تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: مقارنة الأعداد الصحيحة

سوزان فائق

يوضح الفيديو الفرق بين المعادلة والمتباينة، ومقارنة الأعداد الصحيحة باستخدام خط الأعداد والقيمة المكانية.

٠٦:١٩

‏نسخة الفيديو النصية

في الفيديو ده هنتكلّم عن مقارنة الأعداد الصحيحة. مقارنة الأعداد بيبقى عندنا العددين؛ يا إمّا يساووا بعض، يا إمّا لا يساووا بعض. في التساوي، بنرمز له بعلامة اليساوي. ودي بنسميها عندنا معادلة. لو كان لا يساوي، بيبقى يا إمّا أكبر من، أو أصغر من. وفي الحالة دي بنسميها متباينة. علشان نقارن بين الأعداد الصحيحة، بنستخدم طريقتين. الأولانية هي خط الأعداد، والتانية القيمة المكانية.

في خط الأعداد، بنرسم الخط بالشكل ده. أعداد على مسافات متساوية. لو عايز يشوف الرقم ميتين وتسعة، عايز يقارنه ما بينه وما بين الميتين وعشرة. في خط الأعداد، الأعداد اللي على اليمين دي، بتبقى أكبر من اللي على الشمال. لأن إحنا بنطلع من ميتين وتمنية؛ نروح لميتين وعشرة، ميتين واتناشر، ميتين وأربعتاشر. بنزيد، يعني اللي عَ اليمين ده بيبقى أكبر واحد، واللي عَ الشمال بيبقى أصغر واحد.

طيب في الميتين وتسعة، دي مكانها فين؟ هتبقى ما بين الميتين وتمنية، للميتين وعشرة. وهتبقى هنا كده. هتبقى ميتين وتسعة. لمّا هنقارنها بميتين وعشرة، هنقول إن الميتين وتسعة تبقى أصغر من الميتين والعشرة. لأن الميتين والعشرة على يمينها، أكبر منها.

الطريقة التانية هي استخدام القيمة المكانية. بنرتّب الأرقام اللي جوّه العدد، في خانات. عندنا مثلًا عددين: سبعة آلاف ستمية سبعة وسبعين، وعدد تاني سبعة آلاف ربعمية اتنين وأربعين. عايزين نقارن ما بينهم. نقارن إزّاي، باستخدام القيمة المكانية؟

العدد ده بيكوَّن من أربع أرقام. والعدد ده بيكوَّن من أربع أرقام. بنرتّبهم تحت بعض. كل رقم تحتيه الرقم اللي زيّه بالظبط، في نفس الخانة بتاعته. وبنبدأ من أقصى الشمال، ونقارن. نشوف الرقم سبعة، والرقم سبعة، في العددين متساوي. يبقى معنى كده إن هتنزل للخانة اللي تحتها على طول.

الخانة اللي تحتها اللي هي الستة والأربعة. دي اللي بتمثّل عندي المئات. لأن الأولانية دي آحاد، عشرات، مئات، ألوف. فالمئات هتبقى دي ستة، ودي أربعة. مين أكبر؛ الستة ولّا الأربعة؟ هنلاقي إن الستة أكبر. يبقى معنى كده إن العدد سبعة آلاف ستمية سبعة وسبعين، أكبر من سبعة آلاف ربعمية اتنين وأربعين. أكبر من سبعة آلاف ربعمية اتنين وأربعين.

يبقى المقارنة عملناها إزّاي؟ نرتّب العددين تحت بعض. كل رقم تحتيه الرقم المقابل له، نفس الخانة بتاعته. وناخد أول خانة عَ الشمال. نشوف الرقمين اللي فيها دول متساويين مع بعض، يبقى هننزل للخانة اللي تحتها. لو كان فيه واحد أكبر من التاني، يبقى معنى كده إن العدد بتاعها هو اللي كبير. هننزل للخانة اللي تحتها لقيناهم متساويين. هننزل للخانة اللي تحتها، هنلاقيهم متساويين. ننزل لأقصى خانة، هنلاقيها أكبر من أو أصغر من. يبقى معنى كده إن العدد ده أكبر من العدد التاني.

نقلب الصفحة وناخد مثال عَ الكلام ده. بيقول لنا استخدم خط الأعداد، للمقارنة بين الأعداد الآتية … ألف وتسعمية، وألف وستمية. أربعة آلاف خمسمية وعشرة، وخمسة آلاف خمسمية وعشرة. تسعمية اتنين وتمانين، وأربعة آلاف ستمية وتمنتاشر.

هنرسم خط الأعداد بالشكل التالي. هنسكّن الأعداد اللي عندنا على خط الأعداد. اللي هي ألف وتسعمية، وألف وستمية. هنشوف مكان ألف وتسعمية فين، هنلاقيها ما بين الألف وخمسمية للألفين. وهي أقرب شوية للألفين. والألف وستمية، هنلاقيها أكبر شوية من الألف وخمسمية. الألف وتسعمية على يمين الألف وستمية. معنى كده إنها أكبر من.

نشوف العدد اللي بعده. أربعة آلاف خمسمية وعشرة. الأربعة آلاف خمسمية وعشرة بتقع ما بين الأربعة آلاف وخمسمية للخمسة آلاف. وهنلاقيها أكبر من الأربعة آلاف وخمسمية بشوية. والعدد التاني خمسة آلاف خمسمية وعشرة. يبقى هو ما بعد خمسة آلاف وخمسمية، بعديها بشويّة. يبقى كده الخمسة آلاف خمسمية وعشرة، على يمين الأربعة آلاف خمسمية وعشرة. يبقى الخمسة آلاف خمسمية وعشرة، أكبر من أربعة آلاف خمسمية وعشرة. يبقى معنى كده إن أربعة آلاف خمسمية وعشرة، أصغر من خمسة آلاف خمسمية وعشرة.

تسعمية اتنين وتمانين مكانها قبل الألف بشوية. والأربعة آلاف ستمية وتمنتاشر بعد الأربعة آلاف وخمسمية، وقبل الخمسة آلاف. يبقى كده الأربعة آلاف ستمية وتمنتاشر، على يمين التسعمية اتنين وتمانين. يبقى التسعمية اتنين وتمانين، أصغر من أربعة آلاف ستمية وتمنتاشر.

نقلب الصفحة وناخد مثال كمان. عايزين نقارن بين العددين دول، باستخدام القيمة المكانية. العددين دول هنحطّ كل خانة، تحتها الخانة المقابلة لها على طول، في كل عدد. هنقارن من أقصى الشمال. هنلاقي إن التلاتة تساوي التلاتة، هننزل للخانة اللي بعدها. تبقى الخمسة والستة. يبقى الستة أكبر. يبقى معنى كده إن العدد تلتمية أربعة وستين ألف ميتين وخمسين، أكبر من تلتمية ستة وخمسين ألف تلتمية وخمسين.

يبقى كده عرفنا إزّاي نقارن ما بين الأعداد الصحيحة، في الفيديو ده.