فيديو: تقدير وقياس وحدات الكتلة في النظام المتري

الفيديو يتناول الوحدات الشائعة المستخدمة لقياس الكتلة في النظام المتري، وكيفية تحديد الوحدة المناسبة لقياس الكتلة، وتقدير الكتلة، مع حل أمثلة توضيحية.

٠٧:٥٨

‏نسخة الفيديو النصية

تقدير وقياس وحدات الكتلة في النظام المتري.

في الفيديو ده هنراجع تعريف الكتلة. وإيه الوحدات الشائعة المستخدمة لقياس الكتلة في النظام المتري، زي الجرام والكيلوجرام. وإزاي نقدر نحدّد أي وحدة هنستخدمها للتعبير عن كتلة شيء ما. بعد كده هنحل أمثلة توضيحية.

بنراجع تعريف الكتلة. كتلة الشيء هي مقدار ما فيه من مادة. يعني لو عندنا كمية من البرتقال، عاوزين نعرف كمية البرتقال اللي قدامنا ده قد إيه؛ نص كيلو، كيلو، كيلو ونص، تلاتة كيلو. وبالتالي بنقول كتلة الشيء مقدار ما فيه من مادة.

ودلوقتي هنشوف جدول يبين لنا وحدات الكتلة المترية شائعة الاستخدام.

من خلال الجدول التالي بنشوف وحدات قياس الكتلة في النظام المتري. بنلاقي عندنا الوحدة، ومثال على هذه الوحدة. بنلاقي أول حاجة عندنا واحد ملليجرام بنرمز ليه بالرمز ملجم، زي ما إحنا شايفين كده. لو جينا نشوف مثال لحاجة كتلتها واحد ملليجرام، فهي إحدى حبيبات الملح الناعم.

الوحدة التالية هي الواحد جرام. الرمز بتاعها جم، زي ما إحنا شايفين. لو شفنا مثال لحاجة كتلتها واحد جرام، وهي مشبك ورق. المشبك أو الدبوس اللي بنشبك بيه الورق مع بعض، تقريبًا كتلته واحد جرام.

الوحدة اللي بعد كده وهي طبعًا الوحدة الأكبر. يعني عندنا الواحد ملليجرام. بعد كده الجرام أكبر منه. بعد كده الواحد كيلوجرام أكبر منهم، وهي الكتلة أكبر. بنرمز للواحد كيلوجرام بـ كجم؛ كيلوجرام. لو جينا نقدر حاجة كتلتها واحد كيلوجرام، فمثلًا بنلاقي ست حبات متوسطة من التفاح، تقريبًا كتلتهم واحد كيلوجرام. حاجة كمان لازم نعرفها إن الكيلوجرام الواحد يساوي ألف جرام.

بعد ما عرفنا وحدات قياس الكتلة الشهيرة في النظام المتري. هنبدأ نحل أمثلة لاختيار الوحدة المناسبة لقياس كتلة ما. نكمل في صفحة جديدة.

بنكمل ونقرا المثال التالي: ما الوحدة المستخدمة لقياس كتلة كل مما يأتي؟ ثم قدّر الكتلة.

بنلاقي عندنا أولًا ورقة من دفتر ملاحظات. زي ما إحنا شايفين كده، مطلوب تحديد الوحدة المستخدمة لقياس كتلة ورقة من دفتر ملاحظات.

بنلاقي إن أكيد كتلة ورقة من دفتر ملاحظات أكبر من كتلة مشبك ورق. وبنلاقي برضو إنها بتقل عن كتلة ست تفاحات. يبقى ما ينفعش نستخدم الكيلوجرام كوحدة لقياس كتلة ورقة من دفتر ملاحظات. وبالتالي بنستخدم الوحدة اللي أقل منها وهي عبارة عن الجرام.

يبقى بنكتب كده: الوحدة المستخدمة الجرام. يبقى من خلال مقارنة الكتلة اللي عندنا، وهي كتلة ورقة من دفتر ملاحظات، بنقارنها بالجدول اللي إحنا شُفناه في الأول؛ لتحديد الوحدة المناسبة لقياس هذه الكتلة.

بعد كده مطلوب مننا تقدير الكتلة. معنى تقدير الكتلة يعني بنقدّر ونقول هي الكتلة دي تقريبًا قد إيه؟ مقدارها كام؟ إحنا عرفنا إن الوحدة المستخدمة لقياس هذه الكتلة هي الجرام. وعرفنا كمان إن كتلة مشبك ورق تقريبًا واحد جرام.

يبقى التقدير عندنا، بنكتب كده: كتلة الورقة بتزيد عن كتلة مشبك الورق، وكتلة مشبك الورق عرفنا إنها تعادل تقريبًا واحد جرام. يبقى ورقة من دفتر ملاحظات تُقدّر كتلتها بستة جرام تقريبًا. طبعًا ممكن تكون ستة جرام، أو سبعة جرام أو عشرة جرام. إحنا بنقول بالتقريب تقريبًا ستة جرام، وطبعًا ده على حسب جوده الورق.

بنشوف تاني حاجة. صندوق من البطاطس. يبقى مطلوب تحديد الوحدة المستخدمة لقياس كتلة صندوق من البطاطس.

بنلاقي إن كتلة صندوق من البطاطس أكيد أكبر من كتلة ست حبات من التفاح التي تعادل واحد كيلوجرام. يبقى صندوق من البطاطس هنلاقي إن كتلته أكبر من واحد كيلوجرام. يبقى الوحدة المستخدمة هي الكيلوجرام. يبقى الوحدة المستخدمة عندنا هي الكيلوجرام.

بعد كده مطلوب تقدير الكتلة. لو جينا نقدّر كتلة صندوق من البطاطس. زي ما شايفين، الصندوق ده مطلوب تقدير كتلته. فبنكتب كده: التقدير تقدر كتلة صندوق يحتوي تلاتين حبة بطاطس …

بنفترض إن الصندوق ده تقريبًا فيه تلاتين حبة بطاطس. وقبل كده عرفنا إن الواحد كيلوجرام تقريبًا عبارة عن ست حبات متوسطة من التفاح. فبنقدّر التلاتين حبة بطاطس بتقريبًا ستة كيلوجرام. ممكن تكون سبعة كيلوجرام، أو أقل. بس بنقول تقريبًا ستة كيلوجرام، سبعة كيلوجرام، وهكذا.

يبقى إحنا من خلال الجدول اللي شُفناه، ممكن نقدر كتلة شيء ما بالتقريب مش بالظبط يعني.

بعد كده هنحل مثال آخر. فتحنا صفحة جديدة. بنكمل ونقرا المثال التالي: الجدول التالي يبيّن متوسط كتل بعض أعضاء جسم الإنسان. فهل كتلة الرئتين معًا تزيد أم تقل عن كيلوجرام واحد؟

بنلاقي الجدول التالي عندنا على اليمين أعضاء الإنسان، وعلى الشمال بنلاقي متوسط الكتلة بالجرام.

على سبيل المثال مثلًا لو اخترنا قلب الرجل. بنلاقي إن متوسط كتلة قلب الرجل عبارة عن تلتمية وخمستاشر جرام.

مطلوب نعرف هل كتلة الرئتين معًا تقل أم تزيد عن كتلة كيلوجرام واحد. فلازم الأول نوجد مجموع كتلة الرئتين معًا؛ عشان نشوف إذا كانت أكبر أو أقل من كيلو جرام واحد.

من الجدول بنلاقي إن كتلة الرئة اليمنى خمسمية وتمانين جرام. وكتلة الرئة اليسرى خمسمية وعشرة جرام. وبالتالي مجموع الكتلتين عبارة عن ألف وتسعين جرام. وإحنا عارفين إن الكيلوجرام الواحد يساوي ألف جرام. وبكده مجموع كتلتي الرئتين يساوي ألف وتسعين جرام. يبقى أكبر من ألف جرام. وبالتالي أكبر من واحد كيلوجرام. إذن كتلة الرئتين معًا أكبر من كيلوجرام واحد.

يبقى في الفيديو ده راجعنا يعني إيه كتلة. وعرفنا الوحدات شائعة الاستخدام لقياس الكتلة في النظام المتري، زي الجرام، والكيلوجرام. وعرفنا إزاي نحدّد أي وحدة هنستخدمها للتعبير عن كتلة ما. وده عن طريق مقارنة الشيء اللي إحنا عاوزين نعرف كتلته بكام، بالجدول اللي شُفناه في الأول. وقدرنا نفهم معنى تقدير الكتلة. وطبعًا تقدير الكتلة بيكون بالتقريب. بعد كده حلينا أمثلة توضيحية.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.