فيديو: حل المسائل الكلامية ذات الخطوتين بواسطة جمع وطرح الأعداد المكوَّنة من رقمين

صنع مخبز ٩٠ كعكة. كان ٢٨ منها كعكًا برقائق الشوكولاتة و٣٥ منها كعكًا بالزبيب. كان باقي الكعك بالزنجبيل. كم كعكة بالزنجبيل صنعها المخبز؟

٠٣:٣٣

‏نسخة الفيديو النصية

صنع مخبز تسعين كعكة. كان تمنية وعشرين منها برقائق الشوكولاتة. وخمسة وتلاتين منها كعكًا بالزبيب. كان باقي الكعك بالزنجبيل. كم كعكة بالزنجبيل صنعها المخبز؟

عندنا مخبز بيعمل كيكات أو كعكات. عمل تلات أنواع من الكعك: نوع بالشوكولاتة، ونوع بالزبيب، ونوع بالزنجبيل؟ عمل كام واحدة بالشوكولاتة؟ تمنية وعشرين بالشوكولاتة. وخمسة وتلاتين بالزبيب. وإحنا عاوزين نعرف هو عمل كام واحدة بالزنجبيل. في حين إنه هو أصلًا كل الكعك اللي عمله تسعين كعكة.

طيب علشان نعرف عدد الكعك اللي بالزنجبيل، هنعمل إيه؟ أول حاجة هنعملها هي إننا هنجمع عدد الكعك اللي بالشوكولاتة، مع اللي بالزبيب. يعني هنجمع تمنية وعشرين زائد خمسة وتلاتين، ونشوف الناتج. تمنية زائد خمسة كام؟ هنحطّ التمنية في مخّنا، والخمسة على إيدينا. ونعدّ بعد التمنية: تسعة، عشرة، حداشر، اتناشر، تلتاشر. يبقى تمنية زائد خمسة تلتاشر. نكتبها إزاي؟ تلاتة هنا تحت الآحاد، وواحد فوق العشرات.

بعدين نجمع العشرات: واحد زائد اتنين زائد تلاتة. واحد زائد اتنين، تلاتة. تلاتة زائد تلاتة؛ هنحطّ تلاتة في مخّنا، وتلاتة على إيدينا. ونقول بعد التلاتة: أربعة، خمسة، ستة. يبقى كده الناتج هنا ستة. يبقى كده تلاتة وستين هو عدد كعك الشوكولاتة مع الزبيب.

طيب إحنا عاوزين نعرف عدد إيه؟ الكعك بالزنجبيل. يبقى نقول عدد الكعك بالزنجبيل تساوي عدد الكعك كله، اللي هو كام؟ تسعين، هنشيل منه الشوكولاتة والزبيب، اللي إحنا لمّا جمعناهم، طلعوا تلاتة وستين. يبقى كده عدد الكعك بالزنجبيل تسعين ناقص تلاتة وستين.

تعالوا نطرحهم ونشوف الناتج إيه. هنكتبهم في شكل رأسي. آدي التسعين، وناقص، وتلاتة تحت الصفر، وستة تحت التسعة. صفر ناقص تلاتة، ما ينفعش؛ لأن الصفر أصغر من التلاتة. فنستلف من التسعة واحد، نخليها تمنية. والصفر ده يكون عشرة؛ لأن الواحد هييجي جنب الصفر. عشرة ناقص تلاتة؟ عشرة ناقص تلاتة، سبعة. يبقى نكتب هنا سبعة. بعدين نطرح العشرات؛ تمنية ناقص ستة. التمنية ناقص ستة تساوي اتنين؛ لأن بعد الستة: سبعة، تمنية. يبقى تمنية ناقص ستة إيه؟ اتنين.

وكده نكون طرحنا تسعين ناقص تلاتة وستين. وطلع ناتج الطرح هو سبعة وعشرين. فده معناه إن عدد الكعك بالزنجبيل هو سبعة وعشرين كعكة. وتبقى هي دي الإجابة النهائية والإجابة الصح؛ سبعة وعشرين.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.