تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: القطاعات الدائرية

أحمد مدحت

يوضح الفيديو القطاعات الدائرية، وكيفية تمثيل البيانات بالقطاعات الدائرية، وتمثيل بيانات معطاة في مدرج تكراري بالقطاعات الدائرية، وتفسير البيانات وتحليلها.

٠٦:٣٣

‏نسخة الفيديو النصية

هنتكلم عن القطاعات الدائرية. في الفيديو ده هنعرف إيه هي القطاعات الدائرية، وكمان إزاي نمثل البيانات بالقطاعات الدائرية، وإزاي نمثل بيانات مُعطاة في مدرج تكراري بالقطاعات الدائرية، وهنعرف كمان إزاي نفسر البيانات ونحللها لو مُعطاة في قطاعات دائرية.

بالنسبة للقطاعات الدائرية، فإحنا بنستخدمها علشان نقارن أجزاء من البيانات بمجموعة البيانات كلها، فبيبقى عندنا دايرة بتمثل كل البيانات ومتقسمة لقطاعات، وبيكون مجموع النسب المئوية للقطاعات الدائرية دي مية في المية. هنبدأ نشوف إزاي نمثل النسب المئوية بالقطاعات الدائرية من خلال مثال.

عندنا في المثال جدول بيوضح إحصائية اتعملت عن الألعاب المفضلة لمجموعة من الطلاب، والمطلوب إن إحنا نمثل البيانات اللي في الجدول ده بالقطاعات الدائرية.

بالنسبة لأول خطوة، فإحنا عندنا الدايرة بتتكون من تلتمية وستين درجة، فلما هنضرب النسب المئوية بعد ما نحولها لأعداد عشرية في تلتمية وستين درجة، هنحصل على قياس زاوية كل قطاع من قطاعات الدايرة.

فهنبدأ نوجد قياس زاوية كل قطاع من قطاعات الدايرة زي ما هيظهر لنا. فهنلاقي قياس زاوية القطاع الخاص بكُرة القدم هيبقى حوالي تقريبًا ميتين تلاتة وستين درجة، وهيبقى قياس زاوية القطاع الخاص بكُرة اليد هو ستة وتلاتين درجة، وبالنسبة للكرة الطائرة فهيبقى ستة وتلاتين درجة، أما بالنسبة للسباحة فهيبقى حوالي تقريبًا أربعتاشر درجة، وبالنسبة للألعاب الأخرى فهيبقى حوالي تقريبًا حداشر درجة. هنلاحظ إن مجموع قياسات زوايا القطاعات الدائرية اللي عندنا يساوي تلتمية وستين درجة.

تاني خطوة هنستخدم البرجل علشان نرسم دايرة، وبعد كده هنرسم نصف قطر الدايرة دي، وبعد ما هنرسم الدايرة ونص قطرها هنستخدم المنقلة علشان نرسم زاوية قياسها حداشر درجة. بالنسبة للقطاع اللي إحنا رسمناه فهو بيمثل الألعاب الأخرى، بعد كده هنستخدم نص القطر الجديد علشان نرسم الزاوية اللي بعدها، وهنكرر الخطوة دي لباقي الزوايا اللي عندنا، فهنكمل الشكل زي ما هيظهر لنا، وبكده بعد ما رسمنا كل الزوايا هنبدأ نسمي كل قطاع عندنا.

بعد كده هنكتب عنوان مناسب للرسم اللي عندنا، وبكده يبقى إحنا قدرنا نمثل البيانات اللي كانت موجودة في الجدول اللي عندنا بالقطاعات الدائرية. بعد كده هنشوف إزاي نمثل بيانات مُعطاة في مدرج تكراري بالقطاعات الدائرية من خلال مثال.

عندنا في المثال مدرج تكراري وعايزين نمثل البيانات اللي في المدرج التكراري ده بالقطاعات الدائرية. بالنسبة للمدرج التكراري اللي عندنا فهو خاص بدورة الألعاب الأوليمبية الشتوية لعام ألفين وستة، بالنسبة للمحور الأفقي فهو بيمثل عدد الميداليات، واللي متقسّم لفترات، أما المحور الرأسي فهو بيمثل عدد الدول. بالنسبة لأول خطوة هنعملها هنوجد العدد الكلي للدول، والعدد الكلي للدول هيساوي مجموع عدد الدول الخاص بكل فترة، يعني هيساوي اتناشر زائد تلاتة زائد خمسة زائد واحد زائد أربعة زائد واحد، يعني يساوي ستة وعشرين.

وتاني خطوة هنوجد النسب اللي بتقارن عدد الدول الخاصة بكل فترة بالعدد الكلي للدول، وهنقرب الناتج لأقرب جزء من مية، فهنلاقي النسبة بتاعة الفترة من واحد لخمسة تقريبًا ستة وأربعين من المية، والفترة من ستة لعشرة تقريبًا اتناشر من مية، والفترة من حداشر لخمستاشر تقريبًا تسعتاشر من مية، والفترة من ستاشر لعشرين تقريبًا أربعة من مية. أما النسبة بتاعة الفترة من واحد وعشرين لخمسة وعشرين فهي تقريبًا خمستاشر من مية، والنسبة بتاعة الفترة من ستة وعشرين لتلاتين تقريبًا أربعة من مية. بكده يبقى إحنا أوجدنا النسب.

في الخطوة التالتة هنستخدم النسب دي علشان نوجد قياس زاوية كل قطاع، وبعد كده هنقرب الناتج لأقرب درجة لو احتجنا لده. فهنوجد قياس زاوية كل قطاع زي ما هيظهر لنا. هنلاحظ إن إحنا ضربنا النسبة الخاصة بكل قطاع في تلتمية وستين درجة، وبعد كده قربنا الناتج لأقرب درجة. هنلاحظ كمان وإحنا بنوجد قياس زاوية القطاع الخاص بالفترة من حداشر لخمستاشر ميدالية قرّبنا تمنية وستين وأربعة من عشرة درجة إلى تسعة وستين درجة، وده علشان يبقى مجموع قياسات الزوايا لكل القطاعات اللي عندنا يساوي تلتمية وستين درجة. بكده يبقى إحنا أوجدنا قياسات زوايا القطاعات الدائرية.

فالخطوة الرابعة والأخيرة هنستخدم فيها البرجل والمنقلة علشان نرسم الدايرة والقطاعات الدائرية، وهنسمي كل قطاع، وكمان هنكتب عنوان مناسب للرسم، وهنكتب النسب في صورة نسب مئوية زي ما هيظهر لنا. بكده يبقى إحنا مثّلنا البيانات اللي موجودة في المدرج التكراري بالقطاعات الدائرية.

بعد كده هنشوف من خلال مثال إزاي لما يبقى عندنا بيانات ممثلة بالقطاعات الدائرية نفسرها ونحللها.

عندنا في المثال شكل، الشكل ده عبارة عن قطاعات دائرية، عنوان الشكل ده ساعات يوم مي، والمطلوب إننا نستخدم الشكل ده علشان نوصف كيف تمضي مي ساعات يومها كاملًا. لما هنرجع للشكل اللي عندنا هنلاقي إن عدد ساعات النوم في اليوم بالنسبة لِمَي بتمثله النسبة المئوية تلاتة وتلاتين وتلاتة من عشرة في المية، يعني تقريبًا تمن ساعات من ساعات اليوم، معنى كده إن مي بتنام يوميًّا تقريبًا تمن ساعات. أما عدد الساعات التي بتقضيها مي في المدرسة فبتمثل خمسة وعشرين في المية من ساعات اليوم، معنى كده إنها بتقضي رُبع يومها في المدرسة. وبالنسبة لعدد ساعات الترفيه فبتمثل اتناشر ونص في المية من ساعات اليوم، يعني مي بتقضي تلات ساعات من يومها في الترفيه. بعد كده هنلاحظ إن النسبة المئوية اللي بتمثل عدد الساعات التي بتقضيها مي في عمل نشاطات أخرى من اليوم، واللي هي اتناشر ونص في المية، هي نفس النسبة المئوية اللي بتمثل عدد ساعات الترفيه، معنى كده إنها بتقضي نفس الوقت، واللي هو تلات ساعات من اليوم، علشان تعمل نشاطات أخرى. بعد كده آخر حاجة، واللي هي الواجبات المنزلية، فهنلاقي إن عدد الساعات اللي بتقضيها مي في أداء واجباتها المنزلية بتمثل ستاشر وسبعة من عشرة في المية من ساعات يومها، يعني تقريبًا بتقضي أربع ساعات يوميًّا في أداء واجباتها المنزلية. بكده يبقى إحنا وصفنا إزاي مي بتقضي ساعات يومها بالكامل.

بكده يبقى إحنا في الفيديو ده عرفنا إن إحنا بنستخدم القطاعات الدائرية علشان نقارن أجزاء من البيانات بمجموعة البيانات كلها، فكان بيبقى عندنا دايرة بتمثل كل البيانات، وبيكون مجموع النسب المئوية في القطاعات الدائرية هو مية في المية، وعرفنا إزاي نمثل البيانات بالقطاعات الدائرية، وكمان عرفنا إزاي نمثل بيانات مُعطاة في مدرج تكراري بالقطاعات الدائرية، وإزاي نفسر البيانات ونحللها لو مُعطاة في قطاعات دائرية.