فيديو: تحديد المقارنة الصحيحة بين عددين كسريين لهما مقامان مختلفان

أيّ من العبارات الآتية صواب بخصوص ٨/٥ ٥؟ [أ] ٦< ٨/٥ ٥ [ب] ٨/٥ ٥< ٤/١ ٥ [ج] ٨/٣ ٥ >٨/٥ ٥ [د] ٨/٥ ٥ >٤/١ ٥ [ﻫ] ٨/٥ ٥ >٨/٧ ٥

٠٣:٤٢

‏نسخة الفيديو النصية

أيّ من العبارات الآتية صواب بخصوص خمسة وخمسة على تمنية؟ الاختيار الأول: ستة أصغر من خمسة وخمسة على تمنية. الاختيار التاني: خمسة وخمسة على تمنية أصغر من خمسة وواحد على أربعة. الاختيار التالت: خمسة وتلاتة على تمنية أكبر من خمسة وخمسة على تمنية. الاختيار الرابع: خمسة وخمسة على تمنية أكبر من خمسة وواحد على أربعة. الاختيار الخامس: خمسة وخمسة على تمنية أكبر من خمسة وسبعة على تمنية.

دلوقتي عايزين نختبر صحة كل اختيار من الاختيارات الخمسة اللي عندنا. هنبدأ بأول اختيار. ستة عايزين نقارنها بالعدد الكسري خمسة وخمسة على تمنية. خمسة وخمسة على تمنية لو شُفناها على خط الأعداد هنلاقيها واقعة ما بين الخمسة والستة، في المكان ده. يعني هي أكبر من الخمسة وأقل من الستة؛ لأن الأعداد على خط الأعداد بتزيد في الاتّجاه ده، وبتقل في الاتجاه العكسي. يبقى إذن خمسة وخمسة على تمنية أقل من ستة. فالعبارة الأولى دي عبارة خاطئة.

نشوف دلوقتي الاختيار التاني. عايزين نقارن العدد الكسري خمسة وخمسة على تمنية بالعدد الكسري خمسة وواحد على أربعة. طب خمسة وواحد على أربعة ده، نقدر نكتبه على صورة عدد كسري بس الجزء الكسري اللي فيه يبقى مقامه تمنية. إزاي؟ عايزين خمسة وواحد على أربعة، يبقى بيساوي خمسة وكسر تاني مقامه تمنية.

الأربعة دي عشان تبقى تمنية معناها إن إحنا ضربنا في اتنين. يبقى لازم نضرب البسط كمان في اتنين، يعني البسط هيبقى هو واحد في اتنين، يعني اتنين. فيبقى العدد الكسري المكافئ ليه ومقام الجزء الكسري فيه تمنية، يبقى خمسة واتنين على تمنية. يبقى أنا دلوقتي عايزة أقارن … يبقى أنا دلوقتي عايزة أقارن خمسة وخمسة على تمنية بخمسة واتنين على تمنية. واضح إن الخمسة أكبر من الاتنين؛ فواضح إن العدد الكسري الأول أكبر من العدد الكسري التاني. ده معناها إن الاختيار التاني ده اختيار غير صحيح.

عايزين نشوف الاختيار التالت دلوقتي. إحنا بنقارن العدد الكسري خمسة وتلاتة على تمنية، بالعدد الكسري خمسة وخمسة على تمنية. واضح إن الجزء الكسري في العدد التاني أكبر من الجزء الكسري في العدد الأول؛ لأن الاتنين ليهم نفس المقام، وبسط التاني أكبر من بسط الأول. فده معناها إن العدد الكسري التاني هو اللي أكبر. وده عكس المذكور في الاختيار ده؛ فبالتالي الاختيار ده غير صحيح.

دلوقتي عايزين نختبر صحة الاختيار الرابع. هنلاحظ إن الاختيار الرابع هو عكس الاختيار التاني، وهي الجملة الصحيحة اللي أصلًا عشانها إحنا رفضنا الاختيار التاني. فالجملة دي صحيحة.

دلوقتي هنختبر صحة الاختيار الخامس. عايزين نقارن العدد الكسري خمسة وخمسة على تمنية، بالعدد الكسري خمسة وسبعة على تمنية. هنلاقي خمسة وخمسة على تمنية أهو، وخمسة وسبعة على تمنية أهو. واضح إن خمسة وسبعة تمنية أكبر من العدد الكسري خمسة وخمسة على تمنية. وده عكس المذكور في الاختيار اللي عندنا. فده معناه إن الاختيار ده غير صحيح.

يبقى ده معناه إن الاختيار الوحيد الصائب هو إن خمسة وخمسة على تمنية أكبر من خمسة وواحد على أربعة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.