فيديو: طرح الأعداد المكونة من ثلاثة أرقام مع إعادة التجميع

يوضح الفيديو طريقة إعادة تجميع العشرات والمئات لطرح الأعداد المكوَّنة من ثلاثة أرقام.

٠٦:٠٥

‏نسخة الفيديو النصية

هنتكلّم عن طرح الأعداد المكوّنة من تلات أرقام مع إعادة التجميع. هنتعلّم إزّاي نعيد تجميع العشرات والمئات عشان نطرح الأعداد المكوّنة من تلات أرقام. هنستعمل النماذج.

هبتدي الشرح بالمثال التالي. مثال: أوجد ناتج طرح ستمية اتنين وخمسين ناقص ربعمية تسعة وعشرين.

الخطوة الأولى هرسم نموذج للعدد الأولاني ستمية اتنين وخمسين. هبتدي بطرح الآحاد. تسع آحاد مش هينفع أطرحها من اتنين آحاد. عشان كده هعيد تجميع واحد عشرات إلى عشر آحاد، زي ما هو موضح قدامي في النموذج. دلوقتي بقى عدد الآحاد اتنين آحاد زائد عشر آحاد يعني اتناشر آحاد. والعشرات أربع عشرات. هبتدي بطرح الآحاد. اتناشر آحاد ناقص تسع آحاد هيساوي تلات آحاد. زي ما هو موضح قدامي في النموذج.

خطوة رقم اتنين هنطرح العشرات. أربع عشرات ناقص اتنين عشرات، هيتبقّى عندي اتنين عشرات زي ما هو موضح قدامي في النموذج.

هنكمّل في الصفحة اللي جايّة.

خطوة رقم تلاتة: هنطرح المئات. ست مئات ناقص أربع مئات هيساوي اتنين مئات، زي ما هو موضح قدامي في النموذج. وبكده أقدر أقول إن ستمية اتنين وخمسين ناقص ربعمية تسعة وعشرين، هيساوي ميتين تلاتة وعشرين.

هنكمّل في الصفحة اللي جايّة.

مثال: أوجد ناتج طرح خمسمية ستة وأربعين ناقص سبعتاشر.

الخطوة الأولى: هرسم نموذج للعدد الأولاني خمسمية ستة وأربعين. هبتدي بطرح الآحاد. هنلاحظ إنه مش هينفع أطرح سبع آحاد من ست آحاد. عشان كده هعيد تجميع واحد عشرات إلى عشر آحاد، زي ما هو موضح قدامي في النموذج. دلوقتي الآحاد بقى عددها ستاشر آحاد، والعشرات تلات عشرات. دلوقتي أقدر أطرح ستاشر آحاد ناقص سبع آحاد، هيساوي تسع آحاد، زي ما موضح قدامي في النموذج.

خطوة رقم اتنين: هنطرح العشرات. تلات عشرات ناقص واحد عشرات هيساوي اتنين عشرات.

خطوة رقم تلاتة: هنطرح المئات. خمس مئات ناقص صفر مئات هيساوي خمس مئات. وبكده أقدر أقول إن خمسمية ستة وأربعين ناقص سبعتاشر هيساوي خمسمية تسعة وعشرين.

هنكمّل في الصفحة اللي جايّة.

دلوقتي هنتكلّم عن الطرح مع إعادة تجميع المئات. هناخد مثال: أوجد ناتج طرح خمسمية تسعة وتلاتين ناقص ميتين خمسة وتمانين.

الخطوة الأولى: هرسم نموذج للعدد الأولاني خمسمية تسعة وتلاتين، زي ما هو موضح قدامي. وبعدين هكتب العددين تحت بعض: خمسمية تسعة وتلاتين ناقص ميتين خمسة وتمانين.

هبتدي بطرح الآحاد. تسع آحاد ناقص خمس آحاد؛ يعني هشطب على خمس آحاد، هيتبقّى عندي أربع آحاد.

خطوة رقم اتنين هنطرح العشرات. هنلاحظ إنه مش هينفع نطرح تمَن عشرات من تلات عشرات. عشان كده هنعيد تجميع واحد مئات إلى عشر عشرات، زي ما هو موضح قدامي في النموذج. دلوقتي بقى عدد العشرات تلتاشر عشرة، والمئات أربع مئات. دلوقتي أقدر أطرح تلتاشر عشرة ناقص تمن عشرات، هيتبقّى عندي خمس عشرات.

خطوة رقم تلاتة هنطرح المئات. أربع مئات ناقص اتنين مئات؛ يعني هشطب على اتنين مئات. هيتبقّى عندي اتنين مئات. وبكده أقدر أقول إن خمسمية تسعة وتلاتين ناقص ميتين خمسة وتمانين، هيساوي ميتين أربعة وخمسين.

هنكمّل في الصفحة اللي جايّة.

مثال: أوجد ناتج طرح خمسمية تمنية وستين ناقص مية تسعة وتسعين.

في البداية هرسم نموذج للعدد الأولاني خمسمية تمنية وستين، زي ما هو موضح قدامي. بعدين هبتدي بطرح الآحاد. هلاحظ إنه مش هينفع أطرح تسع آحاد من تمن آحاد. عشان كده هعيد تجميع واحد عشرات إلى عشر آحاد، زي ما هو موضح قدامي.

دلوقتي بقى عندي تمنتاشر آحاد وخمس عشرات. دلوقتي أقدر أطرح تمنتاشر آحاد ناقص تسع آحاد. هيتبقّى عندي تسع آحاد، زي ما هو موضح قدامي. بعد كده هنطرح العشرات. هنلاحظ إنه مش هينفع أطرح تسع عشرات من خمس عشرات. عشان كده هعيد تجميع واحد مئات إلى عشر عشرات، زي ما هو موضح في النموذج. دلوقتي بقى عدد العشرات خمس عشرات وعشر عشرات؛ يعني خمستاشر عشرة، والمئات أربع مئات. هطرح خمستاشر عشرة ناقص تسع عشرات، هيتبقّى عندي ست عشرات، زي ما هو موضح قدامي في النموذج.

وأخيرًا هطرح المئات، أربع مئات ناقص واحد مئات، هيتبقّى عندي تلات مئات. وبكده أقدر أقول إن خمسمية تمنية وستين ناقص مية تسعة وتسعين هيساوي تلتمية تسعة وستين.

وبكده هنكون اتعلّمنا إزّاي نطرح الأعداد المكوَّنة من تلات أرقام مع إعادة تجميع العشرات والمئات.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.