نسخة الفيديو النصية
هنعرف في الفيديو ده إزاي نقدر نكتب الأعداد حتى عشرات الألوف على الصور التلاتة؛ الصورة القياسية، أو التحليلية، أو الصورة اللفظية.
دلوقتي هنشوف إيه التلات صور اللي بنقدر نكتب عليهم أي عدد.
عندنا أول صورة الصورة القياسية؛ ودي بتظهر فيها الأرقام فقط. زي العدد اللي قدامنا ده أربعتاشر ألف خمسمية تسعة وعشرين.
أما الصورة التحليلية فبيظهر فيها مجموع القيم المكانية للأرقام اللي بيتكوّن منها العدد.
يعني بنبدأ نقول إنه بيتكون من تسعة في الآحاد، فيبقى أول حاجة في الصورة التحليلية هتبقى تسعة.
زائد الرقم اللي بعد كده اتنين في العشرات، يعني القيمة بتاعتها عشرين.
وبعدين هنضيف القيمة المكانية للرقم اللي بعد كده، اللي هو خمسة في خانة المئات، يعني قيمته هتبقى خمسمية.
هنضيف بعد كده القيمة المكانية للرقم اللي في خانة الألوف، عندنا أربعة في خانة الألوف، يعني قيمتها أربعة آلاف.
وبعدين نضيف القيمة المكانية لآخر رقم عندنا، اللي هو واحد في خانة عشرات الألوف، يعني قيمته هتبقى عشرة آلاف.
يبقى كده كملنا الصورة التحليلية للعدد اللي عندنا. واللي زي ما قلنا هي عبارة عن مجموع القيم المكانية للأرقام اللي بيتكون منها العدد.
آخر صورة عندنا هي الصورة اللفظية. بنستخدم فيها الكلمات؛ يعني إحنا بنقرا العدد بنقول أربعتاشر ألف خمسمية تسعة وعشرين. هنكتبها زي ما بنقراها بس بالكلمات باللغة العربية الصحيحة. فهنكتبها بالشكل ده: أربعة عشر ألفًا وخمسمائة وتسعة وعشرون.
في المثال اللي عندنا ده بنعرف إن كوكب أورانوس من أصغر الكواكب في مجموعتنا الشمسية، وبيبلغ طول قطره حوالي خمسين ألف سبعمية تلاتة وعشرين كيلومتر. مطلوب مننا نكتب طول القطر ده بطريقتين؛ بالصورة التحليلية والصورة اللفظية.
هنبدأ بالصورة التحليلية. زي ما قلنا الصورة التحليلية هي عبارة عن مجموع القيم المكانية للأرقام اللي بيتكوّن منها العدد.
فهنبدأ بأول رقم عندنا اللي هو تلاتة في الآحاد، يعني قيمته المكانية هتبقى تلاتة.
وبعدين نضيف عليها القيمة المكانية للرقم التاني، اللي هو اتنين في خانة العشرات، فهتبقى قيمته المكانية عبارة عن عشرين.
وبعدين نجمع عليهم تاني القيمة المكانية للرقم اللي بعد كده، اللي هو سبعة في خانة المئات، فهتبقى قيمته المكانية سبعمية.
هنضيف بعد كده القيمة المكانية للرقم اللي عليه الدور. الصفر هو الرقم اللي عليه الدور، قيمته المكانية الألوف. صفر في الألوف ما زال صفر. يعني قيمته المكانية برضو صفر. فإحنا مش بنكتب الصفر؛ لأنه لا يعني أي قيمة. فمش بنكتبه في الصورة التحليلية.
كده آخر رقم عندنا هو الخمسة، وموجود في خانة عشرات الألوف. فهنضيف قيمته المكانية اللي هي هتبقى بتساوي خمسين ألف.
كده كتبنا العدد اللي عندنا بالصورة التحليلية. دلوقتي هنكتب العدد بالصورة اللفظية العدد ده خمسين ألف سبعمية تلاتة وعشرين. هنكتبه بالكلمات زي ما بنقراه كده، بس باللغة العربية الفصحى. فهيبقى: خمسون ألفًا وسبعمائة وثلاثة وعشرون.
في المثال اللي عندنا ده مطلوب مننا نكتب العددين اللي قدامنا بالصورة القياسية.
أول مثال هنلاقي إن العدد مكتوب بالصورة اللفظية. هنشوف إزاي هنحوّله ونكتبه بالصورة القياسية. الصورة القياسية زي ما إحنا عارفين هي الصورة اللي بيظهر فيها الأرقام فقط.
هنلاقي إن اثنا عشر ألفًا وأربعة. أربعة دي معناها إن عندنا أربعة في الآحاد. طب فيه كمان اثنا عشر ألفًا. طب فين العشرات وفين المئات؟ ما دام مش مذكور لا عشرات ولا مئات، يبقى ده معناها إن فيهم صفر. يبقى هنحط صفر في العشرات وصفر في المئات. وعندنا اثنا عشر ألفًا، يعني اتناشر. يبقى اتنين في خانة الألوف، وواحد في خانة عشرات الألوف. يبقى كده كتبنا أول عدد بالصورة القياسية.
هنشوف العدد اللي بعد كده. هنلاقي إن العدد ده مكتوب كمجموع القيم المكانية للأرقام. يبقى الصورة اللي مكتوب عليها دي هي الصورة التحليلية. إحنا عايزين نكتبه على الصورة القياسية؛ يعني الأرقام فقط.
ولو بصينا للصورة التحليلية هنلاقي إن أول قيمة مكانية هي تلاتة. ده معناها إن العدد ده فيه الرقم تلاتة في الآحاد.
هنلاقي القيمة المكانية اللي بعد كده هي تلتمية. تلتمية دي معناها إن عندنا تلاتة في خانة المئات. طب فين خانة العشرات؟ مش مذكور قيمة مكانية فيها عشرات. معناها إن فيه صفر في العشرات. وبعدين التلتمية دول، يعني زي ما قلنا تلاتة في المئات.
القيمة المكانية اللي بعد كده هي ألف. معناها إن الرقم اللي عليه الدور هو واحد في خانة الألوف.
وآخر قيمة مكانية في الصيغة اللي عندنا هي خمسين ألف. معناها إن عندنا الرقم خمسة في خانة عشرات الألوف.
يبقى كده قدرنا نكتب العدد اللي مطلوب مننا بالصورة القياسية.
كده عرفنا في الفيديو ده إزاي نقدر نكتب الأعداد ضمن عشرات الألوف بتلات صور مختلفة. وهي الصورة القياسية، الصورة التحليلية، والصورة اللفظية.
الصورة القياسية اللي بتظهر فيها الأرقام فقط.
والصورة التحليلية اللي بتبقى عبارة عن مجموع القيم المكانية للأرقام اللي بيتكوّن من العدد.
أما الصورة اللفظية فبتستخدم الكلمات، بنكتب العدد زي ما بنقراه بالكلمات بس باللغة العربية الفصحى.
