فيديو: امتحان الاستاتيكا للعام السابق • ٢٠١٨/٢٠١٧ • السؤال الحادي عشر

امتحان الاستاتيكا للعام السابق • ٢٠١٨/٢٠١٧ • السؤال الحادي عشر

٠٤:٠٩

‏نسخة الفيديو النصية

قضيب منتظم طوله أربعة متر، ووزنه خمسين ثقل كيلوجرام. يرتكز أفقيًّا على حاملين عند طرفيه. إذا وُضع ثقل مقداره عشرين ثقل كيلوجرام على القضيب على بُعد واحد متر من أحد طرفيه، فأوجد ردّ فعل كلا الحاملين.

عندنا قضيب منتظم، طوله أربعة متر، ووزنه خمسين ثقل كيلوجرام. وما دام قلنا إن القضيب منتظم، يبقى وزنه بيؤثّر في المنتصف. يعني هيقسمه لجزئين، كل جزء اتنين متر. القضيب ده بيرتكز أفقيًّا على حاملين. يبقى كل طرف عنده حامل بالشكل ده. نفرض مثلًا إن الطرف الأول أ، والطرف التاني ب. عُلق ثقل مقداره عشرين ثقل كيلوجرام على بُعد واحد متر من أحد طرفيه. يعني هنيجي مثلًا عند أ، وعلى بُعد واحد متر منها حطّينا الثقل عشرين ثقل كيلوجرام. يبقى الجزء ده كمان واحد متر. عاوزين نعرف ردّ فعل كلا الحاملين.

الحامل الأول نفرض إن ردّ فعله ر واحد. والحامل التاني نفرض إن ردّ الفعل عنده هو ر اتنين. يبقى كده القضيب متّزن تحت تأثير أربع قوى متوازية ومستوية. قوتين اتجاههم لأعلى، وهم ر واحد وَ ر اتنين، ودول المطلوبين عندنا. وقوتين اتجاهم لأسفل، اللي هم عشرين وخمسين ثقل كيلوجرام. وحسب شروط التوازن، أول شرط بيقول لنا مجموع القياسات الجبرية للقوى يساوي صفر. يعني بعد ما نفرض اتجاه موجب، ونجمّع كل القوى اللي قدامنا اللي بتؤثّر على القضيب، مجموعهم هيساوي صفر. ده بالنسبة للشرط الأول.

الشرط التاني مجموع القياسات الجبرية لعزوم القوى حوْل أيّ نقطة يساوي صفر. يعني لو خدنا أيّ نقطة، بس بشرط النقطة دي تكون في نفس مستوى القوى، وحسبنا مجموع عزوم القوى حواليها، هينعدم وهيساوي الصفر. فهنبدأ نطبّق الشرطين دول؛ عشان نحصل على ر واحد وَ ر اتنين. أول حاجة هنفرض متجه ي اتجاهه لأعلى. يبقى كده كل القوى اللي اتجاهها لأعلى موجبة، والقوى اللي في عكس الاتجاه سالبة. فيبقى عندنا ر واحد زائد ر اتنين بالموجب. ناقص عشرين ناقص خمسين إشاراتهم سالبة. المجموع ده كله بيساوي الصفر. من هنا يبقى ر واحد زائد ر اتنين، بيساوي سبعين. ونسمي المعادلة دي رقم واحد.

بعدين نبدأ في تطبيق الشرط التاني. هنجيب مجموع عزوم القوى حوالين النقطة أ. يعني هيبقى عندنا ج أ بتساوي الصفر. نبدأ بالقوة عشرين. اتجاه دوران خط عمل القوة عشرين حوالين النقطة أ، عكس اتجاه دوران عقارب الساعة. يعني إشارته موجبة. والبُعد العمودي بين خط عمل القوة وَ أ، هو الجزء ده، اللي هو واحد متر. يبقى كده إحنا عندنا قوة عشرين بالموجب، مضروبة في واحد. نيجي للقوة اللي بعدها، القوة خمسين. برضو اتجاه القوة خمسين أو اتجاه دورانها موجب. والبُعد بين خط عملها والنقطة أ، هو الجزء ده، اللي هو اتنين متر. يبقى عندنا زائد خمسين في اتنين.

نيجي لآخر قوة، وهي القوة ر اتنين. اتجاه دورانها في نفس اتجاه دوران عقارب الساعة، يعني إشارتها سالبة. والبُعد بين خط عملها والنقطة أ، هو طول القضيب كله اللي هو أربعة متر. فنقول سالب ر اتنين في أربعة. ده كله بيساوي الصفر. من هنا يبقى ر اتنين هتساوي تلاتين ثقل كيلوجرام. ونسمي المعادلة دي رقم اتنين. وبالتعويض من اتنين في واحد، هينتج لنا قيمة ر واحد. واللي هتساوي أربعين ثقل كيلوجرام. ودول هم المطلوبين اللي عندنا في السؤال. يبقى ردّ فعل كلا الحاملين تلاتين ثقل كيلوجرام، وأربعين ثقل كيلوجرام.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.