فيديو: كتابة تعبيرات الطرح والقسمة وإيجاد قيمتها

يوضح الفيديو كيفية كتابة التعبيرات الرياضية التي تحتوي على عمليات طرح أو قسمة؛ وذلك بالتعبير عنها بالكلمات، ثم تحديد المتغيرات، ثم كتابة التعبير، وكيفية إيجاد قيمة التعبيرات بمعرفة قيمة المتغيرات.

٠٣:٤٠

‏نسخة الفيديو النصية

كتابة تعبيرات الطرح والقسمة وإيجاد قيمتها.

في الفيديو ده هنعرف إزاي بنوجد قيم التعبيرات اللي بتحتوي على عمليات طرح أو قسمة، وإزاي بنكتبها.

التعبير هو جملة عددية بتتكون من أعداد أو متغيرات أو أعداد ومتغيرات بتربط، ما بينها عملية واحدة على الأقل. والمتغيرات هي رموز بتدل على قيمة غير معروفة. وعشان نوجد قيمة تعبير معيّن بنعوّض عن المتغير بعدد في التعبير. بعدين بنجري العمليات الموجودة في التعبير لإيجاد قيمته.

ادّخرت نهال خمسين جنيهًا في أسبوعين. فإذا كانت قد ادّخرت ثمانية وعشرون جنيهًا في الأسبوع الأول، فاكتب تعبيرًا رياضيًّا معبّرًا عمّا ادّخرته في الأسبوع الثاني، ثم أوجد قيمته. يبقى في المثال عندنا مطلوبين؛ المطلوب الأول كتابة التعبير الرياضي المعبر عمّا ادّخرته نهال في الأسبوع التاني. والمطلوب التاني هو إيجاد قيمته.

فعشان نكتب التعبير، محتاجين أول حاجة نعبّر عنه بالكلمات. فهنقول إن اللي ادخرته نهال في الأسبوع التاني هو اللي ادّخرته في الأسبوعين اللي هو خمسين جنيه، ناقص اللي ادّخرته في الأسبوع الأول. فبما إن الادخار الكلي قيمته معروفة اللي هي خمسين جنيه، فهنرمز لادخار الأسبوع الأول بالرمز س. فبالتالي التعبير هيبقى خمسين ناقص س، وده التعبير المعبر عمّا ادخرته نهال في الأسبوع التاني.

عشان نوجد قيمة التعبير، هنعوّض في التعبير بقيمة س، اللي هي في السؤال كانت تمنية وعشرين. فده هيساوي خمسين ناقص س، وهنعوض عن الـ س بتمنية وعشرين؛ يبقى هيساوي خمسين ناقص تمنية وعشرين. وخمسين ناقص تمنية وعشرين هيساوي اتنين وعشرين. يبقى اللي ادّخرته نهال في الأسبوع التاني هو اتنين وعشرين جنيهًا.

مساحة غرفة عادل هي اثنا عشر مترًا. اكتب التعبير المعبر عن عرضها. وإذا كان طولها هو أربعة أمتار فما هو عرضها؟

يبقى عندنا هي المثال مطلوبين؛ المطلوب الأول هو التعبير المعبر عن عرض غرفة عادل. والمطلوب التاني هو عرض غرفة عادل.

فبالنسبة للمطلوب الأول عشان نكتب التعبير، محتاجين أول حاجة نعبّر عنه بالكلمات. فممكن نقول إن عرض غرفة عادل هو مساحة الغرفة مقسومة على طولها.

فبما إن مساحة غرفة عادل معروفة وبتساوي اتناشر متر، فهنرمز لطولها بالرمز ل. فبالتالي التعبير هيبقى اتناشر اللي هو مساحة غرفة عادل، مقسومة على طولها اللي هو ل. يعني اتناشر على ل.

في المطلوب التاني مُعطى إن طول غرفة عادل هو أربع أمتار. فبالتالي هيبقى عرض غرفة عادل اللي هو بيساوي اتناشر على ل، بيساوي اتناشر على أربعة؛ لإننا عوّضنا عن ل اللي بيرمز لطول غرفة عادل بقيمتها اللي هي أربع أمتار. واتناشر على أربعة بيساوي تلاتة. وده معناه إن عرض غرفة عادل هو تلات أمتار.

يبقى في الفيديو ده عرفنا إزاي بنكتب التعبيرات اللي بتحتوي على عمليات طرح أو عمليات قسمة، وإزاي بنوجد قيمتها إذا عرفنا قيمة المتغيرات.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.