فيديو: مقارنة الأشكال الهندسية

يوضِّح الفيديو كيفية المقارنة بين الأشكال المستوية والأشكال المجسمة.

٠٦:٠٠

‏نسخة الفيديو النصية

مقارنة الأشكال الهندسية.

هنتعلّم في الدرس ده إزّاي نقدر نقارن بين شكلين مستويين، أو بين شكلين مجسَّمين. فمثلًا لو اتطلب منّنا إن إحنا نحدِّد أوجُه الاختلاف بين الشكلين المستويين اللي قدامنا دول، اللي همّ المربع والمثلث. هنحدد أوجُه الاختلاف إزّاي؟ بناء على عدد الأضلاع وعدد الرؤوس الموجودة بكل شكل منهم.

فنقدر نحدِّد أوجُه الاختلاف بين المثلث والمربع إن أول حاجة المثلث له تلات أضلاع وتلات رؤوس. أما المربع فله أربع أضلاع وأربع رؤوس.

أما لو طُلب منا أوجُه الشبه بين المجسمين اللي قدامنا دول، اللي همّ الأسطوانة والكرة. فنقدر نقول إن الأسطوانة والكرة متشابهين؛ لأن الشكلين ليس لهما أحرُف ولا رؤوس. ولا الكرة ولا الأسطوانة ليهم أي أحرُف ولا رؤوس.

هنشوف في صفحة جديدة مجموعة من الأمثلة.

مطلوب منّنا نكمل الجملة اللي عندنا دي: المكعب والكرة مجسمين مختلفين؛ لأن … يا ترى إيه أوجُه الاختلاف بين المجسمين اللي قدامنا دول؟

أول حاجة سهل جدًّا نستنتجها إن الكرة ليس لها أحرُف ولا رؤوس. طب هنشوف المكعب دلوقتي مع بعض. المكعب ليه عدد من الأحرف وعدد من الرؤوس. عايزين نعدّهم دلوقتي مع بعض. واحد ده عدد الأحرف، اتنين، تلاتة، أربعة، خمسة، ستة، سبعة، تمنية، تسعة، عشرة، حداشر، اتناشر. يبقى المكعب ليه اتناشر حرف.

طب عدد الرؤوس اللي في المكعب: واحد، اتنين، تلاتة، أربعة، خمسة، ستة، سبعة، تمنية. يعني نقدر نستنتج إن المكعب له اتناشر حرفًا وتمن رؤوس.

تاني تمرين عندنا مطلوب منّنا في الشكلين اللي قدامنا دول نحدد إيه وجه الاختلاف بينهم.

أول شكل عندنا هو الشكل السداسي، والشكل اللي جنبه هو المستطيل. عايزين نعرف هو الشكل السداسي والمستطيل مختلفان؛ لأن … هنشوف كل واحد من الشكلين دول عدد الأضلاع اللي فيه كام وعدد الرؤوس. هنبتدي بالسداسي: واحد، اتنين، تلاتة، أربعة، خمسة، ستة. يبقى الشكل السداسي له ستة أضلاع. طيب عنده كام رأس؟ واحد، اتنين، تلاتة، أربعة، خمسة، ستة. يبقى وستة رؤوس. يبقى الشكل السداسي له ستة أضلاع وستة رؤوس.

هنعدّ مع بعض أضلاع المستطيل: واحد، اتنين، تلاتة، أربعة. يبقى المستطيل له أربعة أضلاع. عنده كام رأس؟ واحد، اتنين، تلاتة، أربعة. يبقى وأربعة رؤوس. يبقى الفرق بينهم إن الشكل السداسي، وده باين من اسمه، عنده ست أضلاع وست رؤوس. وإن الشكل المستطيل له أربعة أضلاع وأربعة رؤوس.

هنجيب صفحة جديدة ونكمّل مع بعض مجموعة أخرى من التمارين.

لو مُعطى عندنا هرم ومخروط، ومطلوب منّنا نعرف الهرم والمخروط شكلين مختلفين لأن … إيه أوجُه الاختلاف بينهم؟

هنشوف عدد الأحرف وعدد الرؤوس اللي في كل منهم. ممكن نرسم الهرم بالشكل اللي قدامنا ده؛ عشان يساعدنا أكتر على عدّ الأحرف والرؤوس. ونبتدي نعدّ: واحد، اتنين، تلاتة، أربعة، خمسة، ستة، سبعة، تمنية. يبقى عنده تمن أحرُف. هنبتدي نعدّ الرؤوس:، واحد، اتنين، تلاتة، أربعة، خمسة. يبقى هنقول إن الهرم له تمن أحرُف وخمس رؤوس. أما المخروط فليس له أحرُف وله رأس واحدة. يبقى الهرم له تمن أحرُف وخمس رؤوس، أما المخروط فله رأس واحدة وليس له أحرُف.

أما آخر تدريب عندنا فمطلوب منّنا نعرف إن متوازي الأضلاع وشبه المنحرف، إيه أوجُه التشابه اللي بينهم. همّ متشابهان لأن … هنبتدي نشوف عدد الأضلاع والرؤوس في كل منهم.

هنلاقي إن شبه المنحرف به أربع أضلاع وأربع رؤوس. ومتوازي الأضلاع به أربع أضلاع وأربع رؤوس. يعني نقدر نستنتج إن وجه التشابه اللي بينهم إن كل من الشكلين فيه أربع أضلاع وأربع رؤوس.

عرفنا إزّاي نقدر نقارن بين شكلين مستويين، أو بين مجسمين بِناء على عدد الأضلاع والرؤوس في الأشكال المستوية وعدد الأحرف والرؤوس في الأشكال المجسمة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.