فيديو: طرح الأعدادالمكونة من ٣ أرقام

يوضح الفيديو طريقة إعادة التجميع لطرح الأعداد المكوَّنة من ثلاثة أرقام.

٠٦:٥٣

‏نسخة الفيديو النصية

هنتكلّم عن طرح الأعداد المكوّنة من تلات أرقام مع إعادة التجميع. هنتعلّم إزّاي نطرح الأعداد المكوّنة من تلات أرقام مع إعادة التجميع.

هبتدي شرح بالمثال التالي: مع سعاد وفاطمة وعبير ورق ملون. كم يزيد عدد الأوراق الملونة اللي مع فاطمة على عدد الأوراق الملونة اللي مع سعاد. هنلاحظ إنه معطى في الجدول اسم كل واحدة وعدد الأوراق الملونة اللي معاها. عشان أجيب كم يزيد عدد الأوراق الملونة اللي مع فاطمة، على عدد الأوراق الملونة اللي مع سعاد، هجيب ناتج طرح ميتين خمسة وستين ناقص تسعة وسبعين.

الخطوة الأولى: هطرح الآحاد. هلاحظ إن مش هينفع أطرح تسع آحاد من خمس آحاد. وبكده هعيد تجميع عشرة واحدة إلى عشر آحاد. فهيكون عدد الآحاد خمستاشر آحاد، وعدد العشرات خمس عشرات. وبكده أقدر أطرح خمستاشر آحاد ناقص تسع آحاد، هيساوي ست آحاد.

خطوة رقم اتنين: هنطرح العشرات. هنلاحظ إنه مش هينفع نطرح سبع عشرات من خمس عشرات. وبكده هعيد تجميع مائة واحدة إلى عشر عشرات. فهيكون عدد العشرات خمستاشر عشرة، وعدد المئات مائة واحدة. دلوقتي أطرح خمستاشر عشرة ناقص سبع عشرات، هيساوي تمن عشرات.

خطوة رقم تلاتة: هنطرح المئات. واحد مئات ناقص صفر مئات، هيساوي واحد مئات. وبكده أقدر أقول إنه عدد الأوراق الملونة اللي مع فاطمة هيزيد بمية ستة وتمانين ورقة على الأوراق الملونة اللي مع سعاد.

هنكمّل في الصفحة اللي جاية.

مثال: مع أحمد تلتمية وخمسين جنيه. إذا اتبرع أحمد لجمعية خيرية بمبلغ مية تسعة وسبعين جنيه. فكم جنيه هيتبقى معاه؟

عشان أجيب كام جنيه هيتبقى مع أحمد بعد ما يتبرع بمية تسعة وسبعين جنيه. هجيب ناتج طرح تلتمية وخمسين ناقص مية تسعة وسبعين.

الخطوة الأولى: هنطرح الآحاد. هنلاحظ إنه مش هينفع نطرح تسعة جنيه من صفر جنيه. وبكده هنعيد تجميع خمسين جنيه اللي هو خمس عشرات، إلى أربعين جنيه زائد عشرة جنيه. يعني الخمس عشرات هتبقى أربع عشرات، والآحاد هتبقى عشر آحاد. دلوقتي أقدر أطرح عشر آحاد ناقص تسع آحاد. يعني عشرة جنيه ناقص تسعة جنيه، هيساوي واحد جنيه.

بعد كده خطوة رقم اتنين: هنطرح العشرات. هنلاحظ إنه مش هينفع نطرح سبعين جنيه من أربعين جنيه. يعني مش هينفع نطرح سبع عشرات من أربع عشرات. وبكده هنعيد تجميع تلتمية جنيه اللي هي التلات مئات، إلى ميتين جنيه زائد مية جنيه. يعني التلات مئات هتبقى اتنين مئات. والأربع عشرات هتبقى أربعتاشر عشرة. دلوقتي أقدر أطرح أربعتاشر عشرة ناقص سبع عشرات. يعني هيساوي سبع عشرات.

أخيرًا: هنطرح المئات. اتنين مئات ناقص واحد مئات. يعني ميتين جنيه ناقص مية جنيه، هيساوي مية جنيه. يعني هيساوي واحد مئات. وبكده أقدر أقول إنه هيتبقّى مع أحمد بعد ما يتبرع بمية تسعة وسبعين جنيه. هيتبقّى معاه مية واحد وسبعين جنيه.

هنكمّل في الصفحة اللي جاية. تدريبات: اطرح ثم تَحقّقْ من الإجابة.

هبتدي أول سؤال: تلتمية واحد وتسعين ناقص مية تمنية وسبعين.

هبتدي بطرح الآحاد. مش هينفع نطرح تمن آحاد من واحد آحاد. وبكده هنعيد تجميع عشرة واحدة إلى عشر آحاد. فهيبقى عندي حداشر آحاد وتمن عشرات. دلوقتي أقدر أطرح حداشر آحاد ناقص تمن آحاد، هيساوي تلات آحاد. بعدين هنطرح العشرات. تمن عشرات ناقص سبع عشرات، هيساوي واحد عشرات. وأخيرًا هنطرح المئات. تلات مئات ناقص واحد مئات، هيساوي اتنين مئات. إذن ناتج الطرح هو ميتين وتلتاشر.

عشان نتأكد من الإجابة. بما إنه تلتمية واحد وتسعين ناقص مية تمنية وسبعين هيساوي ميتين وتلتاشر. هجمع ميتين وتلتاشر، زائد العدد التاني اللي هو مية تمنية وسبعين. هلاحظ إن الناتج هيبقى تلتمية واحد وتسعين. يعني حصلت على العدد الأولاني. وبكده الإجابة صحيحة.

رقم اتنين: خمسمية اتنين وأربعين ناقص مية سبعة وستين.

هبتدي بطرح الآحاد. هنلاحظ إنه مش هينفع نطرح سبع آحاد من اتنين آحاد. وبكده هنعيد تجميع عشرة واحدة إلى عشر آحاد. فهيبقى عندي اتناشر آحاد وتلات عشرات. دلوقتي هطرح اتناشر آحاد ناقص سبع آحاد. هحصل على خمس آحاد. خطوة رقم اتنين هبتدي بطرح العشرات. هلاحظ إنه مش هينفع أطرح ست عشرات من تلات عشرات. وبكده هعيد تجميع مائة واحدة إلى عشر عشرات. فهيبقى عدد العشرات تلتاشر عشرة، والمئات أربع مئات. دلوقتي هطرح تلتاشر عشرة ناقص ست عشرات، هيساوي سبع عشرات. وأخيرًا هطرح المئات. أربع مئات ناقص واحد مئات، هيساوي تلات مئات. إذن ناتج الطرح هو تلتمية خمسة وسبعين.

عشان نتأكد. بما إنه خمسمية اتنين وأربعين ناقص مية سبعة وستين، هيساوي تلتمية خمسة وسبعين. هجمع الناتج اللي حصلت عليه اللي هو تلتمية خمسة وسبعين، زائد العدد التاني اللي هو مية سبعة وستين. هحصل على خمسمية اتنين وأربعين. وبكده حصلت على العدد الأولاني. إذن الإجابة صحيحة.

وبكده هنكون اتعلّمنا إزّاي نطرح الأعداد المكوّنة من تلات أرقام مع إعادة التجميع. وإزّاي نتأكد من الناتج.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.