فيديو: تحديد إذا ما كانت الكميتان متناسبتين

حدّد إذا ما كانت المقادير الآتية متناسبة: ٨٢٠ كالوري في ٥ وجبات طعام و٨٠٠ كالوري في ٤ وجبات طعام.

٠٢:٤١

‏نسخة الفيديو النصية

حدّد إذا ما كانت المقادير الآتية متناسبة: تمنمية وعشرين كالوري في خمس وجبات طعام. وتمنمية كالوري في أربع وجبات طعام.

وخلّينا في الأول نفتكر إن التناسب هو معادلة بتبيّن إن نسبتين أو معدَّلين متساويين. فعشان نحدّد إذا كانت المقادير اللي عندنا متناسبة ولّا لأ، يبقى هنقارن بين معدَّلات الوحدة للمقادير اللي عندنا. وأول حاجة هنعملها إننا هنكتب كل معدَّل في صورة كسر.

فلمّا نيجي نشوف أول مقدار عندنا، اللي هو تمنمية وعشرين كالوري في خمس وجبات طعام. فلمّا نكتبه في صورة كسر، هيبقى بالشكل ده: تمنمية وعشرين على خمسة. وبنفس الطريقة في المقدار التاني، اللي هو تمنمية كالوري في أربع وجبات طعام. لمّا نكتبه في صورة كسر، هيبقى بالشكل ده: تمنمية على أربعة.

فعشان نوجد معدَّلات الوحدة للمقدارين اللي عندنا، يبقى محتاجين إننا نخلّي المقام واحد. فلمّا نيجي نشوف تمنمية وعشرين على خمسة. عشان نوجد معدَّل الوحدة ليها، يبقى عايزين المقام، اللي هو خمسة، يكون واحد. لأن تمنمية وعشرين على خمسة معناها تمنمية وعشرين كالوري في خمس وجبات طعام. فمعدَّل الوحدة معناها إننا عايزين نعرف فيه كام كالوري في وجبة طعام واحدة.

فمعنى كده علشان نخلّي المقام واحد، علشان نوجد معدَّل الوحدة، يبقى هنحتاج نقسم البسط والمقام على خمسة. فلمّا نقسم في البسط تمنمية وعشرين على خمسة، هيبقى بيساوي مية أربعة وستين. وأمّا في المقام، هنقسم خمسة على خمسة، واللي هتساوي واحد. فبكده يبقى قدرنا نوجد معدَّل الوحدة، واللي معناها إن هيبقى عندنا مية أربعة وستين كالوري في الوجبة الواحدة.

وبنفس الطريقة، هنوجد معدَّل الوحدة للمقدار التاني، اللي هو تمنمية على أربعة. يعني عايزين نخلّي المقام واحد. فهنلاحظ إن المقام عندنا أربعة. علشان نخلّيه واحد، يبقى هنقسم البسط والمقام على أربعة. فلمّا نقسم البسط، اللي هو تمنمية، على أربعة، هيبقى بيساوي ميتين. وأمّا في المقام، فهنقسم أربعة على أربعة، واللي هتساوي واحد. فكده يبقى قدرنا نوجد معدَّل الوحدة للمقدار التاني، واللي معناه إن هيبقى فيه ميتين كالوري في الوجبة الواحدة.

فكده يبقى قدرنا نوجد معدَّل الوحدة للمقدارين اللي عندنا. فعشان نحدِّد إذا كانت المقادير المعطاة في السؤال متناسبة ولّا لأة، يبقى هنشوف معدَّل الوحدة. فلو كان عندنا معدَّل الوحدة في المقدار الأول بيساوي معدَّل الوحدة في المقدار التاني، فمعنى كده إن هيبقى المقدارين متناسبين. لكن بما إن معدَّلات الوحدة عندنا غير متساوية؛ لأن مية أربعة وستين لا تساوي ميتين. وبالتالي هتبقى المقادير اللي عندنا مقادير غير متناسبة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.