تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: إيجاد القِيَم المحتملة لمعاملات الانحدار من شكل الانتشار

أحمد مدحت

نموذج انحدار خطي على الصورة ﺹ = ﺃ + ﺏﺱ يطابق البيانات الموضَّحة. أيُّ العبارات التالية صواب عن قيمتَيْ ﺃ، ﺏ في نموذج الانحدار المطابق؟ [أ] ﺏ < ٠، ﺃ = ٠ [ب] ﺏ < ٠، ﺃ > ٠ [ج] ﺏ > ٠، ﺃ < ٠ [د] ﺏ < ٠، ﺃ < ٠ [ﻫ] ﺏ > ٠، ﺃ > ٠

٠٢:٢٦

‏نسخة الفيديو النصية

عندنا في المثال نموذج انحدار خطّي على الصورة: ص تساوي أ زائد ب س، بيطابق البيانات الموضَّحة، وعندنا خمس اختيارات. عايزين نعرف أيّ العبارات التالية صواب عن قيمتي أ وَ ب في نموذج الانحدار المطابِق. بالنسبة للاختيار أ فهو: ب أقل من صفر وَ أ تساوي صفر. والاختيار ب فهو: ب أقل من صفر وَ أ أكبر من صفر. والاختيار ج هو: ب أكبر من صفر وَ أ أقل من صفر. والاختيار د هو: ب أقل من صفر وَ أ أقل من صفر. والاختيار ﻫ هو: ب أكبر من صفر وَ أ أكبر من صفر.

علشان نعرف أيّ العبارات صواب عن قيمتي أ وَ ب، هنرجع للشكل اللي عندنا. والشكل اللي عندنا بيوضّح إن فيه علاقة خطيّة بين متغيّرين هم ص وَ س. والعلاقة اللي عندنا هي ص تساوي أ زائد ب س. بالنسبة للمتغيّرين فهُم ص وَ س. أمّا أ فهي ثابت الانحدار، وبتُعتبر هي الجزء المقطوع من محور الصادات. أمّا ب فهي معامل انحدار ص على س، وبتعتبر هي ميل الخطّ المستقيم الموضّح عندنا في الشكل. وعلشان نحدّد أيّ العبارات التالية صواب عن قيمتي أ وَ ب، هنبدأ نحدّد هل قيمة كل من أ وَ ب أكبر من صفر، أو تساوي صفر، أو أقل من صفر.

فهنبدأ الأول نحدّد هل قيمة أ أكبر من صفر، أو أقل من صفر، أو تساوي صفر. بالنسبة لـ أ فهي ثابت الانحدار. وبالنسبة للمستقيم اللي موجود عندنا في الشكل، فهي هتمثّل الجزء المقطوع من محور الصادات أو المقطع الصادي. ومن خلال الشكل اللي عندنا، هنلاحظ إن الجزء المقطوع من محور الصادات هيكون سالب؛ يعني أقل من صفر. وده معناه إن قيمة ثابت الانحدار، واللي هو أ، هتبقى أقل من صفر. كده إحنا حدّدنا إن قيمة أ أقل من صفر.

بعد كده هنحدّد هل قيمة ب أكبر من صفر، أو أقل من صفر، أو تساوي صفر. بالنسبة لقيمة ب، فقيمتها بتساوي ميل المستقيم الموضّح عندنا في الشكل. وبالنسبة للمستقيم اللي عندنا، فهو بيكون لأعلى لمّا نتحرّك من الشمال لليمين. وده معناه إن ميل المستقيم موجب؛ يعني أكبر من صفر. معنى كده إن هتبقى قيمة معامل الانحدار ص على س، هتبقى أكبر من صفر؛ يعني هتبقى قيمة ب أكبر من صفر.

كده إحنا حدّدنا إن قيمة أ أقل من صفر، وقيمة ب أكبر من صفر. وده معناه إن هتبقى الإجابة الصحيحة هي: الاختيار ج.