فيديو: اختيار مجموعتي بيانات بنفس المدى ومدى ربيعي مختلف

أيُّ مجموعتَي بيانات بهما نفس المدى، لكن المدى الربيعي مختلف؟ [أ] ٢١، ٢٢، ١٤، ٢٥، ٢٨، ٢٩ و٢٨، ٢٤، ١٩، ١٧، ١٥، ١٧ [ب] ٨، ١٢، ١٣، ٦، ٥، ٥ و٥، ١٣، ٥، ٨، ١٠، ١٠ [ج] ٨، ١٠، ٩، ١١، ٩، ١١ و٦، ٩، ٧، ١١، ٩، ١١ [د] ٢٦، ١٤، ٢١، ٢٦، ٢٣، ٢٣ و٣٠، ٢٣، ١٩، ١٥، ٢٤، ١٤

٠٥:٢٢

‏نسخة الفيديو النصية

أي مجموعتي بيانات بهما نفس المدى، لكن المدى الرُّبيعي مختلف؟

ومعطى عندنا أربع اختيارات، وكل اختيار بيتكون من مجموعتين من البيانات. فهنبدأ الأول نشوف الاختيار أ. وهنشوف مجموعتين البيانات اللي عندنا هنا. هل المجموعتين ليهم نفس المدى لكن المدى الرُّبيعي ليهم مختلف؟ فعلشان نعرف الكلام ده، أول حاجة هنعملها إننا هنرتب البيانات من الأصغر للأكبر. فلمّا نرتبهم من الأصغر للأكبر، هيبقى مجموعتين البيانات عندنا بالشكل ده. بعد كده عايزين نوجد المدى لمجموعتين البيانات اللي عندنا.

وخلينا في الأول نفتكر إن المدى هو الفرق بين أعلى قيمة وأقل قيمة للبيانات. فلمّا نيجي عند مجموعة البيانات الأولى، هنلاحظ إن المدى هو الفرق بين أعلى قيمة اللي هي تسعة وعشرين، وأقل قيمة اللي هي أربعتاشر. فلمّا نحسب تسعة وعشرين ناقص أربعتاشر هتبقى بتساوي خمستاشر. وبالتالي هيبقى المدى لمجموعة البيانات هو خمستاشر.

وبنفس الطريقة هنحسب المدى لمجموعة البيانات التانية؛ يعني هنوجد الفرق بين أعلى قيمة اللي هي تمنية وعشرين وأقل قيمة اللي هي خمستاشر. فلمّا نحسب تمنية وعشرين ناقص خمستاشر هتبقى بتساوي تلتاشر. وبالتالي هيبقى المدى لمجموعة البيانات التانية هو تلتاشر. لكن المطلوب مننا في السؤال إننا نحدد أنهي مجموعتين بيانات ليهم نفس المدى. بما إن المدى هنا خمستاشر وهنا المدى تلتاشر. فبالتالي هيبقى الاختيار أ هو اختيار خاطئ؛ لأن مجموعتين البيانات مالهمش نفس المدى.

بعد كده هنبدأ نشوف الاختيار ب. فهنلاحظ إن عندنا هنا مجموعتين البيانات دول. فهنبدأ في الأول نرتّبهم من الأصغر للأكبر. فلمّا نرتبهم من الأصغر للأكبر هيبقى مجموعتين البيانات عندنا بالشكل ده. وبنفس الطريقة هنوجد المدى للمجموعتين، وهنبدأ بالمجموعة الأولى، والمدى هو الفرق بين أعلى قيمة اللي هي تلتاشر وأقل قيمة اللي هي خمسة. فلمّا نحسب تلتاشر ناقص خمسة هتبقى بتساوي تمنية. وبالتالي هيبقى المدى لمجموعة البيانات الأولى هي تمنية.

وأما مجموعة البيانات التانية فهنوجد المدى ليها؛ يعني هنحسب تلتاشر ناقص خمسة، واللي هتساوي تمنية. ومن هنا هنلاحظ إن المدى لمجموعتين البيانات هو تمنية. يعني المجموعتين ليهم نفس المدى. فبالتالي يبقى مجموعتين البيانات اللي عندنا في الاختيار ب حققوا أول شرط، إن همّ ليهم نفس المدى.

بعد كده عايزين نشوف الشرط التاني؛ إن المدى الرُّبيعي للمجموعتين يكون مختلف. يعني في الأول عايزين نوجد المدى الرُّبيعي لمجموعتين البيانات اللي عندنا، وبعد كده نقارن بينهم. وخلينا نفتكر إن المدى الرُّبيعي هو الفرق بين الرُّبيع الأعلى والرُّبيع الأدنى للبيانات.

فعلشان نوجد المدى الرُّبيعي يبقى في الأول عايزين نوجد الرُّبيع الأعلى والرُّبيع الأدنى. والرُّبيع الأعلى هو وسيط النصف الأعلى من البيانات. فمعنى كده إننا هنقسم مجموعتين البيانات اللي عندنا إلى نصفين. بما إن عدد البيانات في المجموعتين زوجي وعددهم ستة. فبالتالي هيبقى هو ده النصف الأدنى من البيانات، وهو ده النصف الأعلى من البيانات. وبنفس الطريقة هيبقى ده النصف الأدنى، وده النصف الأعلى. فبالتالي هيبقى الرُّبيع الأدنى اللي هو وسيط النصف الأدنى من البيانات؛ يعني هنيجي عند النصف الأدنى ونحدد العدد الأوسط اللي هو خمسة. وأما الرُّبيع الأعلى فهو وسيط النصف الأعلى من البيانات؛ يعني هنيجي عند النصف الأعلى ونحدد الوسيط ليهم. وبما إن عددهم فردي اللي هو تلاتة، فيبقى الوسيط هو العدد الأوسط واللي هو اتناشر.

وبنفس الطريقة هنوجد الرُّبيع الأعلى والرُّبيع الأدنى للمجموعة التانية من البيانات. فيبقى عندنا في المجموعة التانية الرُّبيع الأدنى هو خمسة، والرُّبيع الأعلى هو عشرة. بعد كده هنوجد المدى الرُّبيعي وزي ما عرفنا إن المدى الرُّبيعي هو الفرق بين الرُّبيع الأعلى والرُّبيع الأدنى. فبالتالي علشان نوجد المدى الرُّبيعي للمجموعة الأولى يبقى هنوجد الفرق بين اتناشر وخمسة. فلمّا نحسب اتناشر ناقص خمسة هتبقى بتساوي سبعة. وبالتالي هيبقى المدى الرُّبيعي للمجموعة الأولى من البيانات هو سبعة.

وبنفس الطريقة هنوجد المدى الرُّبيعي للمجموعة التانية. فهنحسب الفرق بين عشرة وخمسة. يعني عشرة ناقص خمسة واللي هتساوي خمسة. وبالتالي هيبقى المدى الرُّبيعي للمجموعة التانية من البيانات هو خمسة. لكن بما إن عندنا المدى الرُّبيعي هنا سبعة والمدى الرُّبيعي هنا خمسة. فمعنى كده إن المدى الرُّبيعي في المجموعتين مختلف، وهو ده أصلًا الشرط اللي إحنا عايزين نحققه في السؤال؛ لأن عايزين نثبت إن المدى الرُّبيعي مختلف.

فبالتالي هيبقى مجموعتين البيانات اللي في الاختيار ب همّ الاتنين ليهم نفس المدى اللي هو تمنية. لكن المدى الرُّبيعي مختلف. فمعنى كده إن الاختيار ب اختيار صحيح. وبالتالي هيبقى الاختيار الصحيح هو الاختيار ب. مجموعتين البيانات: تمنية، واتناشر، وتلتاشر، وستة، وخمسة، وخمسة؛ وخمسة، وتلتاشر، وخمسة، وتمنية، وعشرة، وعشرة. وهتبقى هي دي إجابة السؤال.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.