تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: قراءة وكتابة الأعداد

نهال عصمت

يتناول الفيديو طريقة قراءة وكتابة الأعداد من ١ حتى ١٠٠ بالأرقام والكلمات، ويوضح ذلك بالأمثلة.

٠٩:٣٦

‏نسخة الفيديو النصية

قراءة وكتابة الأعداد.

هنتعلم إزاي نقرا ونكتب الأعداد، من واحد حتى مية. في البداية هنبدأ نكتب ونقرا الأعداد، من واحد حتى عشرين. هنرسم جدول بالشكل ده، ونبدأ نكتب جوّاه الأعداد. هنكتب في الخانة اللي فوق: الأعداد حتى عشرين. هنبدأ بالعدد واحد، وبنبدأ نكتبه بالطريقة دي: واحد. بعد كده عندنا العدد اتنين، وبنكتبه: اثنان. بعد كده العدد تلاتة، وبنبدأ نكتبه: ثلاثة. بعديه العدد أربعة، بنبدأ نكتبه: أربعة. العدد اللي بعد أربعة هو خمسة، بيتكتب بالطريقة دي: خمسة. يليه العدد ستة، وبيتكتب بالطريقة دي: ستة. بعد كده العدد سبعة، وبيكتب كده: سبعة. بعد كده العدد تمنية، بنكتب: ثمانية. العدد اللي بعديه هو تسعة، وبنكتب: تسعة. والعدد اللي بعديه هو عشرة، وبنكتبه بالطريقة دي: عشرة.

يبقى كده كتبنا الأعداد من واحد حتى عشرة. هنبدأ نكمّل الأعداد، نبدأ من حداشر حتى عشرين. أول حاجة حداشر، اللي هي: أحد عشر. بعد كده العدد اتناشر، اللي هو بنكتبه بالطريقة دي: اثنا عشر. بعد كده عندنا العدد تلتاشر، بنبدأ نكتبه: ثلاثة عشر. يعني بناخد العدد اللي في الآحاد، وبنكتبه: ثلاثة. وبعد كده عندنا في العشرات فيه واحد، فبنكتب: عشر. بعد كده العدد اللي بعديها هو أربعتاشر، بنفس الطريقة هنكتب: أربعة عشر.

هنكمل باقي الأعداد بنفس الطريقة. عندنا خمستاشر، اللي هي: خمسة عشر. بعديها ستاشر، اللي هي: ستة عشر. العدد اللي بعديه سبعتاشر، بنكتبه: سبعة عشر. بعديها تمنتاشر، هنكتب الأول: ثمانية، بعد كده نزوّد عليها: عشر. بعديها تسعتاشر، بنكتب الأول: تسعة، وبعد كده نكتب بعديها: عشر؛ عشان نكتب تسعتاشر. العدد الأخير هو عشرين، وبنكتبه بالطريقة دي: عشرون.

يبقى كده قدرنا نقرا ونكتب الأعداد من واحد حتى عشرين. طب إحنا دلوقتي كتبنا الأعداد، من حداشر لحدّ تسعتاشر عندنا خانة العشرات فيها واحد. طب لو خانة العشرات فيها اتنين، أو، تلاتة، أو أربعة، وهكذا … هنكتب الأعداد إزاي؟ هنبدأ نكتب في الخانة دي العشرات. يعني لو خانة العشرات فيها واحد، وخانة الآحاد فيها صفر، يعني عندنا العدد عشرة؛ بنكتبه بالطريقة دي: عشرة. طب لو خانة العشرات فيها اتنين؟ يبقى عندنا العدد هو عشرين، وبنكتبه: عشرون. طب لو خانة العشرات فيها العدد تلاتة؟ يبقى تلاتين، وبنبدأ نكتبه: ثلاثون، وهكذا.

لو أربعين؟ بنبدأ نكتب: أربعون. ولو خمسين، بنكتب: خمسون. طب لو عندنا العدد ستين، بنبدأ نكتبه بالطريقة دي: ستون. بعد كده العدد سبعين، بنكتبه: سبعون. العدد تمانين، بنبدأ نكتب: ثمانون. بعديها العدد تسعين، بنبدأ نكتب: تسعون. آخر حاجة عندنا العدد مية، بنبدأ نكتبه بالطريقة دي: مائة.

يبقى في حالة لو عندنا عدد مثلًا زي أربعة وخمسين، بنكتبه إزاي؟ بنبدأ ناخد العدد أربعة، اللي في الآحاد. ونزوّد عليه العدد اللي في العشرات، اللي هو خمسون. يبقى اللي هي خمسون. يبقى نبدأ نكتبه: أربعة وخمسون. طب لو عندنا العدد ستة وتلاتين، هنكتبه إزاي؟ نفس الطريقة، ناخد العدد اللي في الآحاد، اللي هو ستة. وعندنا في العشرات تلاتة، يعني ثلاثون. يبقى نبدأ نكتب: ستة وثلاثون. يبقى كده هنعرف نكتب أيّ عدد، من واحد حتى مية.

هنبدأ نجيب صفحة جديدة، ونشوف أمثلة إزاي نكتب الأعداد، بالأرقام والكلمات.

المطلوب نكتب الأعداد بالأرقام والكلمات. لو عندنا العدد خمسة وثلاثون. عندنا العدد مكتوب بالكلمات، عايزين نبدأ نكتبه بالأرقام، هنكتبه إزاي؟ عندنا في الآحاد خمسة، يبقى هنكتب خمسة. وعندنا العشرات ثلاثون، يبقى العشرات فيها تلاتة. يبقى العدد هو خمسة وتلاتين.

طب لو عايزين نكتب العدد سبعون، عايزين نكتبه بالأرقام. معنى العدد سبعون، يعني خانة الآحاد فيها صفر، والعشرات فيها سبعة. طب لو عايزين نكتب واحد وأربعون، نكتبها إزاي؟ عندنا الآحاد هيبقى فيها واحد. والعشرات هيبقى أربعة. يبقى واحد وأربعين. نشوف مثال تاني، لو عايزين نكتب ستة وستون. في الحالة دي عندنا الآحاد فيها ستة، والعشرات هي كمان ستة. يبقى العدد ستة وستين، اللي هو ستة وستون.

طب نشوف تاني مجموعة أرقام، وعايزين نكتبها بالكلمات. عندنا العدد أربعة وعشرين، هنبدأ نكتبه إزاي؟ عندنا الآحاد فيها أربعة، يبقى هنكتب: أربعة. والعشرات فيها اتنين، اللي هي: أربعة وعشرون. بعد كده عندنا العدد اتنين وخمسين، عايزين نكتبه بالكلمات. نفس الطريقة؛ عندنا الآحاد فيها اتنين، يبقى هنكتب: اثنان. بعد كده وَ … عندنا العشرات فيها خمسة، اللي هي خمسون. آخر عدد تلاتة وتسعين، عايزين نكتبه بالكلمات. عندنا الآحاد فيها تلاتة، يبقى هنكتب: ثلاثة. بعد كده وَ … العشرات فيها تسعة، يبقى هنكتب: تسعون.

يبقى كده اتكلمنا عن قراءة وكتابة الأعداد. وعرفنا لو عندنا عدد، إزاي نكتبه بالأرقام وبالكلمات.