فيديو: إيجاد قاعدة الدالة‎‎

يوضح الفيديو الدالة وقاعدتها، وما المدخلات والمخرجات، وكيفية تحديد قاعدة الدالة، والمجال والمدى.

٠٣:١٥

‏نسخة الفيديو النصية

إيجاد قاعدة الدالة.

في الفيديو ده هنتكلم عن الدوال، وإزاي بنحدد قاعدة الدالة. الدالة هي العلاقة اللي بتحقق قيمة مخرجة واحدة محددة لكل قيمة مدخلة؛ يعني إذا بدأنا بعدد وطبّقنا عليه داخل الدالة عملية أو أكثر، بينتج عدد معين. والعمليات اللي بتُتطبَّق داخل الدالة بنسميها قاعدة الدالة. وممكن نعبر عن الدالة بشكل جدول بيحتوي على المدخلات والمخرجات وقاعدة الدالة، وبنسمي مجموعة قيم المدخلات المجال، وبنسمي مجموعة قيم المخرجات المدى.

نحل مثال، يدّخر علاء عشرين جنيهًا شهريًّا، اكتب جدولًا للدالة التي توضح مدخراته بعد شهر وشهرين وثلاثة أشهر وأربعة أشهر، ثم حدد المجال والمدى.

نرسم جدول معبر عن الدالة بالشكل ده. وبما إن علاء بيدّخر كل شهر عشرين جنيه، يبقى هنضرب عدد الشهور في عشرين لنعرف مدخراته في كل فترة. فبعد شهر واحد هتبقى مدّخراته بتساوي واحد في عشرين يعني هتساوي عشرين جنيه، نكتبها في الجدول. وبعد شهرين هتساوي اتنين في عشرين يعني هتساوي أربعين جنيه، وبعد تلات شهور هتساوي تلاتة في عشرين يعني هتساوي ستون جنيهًا، وبعد أربع شهور هتساوي أربعة في عشرين يعني هتساوي تمانين جنيه.

يبقى المجال اللي هو مجموعة المدخلات هيساوي المدخلات هي شهر وشهرين وتلات شهور وأربع شهور. والمدى هو مجموعة المخرجات هيساوي المدخرات بعد كل فترة، فهيساوي عشرين وأربعين وستين وتمانين.

ممكن برضو نعبر عن الدالة دي في صورة معادلة من متغيرين؛ واحد منهم معبر عن المدخلات، والتاني معبر عن المخرجات. فهنعبر عن الدالة دي بالمعادلة ص بتساوي عشرين س؛ حيث س هي المدخلات أو عدد الشهور، و ص هي المخرجات اللي هي المدخرات.

يبقى في الفيديو ده عرفنا إيه هي الدالة، وإيه قاعدتها، ويعني إيه مدخلات ومخرجات، وكيفية تحديد قاعدة الدالة، وعرفنا إيه هو المجال، وإيه هو المدى.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.