فيديو: حل المسائل التي تتضمَّن مقارنة بين الضرب والجمع

يوضح الجدول النقاط التي أحرزها ٦ متزلجين على الجليد بعد إحدى المسابقات. مَن أحرز ٣ أمثال النقاط التي أحرزها شريف؟ أكمل الجملة: أحرز شادي _ نقطة أكثر من سامح. أكمل الجملة: أحرز شادي ٦ أمثال النقاط التي أحرزها _.

٠٢:٤٨

‏نسخة الفيديو النصية

يوضّح الجدول النقاط التي أحرزها ست متزلجين على الجليد، بعد إحدى المسابقات. عندنا الاسم بتاع المتسابق والنقاط التي أحرزها. أول مطلوب مطلوب مننا: مَن أحرز تلات أمثال النقاط التي أحرزها شريف؟ المطلوب التاني: أكمِل الجملة «أحرز شادي، نقط، نقطة أكثر من سامح». المطلوب التالت أكمِل الجملة: «أحرز شادي ست أمثال النقاط التي أحرزها، نقط».

هنبدأ بأول مطلوب؛ مطلوب مننا نعرف مين اللي أحرز تلات أمثال النقط اللي أحرزها شريف. هنبص عَ الجدول، هنلاقي إن شريف أحرز تسع نقط. طب تلات أمثال النقط دي معناها إن إحنا هنضرب النقط دي في تلاتة، حاصل ضرب تلاتة في تسعة هيساوي سبعة وعشرين. يبقى إحنا دلوقتي عايزين نشوف مين اللي أحرز سبعة وعشرين نقطة. لو رجعنا للجدول، هنلاقي اللي أحرز سبعة وعشرين نقطة هو كريم. يبقى المطلوب الأول إجابته كريم، كريم هو اللي أحرز تلات أمثال النقاط اللي أحرزها شريف.

دلوقتي هنشوف المطلوب التاني، مطلوب مننا نكمّل الجملة دي: «أحرز شادي، نقط، نقطة أكثر من سامح». ده معناها إن إحنا محتاجين نشوف فَرْق النقط اللي أحرزها شادي عن النقط اللي أحرزها سامح، يعني هنطرح تمنتاشر ناقص اتناشر، الفرق بينهم هيطلع ستة. وكده يبقى قدرنا نعرف إن شادي أحرز ست نقاط أكثر من سامح، يعني ده فرق النقط اللي بينهم.

دلوقتي المطلوب التالت أكمل الجملة: «أحرز شادي ست أمثال النقاط التي أحرزها، نقط». أول حاجة هنشوف شادي أحرز كام نقطة، هنلاقي شادي أحرز تمنتاشر نقطة. دلوقتي إحنا محتاجين نعرف التمنتاشر نقطة دول يعتبروا ست أمثال عدد قدّ إيه. يعني التمنتاشر دي هتبقى حاصل ضرب ستة في س، يبقى الـ س ده عدد قدّ إيه؟ كده إحنا محتاجين نوجد س. عشان نخلّي س في طرف لوحدها، هنقسم طرفَي المعادلة على ستة، فهيبقى عندنا تمنتاشر على ستة يساوي ستة على ستة في س. تمنتاشر على ستة هيبقى بيساوي تلاتة، وعندنا ستة على ستة يساوي واحد. حاصل ضرب واحد في س هتبقى هي نفسها س، يبقى كده س بتساوي تلاتة، يعني التمنتاشر نقطة اللي أحرزهم شادي دول هم ست أمثال العدد تلاتة.

خلّينا نشوف مين الشخص اللي أحرز تلات نقاط. لو بصينا عَ الجدول اللي عندنا، هنلاقي إن التلات نقاط أحرزهم نبيل. ويبقى كده نقدر نكمّل الجملة: «أحرز شادي ستة أمثال النقاط التي أحرزها نبيل».

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.