فيديو: وحدات السعة المترية

يوضح الفيديو كيفية تقدير وحدات السعة المترية، وكيفية قياسها.

٠٤:٣٦

‏نسخة الفيديو النصية

هنتكلم عن وحدات السعة المترية. هنتعلم إزاي نقدر السعة ونقيسها. هبتدي الشرح بالنشاط التالي.

في النشاط ده هنكتشف إيه هي وحدات قياس السعة. الخطوة رقم واحد هنستعمل قطارة عين؛ عشان نشوف كام ملليلتر من الماء هيملأ الملعقة. هنلاحظ إنه كل عشر نقط هنعتبرها واحد ملليلتر.

الخطوة رقم اتنين هنستعمل علبة ماء فارغة سعتها واحد لتر؛ عشان نشوف كام لتر من الماء هيملأ الجردل اللي قدامي.

وبكده أقدر أستنتج إنه السعة هي مقدار ما يمكن أن يحتويه وعاء من سائل. وتقاس بوحدات منها الملليلتر ويرمز له بالرمز «مل». واللتر يرمز له بالرمز «ل».

هنكمل في الصفحة اللي جاية. هنلاحظ إنه القطارة بتحتوي تقريبًا على واحد ملليلتر من السائل، وهو ما يعادل عشرة نقط تقريبًا. يعني هنستعمل هذه الوحدة وهي الملليلتر؛ عشان نقيس سعة الأوعية الصغيرة.

أما إزازة المية فبتحتوي على واحد لتر من السائل. وبالتالي بتُستعمل الوحدة دي عشان أقيس سعة الأوعية الأكبر. هنلاحظ بكده إن وحدات قياس السعة هي اللتر والملليلتر. واحد لتر هيساوي ألف ملليلتر. هنكمل في الصفحة اللي جاية.

وبكده هنلاحظ إنه الملليلتر هو الوحدة الأصغر، واللتر هو الوحدة الأكبر. هناخد مثال: اختار الوحدة اللي أستعملها عشان أقيس كمية الماء التي يشربها عصفور كل يوم.

هنفكر إزاي؟ في البداية هنلاحظ إنه اللتر هو وحدة كبيرة، لكن العصفور بيشرب كمية قليلة من المية؛ عشان كده هنقيس كمية الماء اللي هيشربها العصفور كل يوم بالملليلتر. إذن الإجابة هي ملليلتر.

هناخد مثال تاني: ما الوحدة الأنسب لتقدير كمية الماء الموجودة في حوض الأسماك؟ خمسين ملليلتر، أم خمسة لتر.

هنفكر إزاي؟ هنلاحظ إنه خمسين ملليلتر كمية قليلة جدًّا. وبالتالي فهي غير معقولة. لكن خمسة لتر كمية أكبر؛ وبالتالي فهي كمية معقولة. إذن الوحدة الأنسب لتقدير كمية الماء الموجودة في حوض الأسماك هي خمسة لتر.

هنكمل في الصفحة اللي جاية.

تدريبات: اختار الوحدة الأنسب، اللتر أو الملليلتر، لقياس سعة كل مما يلي: رقم واحد: ملعقة.

بما إنه الملعقة تعتبر وعاء صغير؛ إذن وحدة قياسها هي الملليلتر.

رقم اتنين: زجاجة دواء.

برضو بما إنه زجاجة الدواء تعتبر وعاء صغير؛ إذن وحدة قياسها هي الملليلتر.

رقم تلاتة: وعاء استحمام.

وعاء استحمام يُعتبر وعاء كبير. وبالتالي هنختار ليه الوحدة الأكبر وهي اللتر.

هنكمل في الصفحة اللي جاية.

رقم أربعة: اختار التقدير الأنسب لسعة كل مما يلي: أول حاجة؛ زجاجة عطر: ميتين وخمسين لتر، أم ميتين وخمسين ملليلتر.

بما إن اللتر وحدة كبيرة، وزجاجة العطر بتكون سعتها صغيرة؛ إذن التقدير الأنسب لسعة زجاجة العطر هي ميتين وخمسين ملليلتر.

رقم خمسة؛ وعاء الطبخ: عشرة لتر، أم عشرة ملليلتر. بما إنه عشرة ملليلتر كمية قليلة؛ إذن التقدير الأنسب لسعة وعاء الطبخ هي عشرة لتر.

وبكده هنكون اتعلمنا إزاي نقدر السعة ونقيسها. وعرفنا إنه وحدات قياس السعة هي اللتر والملليلتر. واللتر هو الوحدة الأكبر. والملليلتر هو الوحدة الأصغر. وواحد لتر هيساوي ألف ملليلتر.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.