فيديو: الضرب في ٨

يوضح الفيديو كيفية إيجاد حاصل الضرب في العدد ٨ باستخدام الشبكة المصفوفة أوطريقة الجمع المتكرر أو العد المتقطع، وكيفية إيجاد عامل الضرب المجهول في جملة الضرب، مع أمثلة توضيحية.

٠٩:٢٦

‏نسخة الفيديو النصية

هنعرف في الفيديو ده إزاي نقدر نوجد حاصل الضرب في العدد تمنية بطرق مختلفة.

في أحد المزارع كان يوجد ست أشجار، كل شجرة عليها تمن تفاحات. مطلوب مننا نعرف عدد التفاح على الأشجار كلها.

يبقى هنحاول نكتب دلوقتي جملة الضرب اللي تحل المسألة دي. إحنا عايزين نعرف عدد التفاح الكلي اللي موجود على ست أشجار. كل شجرة عليها تمن تفاحات. يبقى عايزين نوجد حاصل ضرب ستة في تمنية. ست أشجار في تمن تفاحات على كل شجرة، حاصل الضرب هيمثّل عدد التفاح كله.

ونقدر نوجد حاصل الضرب المطلوب ده بأكتر من طريقة.

هنبتدي دلوقتي نرسم شبكة نوجد بيها حاصل الضرب المطلوب.

هنرسم شبكة بتتكوّن من ست صفوف، وتمن أعمدة؛ عشان تمثّل جملة الضرب ستة في تمنية. عدد المربعات اللي جوه الشبكة ده بيمثّل حاصل الضرب. هنلاقي إن عدد المربعات ده هيبقى تمنية وأربعين. ده معناها إننا قدرنا نوجد حاصل ضرب ستة في تمنية، وهيطلع تمنية وأربعين، اللي هيمثل عدد التفاح اللي على الأشجار اللي عندنا كلها.

فيه ملاحظة مهمة عايزين ناخد بالنا منها، إحنا نقدر نوجد حاصل الضرب ده باستخدام نموذج بيتكوّن من تمن صفوف وست أعمدة. ولو عدينا عدد المربعات اللي بيتكوّن منها النموذج ده، واللي بيمثل حاصل ضرب تمنية في ستة، هيطلعوا برضو تمنية وأربعين مربع. وده معناه إن حاصل ضرب تمنية في ستة، هو نفسه حاصل ضرب ستة في تمنية. ودي خاصية مهمة من خواص الضرب، بنسميها خاصية الإبدال؛ يعني العاملين أو العددين اللي بيتم ضربهم في بعض، هيدونا نفس الناتج أيًّا كان الترتيب اللي بيتم ضربهم بيه. ستة في تمنية، أو تمنية في ستة؛ حاصل الضرب هيفضل هو نفسه تمنية وأربعين.

ونقدر نستخدم طريقة أخرى لإيجاد حاصل الضرب باستخدام عملية الجمع المتكرر. يعني إحنا عندنا ست أشجار. كل شجرة فيها تمن تفاحات. يبقى لو عايزين نوجد عدد التفاح كله، هنجمع عدد التفاح اللي في كل شجرة بعدد مرات الأشجار؛ تمنية، زائد تمنية، زائد تمنية، زائد تمنية، كده أربع أشجار، زائد تمنية، زائد تمنية؛ كده جمعنا التفاح اللي موجود على ستة من الأشجار.

هنلاقي إن ناتج الجمع عندنا هيبقى تمنية وأربعين. يعني كده هو فعلًا ده حاصل ضرب العدد ستة في تمنية، أو تمنية في ستة؛ عشان زي ما قلنا خاصية الإبدال بتخلي عملية الترتيب بين العددين اللي بيتم ضربهم بتدينا نفس الناتج، مش هيفرق. فدي بنسميها خاصية الإبدال في الضرب.

هنشوف المثال اللي قدامنا ده: أحمد عنده أربع قمصان، كل قميص منهم يحتوي على تمن أزرار، مطلوب مننا نعرف عدد الأزرار اللي موجودة كلها في القمصان الأربعة.

هنشوف جملة الضرب اللي هنستخدمها عشان نوجد عدد الأزرار الكلي. هنضرب عدد القمصان اللي عندنا اللي هو أربعة، في عدد الأزرار في كل قميص اللي هو تمنية، حاصل الضرب هيمثّل عدد الأزرار كلها اللي موجودة في القمصان كلها.

ناخد بالنا من خاصية الإبدال في الضرب، إن حاصل ضرب أربعة في تمنية، هو نفسه بيساوي حاصل ضرب تمنية في أربعة. يعني لمّا نيجي نستخدم النماذج في إيجاد حاصل الضرب، نقدر نستخدم أربع مجموعات، كل مجموعة بتتكوّن من تمن قطع عَدّ أو تمن مجموعات كل مجموعة بتتكون من أربع قطع عَدّ؛ الحالتين هيدونا نفس حاصل الضرب.

نقدر نستخدم النماذج لإيجاد حاصل ضرب أربعة في تمنية. هنستخدم أربع صفوف من قطع العَدّ بيمثلوا الأربع قمصان اللي موجودين، وكل صف هيتكوّن من تمن قطع عَدّ، اللي بيمثّلوا عدد الأزرار في كل قميص.

لو عدينا قطع العد اللي استخدمناها كلها، هنلاقيهم اتنين وتلاتين قطعة عَدّ، وعددهم ده بيمثّل حاصل ضرب أربعة في تمنية؛ يبقى قدرنا نوجد حاصل ضرب أربعة في تمنية، اللي هو هيبقى اتنين وتلاتين، و اللي بيمثّل عدد الأزرار الموجودة في الأربع قمصان كلهم.

نقدر نوجد حاصل الضرب بطريقة تانية. بطريقة مثلًا الجمع المتكرر؛ يعني هنجمع تمن أزرار اللي في القميص الأول، زائد تمن أزرار اللي في القميص التاني، زائد تمن أزرار اللي في القميص التالت، زائد تمن أزرار اللي في القميص الرابع. يعني محتاجين نجمع أربع مجموعات من التمنية. يبقى تمنية، زائد تمنية، زائد تمنية زائد، تمنية. ناتج الجمع هيبقى اتنين وتلاتين. هو هو نفسه حاصل الضرب. يبقى كده قدرنا نستنتج عدد الأزرار كلها، إنه هيطلع اتنين وتلاتين زرار.

هنشوف دلوقتي من خلال المثال اللي جاي، إزاي نقدر نوجد عامل مجهول في جملة الضرب.

عايزين نوجد العامل المجهول في جملة الضرب دي: تمنية في عدد ما إحنا محتاجين نعرفه، حاصل الضرب هيساوي ستة وخمسين.

نقدر نوجد الإجابة باستخدام النماذج. هنعتبر إن عندنا ستة وخمسين قطعة عَدّ، عايزين نرتّبهم في مجموعة من تمن صفوف، ونشوف كل صف هيبقى فيه كام قطعة عَدّ، وعدد القطع اللي في كل صف هيمثّل العامل المجهول في جملة الضرب اللي عندنا. هنبدأ نوزع قطع العَدّ اللي عندنا على تمن صفوف. وبعدين نوزع تمن قطع عَدّ تانيين على التمن صفوف برضو؛ فكده هيبقى استخدمنا لغاية دلوقتي ستاشر قطعة عَدّ. وكمان تمن قطع عَدّ تانيين على التمن صفوف اللي عندنا، بقى عندنا كده أربعة وعشرين قطعة عَدّ. ونفضل نوزع قِطع العَدّ اللي عندنا على التمن صفوف، لغاية ما نخلص الستة وخمسين قطعة عَدّ اللي عندنا، هنلاحظ … هنلاحظ إننا رصّينا أو رتبنا قطع العد في تمن صفوف، ولقينا بعد توزيع الستة وخمسين قطعة إن كل صف هيتكون من سبعة قطع عَدّ. يعني كده قدرنا نعرف إن حاصل ضرب تمنية في سبعة هيبقى بيساوي ستة وخمسين. وباستخدام الطريقة دي قدرنا نوجد العامل المجهول في جملة الضرب اللي عندنا.

في المثال اللي عندنا ده هنعرف إن فيه سيدة اشترت تلات أكياس من التفاح، وزن الكيس الواحد كان تمن كيلوجرامات. مطلوب مننا نعرف عدد الكيلوجرامات من التفاح اللي اشترتها هذه السيدة.

دلوقتي إحنا عندنا تلات أكياس من التفاح، كل كيس وزنه تمنية كيلوجرام. عايزين نقدر نعرف عدد الكيلوجرامات اللي اشترتهم السيدة اللي موجودين في التلاتة أكياس مع بعض. يعني محتاجين نوجد حاصل ضرب تلاتة اللي هو عدد الأكياس، في تمنية اللي هو عدد الكيلوجرامات في كل كيس. عشان نقدر نعرف عدد الكيلوجرامات اللي في الأكياس كلها.

نقدر نوجد حاصل الضرب ده باستخدام عملية الجمع المتكرر. يعني إحنا عندنا تمن كيلوجرامات في الكيس الأول، زائد تمن كيلوجرامات في الكيس التاني، زائد تمن كيلوجرامات في الكيس التالت. فيبقى ناتج الجمع هيبقى أربعة وعشرين. وناتج الجمع ده هو نفسه حاصل ضرب تلاتة في تمنية. يبقى كده قدرنا نستنتج إنه حاصل ضرب تلاتة في تمنية هيساوي أربعة وعشرين.

نقدر نوجد حاصل الضرب بطريقة تانية. دلوقتي ممكن نستخدم طريقة العَدّ المتقطع لإيجاد حاصل الضرب. إحنا عايزين نوجد حاصل ضرب تلاتة في تمنية. معناها إن إحنا هنعمل تلات قفزات متساوية على خط الأعداد، القفزة الوحدة مقدارها تمنية. يبقى على خط الأعداد هنعمل تلات قفزات متساوية، كل قفزة مقدارها تمن عَدّات.

هنشوف آخر عدد وقفنا عنده بعد التلات قفزات، هنلاقينا وقفنا عند العدد أربعة وعشرين. ده معناها إن حاصل ضرب تلاتة في تمنية هيساوي أربعة وعشرين. وبكده قدرنا نوجد حاصل الضرب باستخدام طريقة العَدّ المتقطع.

عرفنا في الفيديو ده إزاي نقدر نوجد ناتج الضرب في العدد تمنية باستخدام طرق مختلفة؛ زي طريقة العد المتقطع، أو باستخدام النماذج، أو الجمع المتكرر، أو باستخدام الشبكة، اللي بنرسمها بحيث إنها بتتكوّن من عدد من الصفوف، وعدد من الأعمدة. وعدد الصفوف وعدد الأعمدة بيمثلوا العاملين أو العددين اللي بيتم ضربهم في جملة الضرب. وعرفنا كمان إزاي نقدر نوجد عامل مجهول في جملة الضرب باستخدام قطع العَدّ أو باستخدام النماذج.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.