فيديو: تحويل الأطوال من الياردات إلى الأقدام

كم ياردةً في ٤٧ قدمًا؟

٠٢:٥٧

‏نسخة الفيديو النصية

كم ياردة في سبعة وأربعين قدمًا؟

دلوقتي عايزين نشوف العلاقة اللي بتربط بين الوحدتين اللي عندنا؛ الياردة، والقدم. الياردة الواحدة بتساوي تلات أقدام. يعني زيّ ما إحنا شايفين في الشكل اللي قدّامنا. لو عندنا تلات أقدام، هنلاقي إن الطول بتاعهم مع بعض بيكوّن واحد ياردة. إحنا في السؤال معطى عندنا الطول بالأقدام، عندنا سبعة وأربعين قدم. عشان نقدر نعرف السبعة وأربعين قدم دول بيمثّلوا قدّ إيه من الياردات، كل تلاتة منهم زيّ ما إحنا عارفين، هيمثّلوا ياردة واحدة.

يبقى هنقسم سبعة وأربعين على تلاتة؛ عشان نقدر نوصل لعدد الياردات اللي بيكافئه سبعة وأربعين قدم. يبقى لمّا بنحوّل من القدم إلى الياردة، بنقسم على تلاتة. والعكس لو بنحوّل من الياردة إلى القدم، فيبقى هنضرب في تلاتة. دلوقتي هنشوف السبعة وأربعين قدم بيمثّلوا كام ياردة، هيبقى بيساووا سبعة وأربعين على تلاتة.

هنقسم، هنبتدي نقسم الأربعة على التلاتة هيساوي واحد. بعد كده نضرب واحد في تلاتة، فيبقى حاصل الضرب تلاتة. وبعد كده نطرح، أربعة ناقص تلاتة يساوي واحد. هننزّل بعد كده الرقم اللي عليه الدور، اللي هو سبعة. وبعدين نقسم سبعتاشر على تلاتة. إيه العدد اللي لو ضربناه في تلاتة يدّينا أقرب ناتج للسبعتاشر؟ ممكن يبقى أقل من السبعتاشر شوية، بس ما ينفعش يبقى أكتر منه.

نفتكر في جدول الضرب إن حاصل ضرب تلاتة في تلاتة بيساوي تسعة. وتلاتة في أربعة بيساوي اتناشر. وتلاتة في خمسة بيساوي خمستاشر. تلاتة في ستة يساوي تمنتاشر. لأ كده التمنتاشر أكبر من السبعتاشر، فهيبقى هو تلاتة في خمسة. يبقى سبعتاشر لمّا نقسمها على التلاتة، أقرب عدد يدّيني حاصل ضرب قريب من العدد ده هو الخمسة. وبعد كده نضرب خمسة في تلاتة، ونحطّ حاصل الضرب هنا، يبقى خمستاشر. بعد كده نطرح، سبعتاشر ناقص خمستاشر يبقى اتنين.

دلوقتي مش هينفع لو قسمنا اتنين على تلاتة، يبقى فيه عدد صحيح لمّا نضربه في تلاتة يدّينا اتنين؛ عشان الاتنين أقل من تلاتة. فهنوقف القسمة على كده، ويبقى عندنا خارج عملية القسمة هو العدد خمستاشر، هنكتبه كده. وعندنا باقي قسمة اللي هو اتنين. هنعمله على شكل عدد كسري؛ الجزء الصحيح فيه خمستاشر، واتنين على تلاتة ده الجزء الكسري اللي فيه. هتبقى الإجابة خمستاشر واتنين على تلاتة ياردة. يبقى سبعة وأربعين قدم، بتكافئ خمستاشر واتنين على تلاتة ياردة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.