعر الجهاز الواحد، في عدد الأجهزة اللي هو خمسة وعشرين.

أول حاجة هنستخدم التقدير؛ عايزين نجيب حاصل الضرب التقديري باستخدام التقريب. هنشوف أول عدد أكبر قيمة مكانية فيه هي المئات يبقي هنقربه لأقرب مائة. يعني عايزين نجيب حاصل ضرب سبعمية في … العدد التاني أكبر قيمة مكانية فيه هي العشرات فهنقربه لأقرب عشرة، فهيبقى بعد التقريب تلاتين. يعني عايزين نجيب حاصل ضرب سبعمية في تلاتين، اللي هي هتبقى واحد وعشرين ألف. يعني التمن الكلي تقريبًا للأجهزة هيبقى في حدود واحد وعشرين ألف جنيهًا.

دلوقتي عايزين نجري عملية الضرب؛ عشان نحصل على حاصل الضرب الدقيق. هنبدأ من آحاد العدد اللي تحت. هنضربها في العدد اللي فوق رقم رقم، من أصغر قيمة مكانية إلى أكبر قيمة مكانية.

هنبتدي نضرب خمسة في تسعة. خمسة في تسعة بخمسة وأربعين. خمسة في الآحاد، والأربعة اللي في العشرات هنحطها فوق خانة العشرات. وبعدين نكمّل عملية الضرب. خمسة في أربعة. خمسة في أربعة بعشرين. زائد الأربعة اللي كانت عندنا فوق، يبقى أربعة وعشرين. هنكتب الأربعة في خانة العشرات، والاتنين نحطها فوق خانة المئات. ونكمّل عملية الضرب. خمسة في سبعة بخمسة وتلاتين، زائد الاتنين اللي كانت موجودة فوق خانة المئات؛ يبقى سبعة وتلاتين.

الخطوة اللي بعد كده. وبعدين هنبتدي نضرب عشرات العدد اللي تحت في العدد اللي فوق بالترتيب، من أصغر قيمة مكانية لأكبر قيمة مكانية.

دلوقتي إحنا بنضرب اتنين دي في خانة العشرات. هنحط صفر هنا في الآحاد. وبعدين نبتدي نضرب؛ اتنين في تسعة بتمنتاشر. تمنية، ونحط الواحد فوق خانة العشرات. اتنين في أربعة بتمنية، زائد الواحد اللي فوق خانة العشرات ده هيديني تسعة. وبعدين نضرب اتنين في سبعة، هتبقى بأربعتاشر. نحط الأربعتاشر.

وبعدين الخطوة اللي بعد كده هنجمّع حواصل الضرب الجزئية. خمسة زائد صفر هيدّينا خمسة. وبعدين العشرات أربعة زائد تمنية هيدينا اتناشر. اتنين، ونحط الواحد فوق خانة المئات. وبعدين نجمّع. واحد زائد سبعة تمنية، زائد تسعة سبعتاشر. سبعة، ونحط الواحد اللي باقي معانا فوق خانة الآلاف. واحد زائد تلاتة أربعة، زائد أربعة هيدينا تمنية. وبعدين الواحد ده هينزل زي ما هو. يعني نقدر نقول إن السعر الكلي للأجهزة هو تمنتاشر ألف سبعمية خمسة وعشرين جنيه.

نتأكد من معقولية الإجابة اللي حصلنا عليها، بمقارنتها بحاصل الضرب التقديري اللي جبناه في الخطوة اللي فوق. هنلاقي إن الناتجين قريّبين من بعض، وبكده اتأكدنا من معقولية الإجابة اللي حصلنا عليها.

عرفنا في الدرس ده إزّاي نقدر نضرب عدد مكوّن من ثلاثة أرقام في عدد آخر مكوّن من رقمين.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.