تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: جمع الأعداد الصحيحة بما فيها تلك المكونة من عدة أرقام

أحمد مدحت

يوضح الفيديو كيفية جمع الأعداد الصحيحة المكوَّنة من عدة أرقام، مع أمثلة توضيحية.

٠٦:٣٤

‏نسخة الفيديو النصية

هنتكلّم عن جمع الأعداد الصحيحة، بما فيها الأعداد المكوّنة من عدة أرقام.

هدفنا من الفيديو ده إن إحنا نعرف إزاي نجمع أعداد صحيحة مكوّنة من عدة أرقام. هنوضّح ده من خلال الأمثلة.

في المثال الأول، عايزين نوجد ناتج مية تمنية وعشرين زائد ميتين تلاتة وتمانين.

أول حاجة هنكتب العددين اللي عندنا فوق بعضيهم بطريقة رأسية. في الأول هنكتب العدد مية تمنية وعشرين. وهنضيف عليه العدد ميتين تلاتة وتمانين.

بعد كده هنجمع العددين. وهنبدأ الأول بجمع الآحاد. فتمنية زائد تلاتة يساوي حداشر. فهنحتاج نعيد تجميع الحداشر. فلمّا هنعيد تجميعها، هتبقى عبارة عن عشرة وواحد آحاد. فهنكتب الواحد بتاع الآحاد. أمّا العشرة فهنخلّيها معانا كواحد في خانة العشرات. فهنكتب واحد فوق خانة العشرات.

بعد كده هنجمع العشرات. فاتنين زائد تمنية يساوي عشرة. ومعانا واحد. فهنضيفه على العشرة. فهيبقى عشرة زائد واحد يساوي حداشر. فهنعيد تجميع حداشر عشرة كمِيّة وعشرة واحدة. فالعشرة الواحدة دي هنكتبها كواحد في خانة العشرات. أمّا المية فهنخلّيها معانا، وهنكتبها كواحد فوق خانة المئات. وبكده هيبقى إحنا جمعنا العشرات.

بعد كده هنجمع المئات. فهنجمع واحد زائد اتنين هنلاقيها بتساوي تلاتة. ومعانا واحد هنضيفه على التلاتة. فهيبقى تلاتة زائد واحد يساوي أربعة. فهنكتب أربعة في خانة المئات.

معنى كده إن مية تمنية وعشرين زائد ميتين تلاتة وتمانين يساوي ربعمية وحداشر.

بعد كده المثال التاني. في المثال التاني: عندنا حديقة فيها ميتين وسبعتاشر شجرة تفاح، وتلتمية أربعة وتسعين شجرة برتقال. عايزين نعرف كم عدد الأشجار في الحديقة.

بالنسبة لعدد الأشجار في الحديقة، فهو يساوي عدد أشجار التفاح، واللي هو ميتين وسبعتاشر، زائد عدد أشجار البرتقال، واللي هو تلتمية أربعة وتسعين. يعني عدد الأشجار في الحديقة يساوي ميتين وسبعتاشر زائد تلتمية أربعة وتسعين. فهنكتب العددين ميتين وسبعتاشر وتلتمية أربعة وتسعين فوق بعضهم بطريقة رأسية. هنكتب الأول العدد ميتين وسبعتاشر. بعد كده هنضيف عليه العدد تلتمية أربعة وتسعين.

وهنجمع العددين. هنبدأ الأول نجمع الآحاد. سبعة زائد أربعة يساوي حداشر. فلمّا هنعيد تجميع الحداشر اللي في خانة الآحاد، هنكتب واحد في خانة الآحاد، وهيتبقّى معانا واحد هنكتبه فوق خانة العشرات.

بعد كده هنجمع العشرات. واحد زائد تسعة يساوي عشرة. ومعانا واحد هنضيفه على العشرة. فعشرة زائد واحد يساوي حداشر. فهنعيد تجميع حداشر عشرة. فلمّا هنعيد تجميع حداشر عشرة، هنكتب واحد في خانة العشرات، وهيتبقّى معانا واحد هنكتبه فوق خانة المئات.

بعد كده هنجمع المئات. فاتنين زائد تلاتة يساوي خمسة. ومعانا واحد وهنضيفه على خمسة. فهيبقى خمسة زائد واحد يساوي ستة. فهنكتب ستة في المئات. بكده هيبقى ميتين وسبعتاشر زائد تلتمية أربعة وتسعين يساوي ستمية وحداشر. معنى كده إن عدد الأشجار في الحديقة هو ستمية وحداشر شجرة.

هنلاحظ وإحنا بنجمع أعداد صحيحة بنحتاج إن إحنا نعمل إعادة تجميع.

بعد كده، هنشوف مثال كمان نوضّح بيه أكتر. بعد كده، في المثال التالت عايزين نوجد ناتج ست آلاف تمنمية أربعة وعشرين زائد تلتمية تسعة وأربعين.

هنكتب الأول العددين اللي عندنا فوق بعضيهم بطريقة رأسية. هنكتب في الأول العدد ست آلاف تمنمية أربعة وعشرين. وهنضيف عليه العدد تلتمية تسعة وأربعين. بعد كده هنجمع العددين. فهنبدأ نجمع الآحاد. أربعة زائد تسعة يساوي تلتاشر. فلمّا هنعيد تجميع تلتاشر آحاد، هنكتب تلاتة في الآحاد، وهنكتب واحد فوق العشرات. بكده يبقى إحنا جمعنا الآحاد.

بعد كده هنجمع العشرات. اتنين زائد أربعة يساوي ستة. ومعانا واحد هنضيفه على الستة، فستة زائد واحد يساوي سبعة. فهنكتب سبعة في العشرات. وبكده يبقى إحنا جمعنا العشرات.

بعد كده هنجمع المئات. تمنية زائد تلاتة يساوي حداشر. فلمّا هنعيد تجميع حداشر مية، هنكتب واحد في المئات، وواحد هنكتبه فوق الألوف. وده لأن حداشر مية لمّا هنعيد تجميعها هتبقى عبارة عن ألف ومية واحدة. كده إحنا جمعنا المئات.

بعد كده هنجمع الألوف. بالنسبة لخانة الألوف للعدد تلتمية تسعة وأربعين، هنلاقي ما فيهاش رقم. معنى كده إن الستة مش هنضيف عليها حاجة، فهتفضل ستة. وكان معانا واحد، فهنضيفه على الستة. فهيبقى ستة زائد واحد يعني سبعة. فهنكتب سبعة في الألوف. وبكده يبقى إحنا جمعنا الألوف.

معنى كده إن ناتج ست آلاف تمنمية أربعة وعشرين زائد تلتمية تسعة وأربعين هو سبعة آلاف مية تلاتة وسبعين.

بعد كده هنشوف المثال الرابع. في المثال الرابع: عندنا جدول بيوضّح عدد التذاكر المباعة يومي الأربعاء والخميس لحضور مباراتي كرة قدم. وعايزين نعرف مجموع التذاكر المباعة.

بالنسبة لمجموع التذاكر المباعة، فهو يساوي عدد التذاكر المباعة يوم الأربعاء واللي هو خمسة آلاف سبعمية وتلتاشر، زائد عدد التذاكر المباعة يوم الخميس واللي هو أربعة آلاف تمنمية سبعة وعشرين. يعني هنجمع العددين خمسة آلاف سبعمية وتلتاشر وأربعة آلاف تمنمية سبعة وعشرين. فهنكتبهم فوق بعضيهم بطريقة رأسية.

بعد كده هنجمع. وهنبدأ الأول نجمع الآحاد. فتلاتة زائد سبعة يساوي عشرة. فهنعيد تجميع عشرة آحاد. فلمّا هنعيد تجميعها، هتبقى عبارة عن عشرة وصفر آحاد. بالتالي هنكتب صفر في الآحاد. وهيتبقّى معانا واحد في العشرات. كده إحنا جمعنا الآحاد.

بعد كده هنجمع العشرات. فواحد زائد اتنين يساوي تلاتة. ومعانا واحد هنضيفه على التلاتة. فهيبقى تلاتة زائد واحد يساوي أربعة. فهنكتب أربعة في العشرات. كده إحنا جمعنا العشرات.

بعد كده هنجمع المئات. سبعة زائد تمنية يساوي خمستاشر. وخمستاشر مية لمّا هنعيد تجميعها هتبقى عبارة عن ألف وخمس مئات. فهنكتب خمسة في المئات، وهيتبقّى معانا واحد هنكتبه فوق الألوف. بكده يبقى إحنا جمعنا المئات.

بعد كده هنجمع الألوف. فخمسة زائد أربعة يساوي تسعة. ومعانا واحد هنضيفه على التسعة. فهيبقى تسعة زائد واحد يساوي عشرة. وبما إن ما فيش خانات هنجمعها تاني فهنكتب العشرة. بكده يبقى خمسة آلاف سبعمية وتلتاشر زائد أربعة آلاف تمنمية سبعة وعشرين يساوي عشرة آلاف خمسمية وأربعين. يعني مجموع التذاكر المباعة يساوي عشرة آلاف خمسمية وأربعين تذكرة.

بكده يبقى إحنا في الفيديو ده عرفنا إزاي نجمع أعداد صحيحة مكوّنة من عدة أرقام. وعرفنا من خلال الفيديو ده إن إحنا لمّا ينجمع أعداد صحيحة بيكون من الضروري إن إحنا نعمل إعادة تجميع.