فيديو: امتحان الفزياء الدور الثاني للعام السابق • ٢٠١٨/٢٠١٧ • السؤال الثامن

امتحان الفزياء الدور الثاني للعام السابق • ٢٠١٨/٢٠١٧ • السؤال الثامن

٠٢:١٢

‏نسخة الفيديو النصية

أوجد 𝛼𝑒 لترانزستور له 𝛽 𝑒 تساوي خمسين، ثم احسب تيار المجمع إذا كان تيار القاعدة خمسة في عشرة أُس سالب خمسة أمبير.

ففيه ترانزستور 𝛽 𝑒 فيه بتساوي خمسين، وَ 𝛽 𝑒 في الترانزستور بترمز لنسبة التكبير. ومطلوب نوجد قيمة 𝛼 𝑒 اللي بترمز في الترانزستور لنسبة التوزيع. وفي حالة إن تيار القاعدة كان خمسة في عشرة أُس سالب خمسة أمبير، مطلوب نحسب تيار المجمع.

فنسبة التكبير 𝛽𝑒 بتعبّر عن التكبير اللي عملة الترانزستور لتيار القاعدة. فعشان كده هي بتساوي النسبة بين تيار المجمّع وتيار القاعدة. أما نسبة التوزيع 𝛼𝑒، فبتعبّر عن قد إيه اتوزّع من تيار الباعث لتيار المجمع. وعلشان كده بتساوي النسبة بين تيار المجمِّع على تيار الباعث.

والعلاقة بين النسبتين إن نسبة التكبير بتساوي نسبة التوزيع مقسومة على واحد ناقص نسبة التوزيع. ولما نعوّض بقيمة نسبة التكبير هنلاقي إن خمسين بتساوي 𝛼𝑒 على واحد ناقص 𝛼𝑒. ولو ضربنا طرفين المعادلة في واحد ناقص 𝛼𝑒. المعادلة هتبقى خمسين في واحد ناقص 𝛼𝑒 بتساوي 𝛼𝑒. ولما نضرب الخمسين بداخل القوسين، هنلاقي إن الطرف الشمال بقى خمسين ناقص خمسين في 𝛼𝑒. ولما نزوّد خمسين 𝛼𝑒 على طرفين المعادلة، هنلاقي إن واحد وخمسين 𝛼𝑒 بتساوي خمسين. فهنقسم طرفين المعادلة على واحد وخمسين، ونطلع إن 𝛼𝑒 بتساوي 0.98 من المية. وبكده نبقى طلّعنا أول مطلوب.

وناخد بالنا إن قيمة نسبة التوزيع بتبقى أقل من الواحد، ولكن بتساوي قيمة قريبة جدًّا من الواحد؛ وده لأن جزء كبير جدًّا من التيار اللي في الباعث بيتوزّع على التيار اللي في المجمِّع. وعلشان نجيب تيار المجمِّع بمعرفة تيار القاعدة، هنستخدم قانون تعريف نسبة التكبير. ولما نضرب طرفين المعادلة في 𝐼𝐵، هنقدر نطلع إن تيار المجمِّع بيساوي نسبة التكبير مضروبة في تيار القاعدة. يعني بيساوي خمسين مضروبة في خمسة في عشرة أُس سالب خمسة أمبير. فالناتج هيطلع إن تيار المجمِّع بيساوي اتنين وخمسة من العشرة، في عشرة أُس سالب تلاتة أمبير. وبكده نبقى عرفنا نطلَّع قيمة نسبة التوزيع بمعرفة نسبة التكبير. وطلَّعنا شدة تيار المجمِّع بمعرفة نسبة التكبير وتيار القاعدة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.