تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: إيجاد وتحديد مواضع النقاط على الشبكة الإحداثية باستخدام الأزواج المرتبة

سوزان فائق

يوضح الفيديو مفهوم شبكة الإحداثيات، وكيفية إيجاد مواضع النقاط وتحديدها على الشبكة الإحداثية باستخدام الأزواج المرتبة، وأمثلة من حياتنا العملية.

٠٥:٥٣

‏نسخة الفيديو النصية

هنتكلّم في الفيديو ده عن الشبكة الإحداثية إيه هي. وإزاي نوجد أو نحدّد مواضع النقاط باستخدامها، وباستخدام الأزواج المرتبة.

الشبكة الإحداثية دي، بتبقى شبكة زي اللي قدامنا دي. نقدر نحدّد بيها المواقع زي موقع المخبز مثلًا أو السوق يبعُد قدّ إيه عنه باستخدامها. عن طريق إن إحنا بنسمّي كل نقطة اللي بتعبر عن السوق ونقطة المخبز بأزواج مرتّبة. والأزواج المرتبة دي بنقرا القِيَم بتاعتها من على المحاور. محور أفقي ومحور رأسي. الأفقي بنسميه السينات. والرأسي بنسميه الصادات. وكلهم بيبدؤوا من عند نقطة هنا اسمها صفر وصفر، اللي هو نقطة الأصل. بيبقى فيها قيمة السينات صفر، والصادات صفر. وبنحطها بالشكل ده اسمه زوج مرتب.

الصفر بتتحرك تبقى واحد، وبعدين اتنين، وبعدين تلاتة، أربعة، خمسة، ستة، سبعة، تمنية، تسعة … لغاية ما توصل للتسعة اللي تحت المخبز. ونطلع فوق نعدّ رأسي. يبقى آدي واحد قصاد الواحد، واتنين قصاد الاتنين، وتلاتة قصاد التلاتة، وأربعة قصاد الأربعة، والخمسة قصاد الخمسة. يبقى هنا المخبز خد تسعة وخمسة. تسعة مشيهم أفقي. وخمسة مشيهم رأسي. التسعة دي قيمة المحور الأفقي اللي بنقول عليه السينات. والخمسة المحور الرأسي اللي بنقول عليه الصادات. نرتّبهم في زوج مرتب، يبقى تسعة وخمسة. ونحط القوسين دول. السينات نبدأ بيها الأول، وبعدين الصادات. معناها إن إحنا مشينا لليمين تسع خطوات. وبعدين طلعنا لفوق خمس خطوات. يبقى كده المخبز عند النقطة تسعة وخمسة.

لو جينا قرينا السوق كام، هنلاقي إن السوق هنا عند الواحد. يعني اتحرّك بس وحدة واحدة في الاتجاه اليمين بتاع السينات. يعني السينات بقت بواحد. وهنبُص عَ الصادات هنلاقيها هنا عدت عشر وحدات؛ يعني واحد وعشرة. ويبقى هي دي الشبكة الإحداثية، اللي هي عبارة عن خطين واحد أفقي وواحد رأسي. الأفقي اسمه محور السينات. والرأسي اسمه محور الصادات. والنقطة اللي بندوّر عليها بنعملها بزوج مرتب قيمة السينات، وبعدين قيمة الصادات، مترتبين بنفس الترتيب. وفيه النقطة اللي بيتقاطع فيها المحورين السينات والصادات، بنسميها نقطة الأصل صفر وصفر. وبنختصرها بالـ و.

يبيّن الشكل خريطة المنطقة التي يسكن فيها أحمد. حدِّد ما الذي يوجد عند الزوج المرتّب ستة وخمسة.

الزوج المرتب ستة وخمسة، بيمثّل … الستة بتمثّل السينات اللي هي بنقول عليها الإحداثي السيني. والقيمة التانية بنقول عليها الإحداثي الصادي. اللي هي السينات اللي على المحور الأفقي. والصادات اللي على المحور الرأسي.

يبقي هنبدأ من عند نقطة الأصل صفر وصفر. ونتحرك على المحور لغاية ست وحدات. وبعد كده نتحرك رأسي خمس وحدات. هنلاقي إن المجزر هو اللي موجود عند الزوج المرتب ستة وخمسة. يبقى اللي بيوجد عند الزوج المرتب ستة وخمسة هو المجزر.

نشوف مثال كمان. ما الزوج المرتب التي تعبر عنه النقطة ج على شبكة الإحداثيات؟

هنقف عند النقطة ج، ونشوف قيم السينات. يعني ننزل للمحور الأفقي كده، ونشوف هنلاقي هنا خمسة. يبقى أول قيمة في الزوج المرتّب هي الخمسة. وبعد كده نشوف الرأسي هيبقى كام. يعني هنتحرك من عند الـ ج كده لغاية ما نشوف قيمة المحور الرأسي كام. هنلاقيها سبعة. يبقى هنحط القيمة التانية هنا سبعة. يبقى الزوج المرتّب اللي بيعبّر عن النقطة ج هو الخمسة والسبعة.

يبقى اتكلمنا في الفيديو ده عن الشبكة الإحداثية. وعرفنا إنها بتتكوّن من محورين. محور السينات، اللي هو بيبقى الأفقي. ومحور الصادات، اللي هو المحور الرأسي. وبيتقاطعوا الاتنين في نقطة صفر وصفر، اللي هي بتبقى بداية العدّ بتاعنا. اللي هو بنقف عندها ونبتدي نعرف النقطة هتبقى قيمها كام في السينات، وقيمها كام في الصادات. اللي بتتمثل بالزوج المرتب؛ أول قيمة فيه بتبقى قيمة الإحداثي السيني، والقيمة التانية بتبقى الإحداثي الصادي. وبكده عرفنا نحدّد مواقع حاجات كتيرة موجودة في حياتنا.