نسخة الفيديو النصية
في الفيديو ده هنتكلّم على الكتلة. وإزاي نحدّد مقدارها باستخدام الجرام والكيلوجرام. وإزاي نختار الوحدة المناسبة لقياس بعض الأشياء الموجودة في حياتنا.
الكتلة هي مقدار ما يحويه الجسم من مادة. يعني مثلًا عايزين نحدّد كتلة السمكة دي، فهنعرف بتحتوي قدّ إيه من مادة. فهنقارنها بحاجة تانية نكون عارفين كتلتها. يعني مثلًا … يعني مثلًا الدقيق اللي قدّامنا ده وزنه تقريبًا واحد كيلوجرام. ومشبك الورق ده واحد جرام تقريبًا.
استخدمنا وحدتين للقياس مختلفتين. واحدة للحاجة الكبيرة، وواحدة للحاجات الصغيرة. الكيلوجرام … الواحد كيلوجرام بيساوي ألف جرام. وبنرمز للكيلوجرام بالرمز «كجم»، وللجرام بـ «جم». وهي دي وحدات الكتلة اللي هنستخدمها. وبكده نقدر نحدّد كتل الأشياء اللي موجودة في حياتنا.
عايزين نختار الوحدة المناسبة لقياس كتلة قطعة البسكويت. قطعة البسكويت صغيرة وخفيفة، يبقى ممكن نقيسها بوحدة القياس الصغيرة اللي هي زيّ المشبك. يبقى الأنسب قياسها بالجرامات.
اختار التقدير الأنسب لكتلة البرتقالة: ميتين وخمسين جرام، أم ميتين وخمسين كيلوجرام.
هنقارن ما بينها وما بين مثلًا كيلو الدقيق. لو حطّينا ميتين وخمسين كيلو دقيق، حطّينا علب كتير أوي كده، هل هتبقى زيّ البرتقالة؟ ولّا لو حطّينا علبة فيها ميتين وخمسين مشبك من بتوع الورق؟
يبقى البرتقانة هتبقى أنسب إن يبقى كتلتها ميتين وخمسين مشبك ورق تقريبًا، اللي بيمثّلوا ميتين وخمسين جرام. يبقى التقدير الأنسب لكتلة البرتقالة هو ميتين وخمسين جرام.
إيه الأنسب على اللعبة اللي قدّامنا دي؛ إن إحنا نقول عليها كتلتها خمسة كيلوجرام، أم خمسة جرام؟ يعني خمسة أكياس دقيق؛ كل كيس كيلوجرام، ولّا خمس مشابك للورق؟ طبعًا هتبقى خمسة كيلوجرام.
التفاح اللي قدّامنا ده؛ التفاحة الواحدة الأنسب ليها نقول ميتين جرام، أم ميتين كيلوجرام؟ طبعًا الوحدة الصغيرة هي الأنسب. لكن التفاح الكتير ده الأنسب له الوحدة الكبيرة اللي هي الكيلوجرام.
اتكلّمنا في الفيديو ده عن الكتلة. وعرفنا يعني إيه الكتلة، وإزاي بنقدّرها؛ بنستخدم وحدات الجرام والكيلوجرام. وعرفنا إن الجرام هي الوحدة الصغيرة، والكيلوجرام الوحدة الكبيرة. وإن الكيلوجرام الواحد بيساوي ألف جرام.
