فيديو: إيجاد المُعامِل المجهول في كثيرة الحدود بمعلومية أحد عواملها

أوجد قيمة ﺃ إذا كان ٦ﺱ^٤ + ﺃﺱ^٣ − ٣٠ﺱ^٢ − ٢١ﺱ + ١٠ مقسومًا على (٢ﺱ + ٥).

٠٤:١٤

‏نسخة الفيديو النصية

أوجد قيمة أ، إذا كان ستة س أُس أربعة، زائد أ س أُس تلاتة، ناقص تلاتين س تربيع، ناقص واحد وعشرين س، زائد عشرة. مقسومًا على اتنين س زائد خمسة.

المقدار: ستة س أُس أربعة، زائد أ س أُس تلاتة، ناقص تلاتين س أُس اتنين، ناقص واحد وعشرين س، زائد عشرة. مقسوم على المقدار: اتنين س زائد خمسة. يعني معنى كده إنه يقبل القسمة عليه. وعلشان نجيب قيمة أ، هنبتدي نقسم الحدّ اللي له أقل درجة في المقسوم، اللي هو عشرة. على الحدّ اللي له أقل درجة في المقسوم عليه، اللي هو خمسة. عشرة مقسوم على خمسة، بيساوي موجب اتنين.

وبعد كده نضرب اتنين في، اتنين س زائد خمسة. اتنين مضروبة في اتنين س، بيساوي أربعة س. واتنين مضروبة في خمسة، بيساوي عشرة. وبعد كده نطرح سالب واحد وعشرين س، ناقص أربعة س. هيدّينا سالب خمسة وعشرين س. وموجب عشرة ناقص عشرة، هيدّينا صفر.

وبعدين ننزّل الحدّ التالي، اللي هو سالب تلاتين س تربيع. ونبتدي نقسم الحدّ اللي له أقل درجة، المرة دي اللي هو سالب خمسة وعشرين س، على خمسة. سالب خمسة وعشرين س، مقسوم على خمسة، هتدّينا سالب خمسة س.

وبعد كده نضرب سالب خمسة س، في القوس كله؛ اتنين س زائد خمسة. سالب خمسة س مضروبة في اتنين س، سالب عشرة س تربيع. وسالب خمسة س مضروبة في خمسة، سالب خمسة وعشرين س. ونكتبها: سالب عشرة س تربيع، ناقص خمسة وعشرين س.

وبعد كده نطرح. الطرح هيحوّل الإشارات السالبة، إلى إشارات موجبة. وهيبقى سالب تلاتين س تربيع، زائد عشرة س تربيع، هيدّينا سالب عشرين س تربيع. وسالب خمسة وعشرين س، زائد خمسة وعشرين س، هيساوي صفر.

وبعدين ننزّل الحدّ اللي بعده، اللي هو أ س أُس تلاتة. ونقسم سالب عشرين س تربيع، على خمسة، هيدّينا سالب أربعة س تربيع. نضرب سالب أربعة س تربيع، في اتنين س زائد خمسة. سالب أربعة س تربيع، مضروبة في اتنين س، هيدّينا سالب تمنية س أُس تلاتة. وسالب أربعة س تربيع، مضروبة في خمسة، هتدّينا سالب عشرين س تربيع.

ونعمل عملية الطرح. الإشارات السالبة هتبقى موجبة. أ س تكعيب، زائد تمنية س تكعيب، هيدّينا أ زائد تمنية س تكعيب. أ س تكعيب، زائد تمنية س تكعيب، هيساوي أ زائد تمنية س تكعيب. وسالب عشرين س تربيع، زائد عشرين س تربيع، هيساوي صفر.

وننزّل آخر حدّ، اللي هو ستة س أُس أربعة. ولأن الحدّ اللي له الدرجة الأقل، اللي هو أ زائد تمنية س أُس تلاتة، المعامل بتاعه مجهول. هنقسم الحدّ اللي له الدرجة الأعلى، على الحدّ اللي له الدرجة الأعلى في المقسوم عليه. يعني هنقسم ستة س أُس أربعة، على اتنين س. هيبقى الناتج تلاتة س أُس تلاتة.

وبعد كده نضرب تلاتة س أُس تلاتة، في اتنين س زائد خمسة. هتدّينا ستة س أُس أربعة، زائد خمستاشر س تكعيب. ولمَّا نطرح، الناتج هيبقى صفر؛ لأن ما فيش باقي. وهيبقى أ زائد تمنية س أُس تلاتة، ناقص خمستاشر س أُس تلاتة، بيساوي صفر.

أ زائد تمنية ناقص خمستاشر، س أُس تلاتة، بيساوي صفر. أخدنا س أُس تلاتة، عامل مشترك. ولأن س متغيّر، يبقى أكيد المعامل هو اللي بيساوي الصفر. يعني أ زائد تمنية ناقص خمستاشر، هو اللي بيساوي الصفر. تمنية ناقص خمستاشر، بيساوي سالب سبعة. أ ناقص سبعة، بيساوي صفر. وهيبقى أ بيساوي سبعة. وهتبقى قيمة أ هي سبعة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.