تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: إيجاد مساحة المثلث

سوزان فائق

يوضح الفيديو كيفية إيجاد مساحة المثلث بمعلومية طول قاعدته وارتفاعه.

٠٥:٢٧

‏نسخة الفيديو النصية

في الفيديو ده هنتكلم على إيجاد مساحة المثلث. هنعرف إزاي نِوجد مساحة المثلث بمعلومية ارتفاعه وطول قاعدته، وهنعرف كمان إن أي ضلع من أضلاع المثلث ممكن يمثّل قاعدة.

في أي مثلث لإيجاد مساحته بنبقى محتاجين نعرف طول القاعدة وطول الارتفاع، قاعدة المثلث يمكن أن تكون أي ضلع من أضلاعه؛ يعني ممكن تكون دي القاعدة، وممكن يكون الضلع ده قاعدة، وممكن يكون الضلع ده قاعدة، وارتفاع المثلث بيبقى هو أقصر طول بين القاعدة ورأس الزاوية المقابل للقاعدة؛ يعني ده الارتفاع وعلشان يكون أقصر طول بين القاعدة ورأس الزاوية المقابلة بيبقى عمودي؛ فارتفاع المثلث بيبقى يعمل زاوية قايمة مع القاعدة بالشكل ده، وأي مثلث بيبقى فيه تلات ارتفاعات، زي ما إحنا شايفين إن كل قاعدة ممكن ينزل ارتفاع من الزاوية المقابلة ليها زي ما إحنا شايفين كده، فلما هنقول إن دي قاعدة يبقى الارتفاع بتاعها هو ده، ولما هناخد دي القاعدة يبقى ده الارتفاع الخاص بيها، ولما هناخد دي قاعدة يبقى ده الارتفاع الخاص بيها؛ علشان نعرف نِوجد مساحة المثلث. مساحة المثلث هي نصف طول القاعدة في الارتفاع، وزي ما إحنا شايفين كده لو هناخد القاعدة اللي لونها بنفسجي يبقى الارتفاع اللي لونه بنفسجي.

ناخد مثال ونشوف إزاي هنِوجد مساحة المثلث. اوجِد مساحة المثلث في الشكل المجاور: مساحة المثلث بتساوي نص طول القاعدة في الارتفاع، هنا القاعدة هنعد عدد الوحدات اللي بتمثّل طول القاعدة دي واحد اتنين تلاتة أربعة خمسة ستة؛ يبقى طول القاعدة ست وحدات، يبقى مساحة المثلث هتساوي نص في ستة في الارتفاع واحد اتنين تلاتة أربعة، أربع وحدات، بالضرب هيطلع اتناشر وحدة مربعة؛ حيث أن وحدات قياس المساحة هي الوحدات المربعة، يبقى هي دي مساحة المثلث المطلوبة.

هناخد مثال كمان: عايزين نِوجد مساحة المثلث اللي قدامنا ده، طول القاعدة عشرة وواحد من عشرة متر، والارتفاع سبعة وأربعة من عشرة متر، يبقى مساحة المثلث هتساوي نص في طول القاعدة اللي هي عشرة وواحد من عشرة في الارتفاع سبعة وأربعة من عشرة، هتساوي سبعة وتلاتين وسبعة وتلاتين من مية متر مربع، وهي دي مساحة المثلث المطلوبة.

في بعض الأحيان ممكن نستخدم التقريب علشان نوصل لنتيجة مباشرةً؛ يعني مثلًا في المثلث التاني ده لو إحنا قولنا إن الـ … طول القاعدة تقريبًا يساوي عشرة متر والارتفاع تقريبًا سبعة، والمفروض إن إحنا ده كمان بنضربه في نص يعني السبعين عَ الاتنين يعني خمسة وتلاتين، الرقم خمسة وتلاتين ده مقارب شوية للمساحة اللي إحنا طلعناها؛ يبقى معنى كده إن إحنا المساحة قيمتها مظبوطة.

وفي المثال الأولاني طول القاعدة كان ست وحدات ممكن نضربها مباشرةً في النص؛ يعني هيبقى تلاتة، يعني ممكن نقول تلاتة في أربعة على طول مباشرةً بتساوي اتناشر.

هناخد مثال كمان من حياتنا العملية: أبعاد مدخل خيمة مخصَّصة لشخصين كما بالشكل، اوجِد كمية الخامات المطلوبة لعمل المدخل. مُعطى المدخل على شكل مثلث ارتفاعه تسعة من عشرة متر، وطول قاعدته واحد ونص متر، لإيجاد قيمة كمية الخامات المطلوبة يبقى محتاجين نعرف مساحة المثلث اللي أبعاده واحد ونص متر وتسعة من عشرة متر؛ يبقى مساحة المثلث هتساوي نص في طول القاعدة واحد ونص في تسعة من عشرة الارتفاع؛ يبقى هتساوي ستمية خمسة وسبعين من ألف متر مربع، يبقى هي دي كمية الخامات المطلوبة لعمل مدخل الخيمة.

اتكلمنا في الفيديو ده عن إيجاد مساحة المثلث، عرفنا إزاي هنِوجد مساحة المثلث بمعلومية طول قاعدته وارتفاعه، وعرفنا إن أي ضلع من أضلاع المثلث ممكن تمثّل قاعدة.