فيديو: التأكد من صحة المعادلات الرياضية التي تتضمَّن الضرب

هل العملية الآتية صحيحة؟ ٢ × ٤ × ٦٢٩ = ٥٠١٢.

٠١:٥٧

‏نسخة الفيديو النصية

هل العملية الآتية صحيحة؟ حاصل ضرب اتنين في أربعة في ستمية تسعة وعشرين، يساوي العدد خمسة آلاف واتناشر.

علشان نعرف العملية اللي قدامنا دي صحيحة ولّا لأ. هنبدأ نضرب الأعداد اتنين وأربعة وستمية تسعة وعشرين، ونشوف ناتج الضرب. وبعدين نقارنه بناتج الضرب الموجود عندنا أصلًا في السؤال، واللي هو خمسة آلاف واتناشر.

هنضرب دلوقتي التلات أعداد دول مع بعض. يا ترى هنضربهم إزاي؟ هنبدأ بضرب أول عددين اللي همّ الصغيرين واللي كل واحد فيهم مكوّن من رقم واحد. هنقول اتنين في أربعة بيساوي تمنية. وبعدين نضرب التمنية دي في العدد التالت اللي مكوّن من تلات أرقام اللي هو ستمية تسعة وعشرين.

تسعة في تمنية بيساوي اتنين وسبعين. فهنكتب اتنين تحت خانة الآحاد، ونضيف سبعة للخانة اللي بعدها. وبعدين نضرب اتنين في تمنية. اتنين في تمنية بيساوي ستاشر. وبعدين هنضيف عليهم السبعة. ستاشر زائد سبعة بيساوي تلاتة وعشرين. فهنكتب التلاتة تحت خانة العشرات. وبعدين نضيف الاتنين للخانة اللي بعدها. وبعدين نضرب ستة في تمنية. ستة في تمنية بيساوي تمنية وأربعين. وتمنية وأربعين هنضيف عليها الاتنين اللي فوق دي فهتكون خمسين. فهنكتب تحت خانة المئات خمسين.

فكده حاصل ضرب ستمية تسعة وعشرين في تمنية، بيساوي العدد خمسة آلاف اتنين وتلاتين. دلوقتي هنقارن العدد خمسة آلاف اتنين وتلاتين ده بالعدد الموجود عندنا في السؤال، اللي هو خمسة آلاف واتناشر. هنلاقيهم مش بيساووا بعض. معنى كده إن العملية الموجودة في السؤال غير صحيحة. فهتكون إجابة السؤال: «هل العملية الآتية صحيحة؟» هي لا.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.