فيديو: التمثيل بالصور

يوضح الفيديو كيفية جمع البيانات، وتنظيمها، وتمثيلها بالصور، وأمثلة عليها.

٠٣:٢١

‏نسخة الفيديو النصية

التمثيل بالصور.

في الفيديو ده هنتعلم جمع البيانات وتنظيمها وتمثيلها بالصور. البيانات هي مجموعة من المعلومات اللي بنحتاجها عشان نقيس حاجة معينة. وفيه طرق كتير لعرضها؛ عشان نسهل على نفسنا قراءتها والتعامل معاها. ومن الطرق دي التمثيل بالصور.

التمثيل بالصور بيبقى زي التمثيل بالعلامات الإحصائية. بس بدل ما بنستخدم العلامات، بنستخدم الصور المختلفة. سواءً كانت كل صورة بترمز لعلامة واحدة أو أكتر. وبنعرف ده ونحدّده عن طريق مفتاح الجدول.

هنوضح الطريقة بالمثال ده: جمعت هدى بيانات حول الحيوان المفضل لمجموعة من أصدقائها. وكتبت النتائج في الجدول اللي هيظهر دلوقتي. ودلوقتي هي عايزة تمثِّل البيانات دي بالصور.

أول حاجة هنرسم جدول بالشكل ده. وبعدين هنسمّيه ونحطّه في إطار بالشكل ده. وبعدين هنكتب تحت الجدول مفتاح الجدول اللي هنستخدمه، ولْيكُن إن كل صورة تمثّل اختيار أحد أصدقاء هدى. وبعد كده نبدأ نملا الجدول.

لو بصينا على الجدول الأول، هنلاقي إن اتنين من أصدقاء هدى كان حيوانهم المفضل هو الكلب. فهنحط صورة كلب مرتين في الجدول التاني جنب خانة الكلب.

نرجع تاني عَ الجدول الأول، هنلاقي إن أربعة من أصدقاء هدى اختاروا إن القطة هي حيوانهم المفضل. فهنحط صورة قطة أربع مرات في الجدول التاني جنب خانة القطة. وبكده نبقى خلصنا تمثيل بيانات الجدول ده.

نتنقل لصفحة تانية. نحل مثال تاني: سأل حسن عشرين من زملاؤه في الفصل عن طريقة ذهابهم للمدرسة. وجمع البيانات دي وكتبها في الجدول اللي هيظهر دلوقتي. والمطلوب إننا نمثّل الجدول ده بالصور. بافتراض إن كل صورة هتساوي اختيارين.

أول حاجة نرسم جدول بالشكل ده. وبعدين نسمي الجدول ونحطّ حواليه إطار، ونكتب تحت الجدول إن المفتاح هو إن كل صورة بتمثّل اختيارين بالشكل ده. ونبدأ نملا الجدول.

في الجدول الأول هنلاقي إن عشرة من زملاء حسن اختاروا الحافلة. وبما إن كل صورة بتمثّل اختيارين، يبقى هنحط خمس صور للحافلة في الفراغ الأول في جدول الصور بالشكل ده. نفتكر إن كل خمس علامات بنكتبهم بالشكل ده.

نرجع للجدول الأول. هنلاقي إن ستة من الزملاء اختاروا المشي. يبقى هنحط تلات صور لولد بيمشي في الفراغ التاني في جدول الصور. وهنلاقي إن أربعة من زملاء حسن اختاروا الذهاب للمدرسة بالسيارة. يبقى هنحط صورة سيارة مرتين في الفراغ التالت في جدول الصور.

وبكده نبقى خلصنا الفيديو ده اللي اتعلّمنا فيه جمع البيانات وتنظيمها وتمثيلها بالصور.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.