فيديو: الجمع إلى الصفر

يوضِّح الفيديو كيفية إيجاد ناتج جمع أي عدد إلى الصفر باستخدام النماذج.

٠٦:٠٠

‏نسخة الفيديو النصية

الجمع إلى الصفر.

هنتعلم في الدرس ده إزاي نقدر نوجد ناتج الجمع إلى الصفر؛ يعني إزاي نقدر نجمع صفر مع عدد آخر. يا ترى الناتج هيبقى إيه؟

لو بصّينا على وحدات الدومينو اللي قدامنا دول. أول وَحدة هنلاقي عليها أربع نقط؛ يعني الجنب اليمين ده بيمثّل العدد أربعة. لو جينا نجمع عليه صفر، اللي هو النص التاني الملاصق للأربعة، اللي ما فيهوش ولا نقطة. يعني لو جينا نشوف عدد النقط النهائي اللي على وحدة الدومينو دول، هنلاقيه كام؟ واحد، اتنين، تلاتة، أربعة. ما فيش في الجنب ده أي نقط، يبقى أربعة زائد صفر هيساوي أربعة.

لو جينا نشوف وحدة الدومينو اللي بعدها. هنمثّل عدد النقط اللي موجود على اليمين فيها، هنعدهم، هيبقوا واحد اتنين. يبقى العدد اللي بيمثّل عدد النقط اللي على وحدة الدومينو هنا هو اتنين. زائد النصف التاني من الدومينو الفارغ، ما فيهوش أي نقط؛ معناها إنه فيه صفر نقط. طب لو جينا نعدّ عدد النقط الكلي الموجود على وحدة الدومينو كلها. هنلاقي إن همّ واحد اتنين. وهنا ما فيش أي نقط. يبقى إجمالي أو عدد النقط الكلي اللي موجود على وحدة الدومينو هو اتنين.

لو جينا نبص على وحدة الدومينو اللي بعد كده. عايزين نعدّ مجموعة النقط اللي موجودة على الجزء اليمين بتاعها. هنلاقي عندنا كام وحدة؟ واحد، اتنين، تلاتة، أربعة، خمسة. يبقى عندنا خمس نقط على الجانب اليمين من وحدة الدومينو.

طيب الجانب اللي على اليسار؟ فاضي ما فيهوش أي نقط. يعني نقدر نقول إن هو معناه إن فيه صفر نقط. طب يا ترى كل النُّقط الموجودة على وحدة الدومينو هتبقى كام؟ ما فيش أي نقط اتضافت نتيجة الجنب الفاضي. يعني كل النقط الموجودة على الدومينو هي ما زالت الخمس نقط اللي كانوا موجودين على الجنب اليمين. يبقى عندنا خمس نقط على الدومينو. يبقى خمسة زائد صفر بتساوي خمسة.

لو بصينا لوحدة الدومينو اللي موجودة دلوقتي، هنلاقي إن الجنب اليمين فيها فاضي ما فيهوش أي نقط. ده معناه إن العدد اللي بيمثّل الجانب ده هو صفر نقط. هنجمع عليه مجموعة النقط اللي موجودة على الجانب الأيسر. عايزين نشوف هو في كام نقطة موجودة؛ واحد، اتنين، تلاتة. يبقى هنجمع عليه العدد تلاتة. يبقى محتاجين نجيب ناتج جمع صفر زائد تلاتة.

كل النقط الموجودة على وحدة الدومينو دلوقتي عبارة عن تلات نقط برضو. لمّا ضفنا لهم صفر نقط ما زال موجود على الدومينو تلات نقط. يبقى صفر زائد تلاتة بيساوي تلاتة.

يبقى نقدر نستنتج من العمليات اللي قمنا بيها دلوقتي، إن إضافة أي عدد إلى الصفر، ناتج الجمع هيبقى هو العدد نفسه. يعني أربعة زائد صفر تساوي أربعة. خمسة زائد صفر تساوي خمسة. صفر زائد تلاتة يساوي تلاتة. أي عدد هنضيف إليه صفر هيفضل الناتج هو العدد نفسه.

هنجيب صفحة جديدة ونكمّل مع بعض شوية أمثلة.

لو عندنا ست كرات، وضِفنا للست كرات دول صفر؛ يعني زودنا عليهم صفر كرات. يعني ما ضفناش أي كرات جديدة؛ أضفنا لهم صفر كرات. يا ترى عدد الكرات الناتج هيبقى إيه؟ هيفضل عدد الكرات الناتج هو ست كرات؛ عشان أنا أضفت لهم صفر، يعني ما حطيتش في الحقيقة ولا كرة زيادة. وده بيمثله عملية الجمع دي: ستة زائد صفر. ست كرات جمعنا عليهم صفر، هيبقى الناتج ست كرات. يعني زي ما قلنا أي عدد هنضيف إليه صفر، هيبقى الناتج العدد نفسه.

لو عندنا تلات طائرات أضفنا إليهم صفر طائرة. يعني ده بيمثله عملية الجمع دي: تلاتة زائد صفر. أضفنا صفر طائرة، يعني في الحقيقة إحنا ما أضفناش ولا طائرة. فهيفضل العدد زي ما هو. فهيبقى الناتج عندنا برضو همّ نفس التلات طائرات. نفس الفكرة أي عدد هنضيف إليه الصفر هيبقى الناتج العدد نفسه.

فلو مطلوب مننا نجيب مثلًا ناتج جمع سبعة زائد صفر، فهيبقى الناتج هو العدد نفسه اللي هو سبعة. لو جينا نجيب ناتج جمع تسعة زائد صفر، هيبقى الناتج العدد نفسه.

اتعلمنا في الدرس ده إزاي نقدر نوجد ناتج الجمع إلى الصفر.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.