تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: مقياس الرسم والنموذج

سوزان فائق

يوضح الفيديو مفهوم مقياس الرسم والنموذج، وكيفية استخدامه وإيجاد قيمته، ومفهوم معامل المقياس وكيفية إيجاده.

٠٨:٦٠

‏نسخة الفيديو النصية

في الفيديو ده هنتكلم على مقياس الرسم والنموذج، يعني إيه مقياس الرسم والنموذج، وإزاي بنستخدمه، وإزاي بنوجد قيمته، وهنتكلم عن معامل المقياس وإزاي بنوجده.

مقياس الرسم أو مقياس النموذج بيُستخدم لتمثيل الأشياء الكبيرة جدًّا أو صغيرة جدًّا اللي مش بينفع نرسمها بحجمها الطبيعي، بيعطي المقياس ده نسبة تُقارن بين قياسات الرسم أو النموذج وقياس الأشياء الحقيقية، معنى كده إن قياسات الرسم أو النموذج بتتناسب مع القياسات الحقيقية؛ يعني مثلًا لو كتبنا واحد سنتيمتر هيمثّل خمسين كيلومتر من الواقع، يبقى أنا أقدر أرسم مسافة كبيرة جدًّا بإن أنا أعبر عن كل خمسين كيلومتر بواحد سنتيمتر على الرسم.

هناخد مثال: استخدم الخريطة لإيجاد المسافة الحقيقية بين القاهرة والإسكندرية حيث أن المسافة على الخريطة بينهما أربعة وستة وتلاتين من مية سنتيمتر.

فيه طريقتين للحل: الطريقة الأولى إن إحنا نكتب التناسب باستخدام مقياس الرسم؛ يعني هنكتب هنا المقياس اللي هو واحد سنتيمتر إلى خمسين كيلومتر، هيساوي، المسافات، المسافة عَ الخريطة كانت أربعة وستة وتلاتين من مية سنتيمتر، هيقابلها قد إيه في الواقع هنرمز له بالرمز ف، في الترتيب كتبنا هنا الرسم الأول اللي هو الخريطة وهنا كتبنا اللي هو الواقع. عشان نوجد قيمة ف هنضرب طرفين في وسطين؛ يبقى الواحد في الـ ف هتساوي أربعة وستة وتلاتين من مية في خمسين، هتساوي ميتين وتمنتاشر كيلومتر، يبقى المسافة بين القاهرة والإسكندرية ميتين وتمنتاشر كيلومتر في الحقيقة.

الطريقة التانية في الحل: إن إحنا نكتب معادلة عامة تعبّر عن القيمة المجهولة باستخدام مقياس الرسم، من مقياس الرسم كل خمسين كيلومتر بيساوي واحد سنتيمتر على الخريطة؛ يعني معنى كده إن المسافة الحقيقية اللي هي ف هتبقى كل سنتيمتر على الخريطة مضروب في الخمسين؛ يعني خمسين في المسافة على الخريطة هنسميها س يبقى خمسين س، إن معنى المقياس خمسين كيلومتر لكل سنتيمتر، وهي دي المعادلة العامة اللي بتعبر عن القيم المجهولة باستخدام مقياس الرسم، لإيجاد المسافة الحقيقية يبقى هنعوض في المعادلة دي يبقى ف هتساوي خمسين في الطول على الرسم اللي هو أربعة وستة وتلاتين من مية سنتيمتر، هيساوي ميتين وتمنتاشر كيلومتر، وهي دي المسافة الحقيقية المطلوبة.

ناخد مثال كمان على نموذج: أحد النماذج للديناصور المُستخدَم في تصوير أحد الأفلام تمنية وتلاتين سنتيمتر، ويظهر الديناصور بالطول الحقيقي ستة متر في الفيلم، ما هو مقياس النموذج المستخدَم؟

هنوجد النسبة ما بين الطول للنموذج والطول الحقيقي اللي هي تمنية وتلاتين سنتيمتر على ستة متر، هنا بدأنا بالنموذج اللي هو طول النموذج وهنا الطول الحقيقي، هنوجد المقياس اللي هو النسبة ما بينهم، إحنا عايزين كل واحد سنتيمتر هيمثّل كام من الطول الحقيقي اللي هو هنسميه س بالمتر، بضرب طرفين في وسطين؛ يبقى تمنية وتلاتين في س هتساوي ستة في واحد يعني ستة، بقسمة طرفي المعادلة على تمنية وتلاتين، يبقى الـ س هتساوي ستة على تمنية وتلاتين، بالتبسيط هتبقى تلاتة على تسعتاشر؛ يبقى معنى كده إن المقياس هو واحد سنتيمتر يساوي تلاتة على تسعتاشر متر، ودايمًا ناخد بالنا إن في المقياس أو معامل المقياس اللي هنتكلم عنه دلوقتي بنبدأ بالنموذج هو اللي في البسط، وبعد كده الأطوال الحقيقية في المقام، فيه أوقات بنبسّط على نفسنا إن إحنا منكتبش المقياس بالسنتيمتر والمتر، وبنستخدم معامل المقياس ده ما بيبقاش له وحدات؛ يعني معامل المقياس لمقياس الرسم والنموذج بيبقى هو المقياس الذي يتم كتابته بدون وحدات؛ لذلك لتحويل مقياس النموذج والرسم إلى معامل المقياس، بيتم استخدام نفس الوحدة، في المثال السابق المقياس كان واحد سنتيمتر إلى تلاتة على تسعتاشر متر، عشان نوجد معامل المقياس هنحول هنا المتر إلى سنتيمتر؛ يبقى النسبة عندنا اللي كانت واحد على تلاتة على تسعتاشر دي كانت سنتيمتر ودي متر، يبقى هتساوي المقام هنضربه في مية علشان نحوله إلى سنتيمتر والبسط زي ما هو سنتيمتر، يبقى معنى كده اللي هو تقريبًا واحد سنتيمتر على خمستاشر وتسعة وسبعين سنتيمتر، اللي هو هيساوي تقريبًا واحد على ستاشر وهنحذف الوحدات من البسط والمقام؛ ده معناه إن نموذج الديناصور بيمثل واحد على ستاشر من حجمه اللي بيظهر في الفيلم.

هناخد مثال كمان إزاي نوجد مقياس لنموذج، اوجد مقياس النموذج لتمثال الحرية طوله الحقيقي تلاتة وتسعين متر تقريبًا وتم عمل النموذج بطول واحد وخمسين سنتيمتر يعني التلاتة وتسعين متر دول هنمثّلهم بواحد وخمسين سنتيمتر، يبقى المقياس هيساوي، هنبدأ بطول النموذج على طول التمثال الحقيقي؛ يبقى هيساوي طول النموذج واحد وخمسين سنتيمتر والطول الحقيقي تلاتة وتسعين متر، عايزين نكتب المقياس كل واحد سنتيمتر هيمثل كام متر، يبقى هنقسم التلاتة وتسعين على الواحد وخمسين يبقى تلاتة وتسعين على واحد وخمسين متر، اللي هو هيساوي تقريبًا واحد سنتيمتر لكل واحد وتمنمية أربعة وعشرين من ألف متر، معنى كده إن كل واحد وتمنمية أربعة وعشرين من ألف متر بيمثَّل بواحد سنتيمتر وهو ده مقياس النموذج، طيب باستخدام المقياس ده بيقول: احسب طول قاعدة التمثال في النموذج إذا كان طولها الحقيقي يساوي سبعة وأربعين متر، يبقى إحنا عايزين طول النموذج اللي هو هنسميه س على السبعة وأربعين متر اللي هو طول الحقيقي، باستخدام المقياس اللي حسبناه اللي هو واحد سنتيمتر لكل واحد وتمنمية أربعة وعشرين من ألف متر، بضرب طرفين في وسطين يبقى واحد وتمنمية أربعة وعشرين من ألف في الـ س تساوي سبعة وأربعين، بقسمة الطرفين على واحد وتمنمية أربعة وعشرين من ألف يبقى الـ س هتساوي تقريبًا خمسة وعشرين وسبعة وسبعين من مية سنتيمتر، يبقى طول القاعدة في النموذج هيبقى هو ده باستخدام المقياس ده.

اتكلمنا في الفيديو ده عن إيه مقياس الرسم والنموذج، وإزاي بنوجد القيم المجهولة، أخدنا طريقتين لإيجاد القيم المجهولة باستخدام مقياس الرسم، وعرفنا يعني إيه معامل المقياس وإزاي بنوجده.