فيديو: إيجاد النسبة بين كميتين بمعلومية مجموعهما وقيمة إحداهما

إذا كان إجمالي عدد الأولاد والبنات في مدرسةٍ ما ٥٩٥؛ حيث عدد الأولاد ٣٨٤، فأوجد النسبة بين عدد الأولاد وعدد البنات.

٠١:٤٤

‏نسخة الفيديو النصية

إذا كان إجمالي عدد الأولاد والبنات في مدرسةٍ ما، خمسمية خمسة وتسعين؛ حيث عدد الأولاد تلتمية أربعة وتمانين، فأوجد النسبة بين عدد الأولاد وعدد البنات.

يعني معطى عندنا إن إجمالي عدد الأولاد والبنات في مدرسةٍ ما خمسمية خمسة وتسعين. وأمّا عدد الأولاد لوحدهم تلتمية أربعة وتمانين. والمطلوب إننا نوجد النسبة بين عدد الأولاد وعدد البنات. فعلشان نوجد النسبة بينهم، لازم في الأول نعرف عدد البنات.

وبما إن معطى عندنا العدد الإجمالي للولاد والبنات. وعندنا عدد الأولاد لوحدهم. فمعنى كده إن عدد البنات في المدرسة هيبقى بيساوي العدد الكلي للأولاد والبنات في المدرسة، ناقص عدد الأولاد.

بعد كده هنبدأ نعوّض، فهنعوّض عن العدد الكلي، اللي هو إجمالي عدد الأولاد والبنات في المدرسة، بخمسمية خمسة وتسعين، ناقص عدد الأولاد، واللي معطى عندنا تلتمية أربعة وتمانين. فلمّا نحسب خمسمية خمسة وتسعين ناقص تلتمية أربعة وتمانين، هتبقى بتساوي ميتين وحداشر. وبالتالي هيبقى ميتين وحداشر هو عدد البنات الموجودين في المدرسة.

بعد كده عشان نوجد النسبة بين عدد الأولاد وعدد البنات، يبقى عايزين نوجد النسبة بين تلتمية أربعة وتمانين اللي هو عدد الأولاد، وميتين وحداشر اللي هو عدد البنات. فهتبقى النسبة هي تلتمية أربعة وتمانين إلى ميتين وحداشر. ولو حاولنا نختصرها أو نكتبها في أبسط صورة، هنلاحظ إن العدد ميتين وحداشر هو عدد أوّلي؛ لأنه مش بيقبل القسمة على أيّ عدد آخر، غير واحد ونفسه. فبالتالي هتبقى هي دي أبسط صورة للنسبة. وبالتالي هتبقى النسبة بين عدد الأولاد وعدد البنات هي تلتمية أربعة وتمانين إلى ميتين وحداشر.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.