تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: القيمة المكانية للملايين

سوزان فائق

يوضح الفيديو القيمة المكانية للملايين، وكيفية كتابتها بالطريقة القياسية والطريقة اللفظية وطريقة القيم المكانية للأعداد.

٠٥:٥٩

‏نسخة الفيديو النصية

في الفيديو ده هنتكلّم عن القيمة المكانية للملايين.

الأعداد اللي لغاية الملايين، عايزين نعرف قيمة كل رقم جوّه العدد ده. إحنا عندنا العدد عبارة عن مجموعة من الأرقام، اللي هي من الصفر إلى التسعة. لمّا بنشوف الرقم السابع. الرقم السابع في العدد ده بيمثّل الملايين. وبيبقى له تسكين في الخانات بالشكل ده.

في الملايين بيبقى عندنا تلات مجموعات. أول مجموعة اللي هي الوحدات، بتتكون من تلاتة خانات. الخانة الأولانية بنسميها الآحاد. التانية العشرات. التالتة المئات. وبعدين الألوف هنبدأ تاني نعدّ الآحاد، عشرات، المئات. والملايين هناخدها في الآحاد.

الرقم اللي بيبقى هنا ده بنسميه آحاد الملايين؛ يعني مليون، اتنين مليون، تلاتة مليون، أربعة مليون. وده بيبقى الخانة السابعة في العدد. يعني لو عندنا عدد بالشكل ده: خمسة، تلاتة، خمسة، اتنين، واحد، ستة، سبعة. الخمسة دي بنقول عليها خمسة ملايين، وبيبقى ترتيبها سابع خانة. الواحد دي بتقول عليها مئات الوحدات؛ يعني بنقول مية. الخمسة دي بنقول عليها عشرات الألوف؛ يعني عشرة، يعني الخمسين دي خمسة تبقى خمسين ألف. التلاتة بتبقى تلاتة مئات ألوف؛ يبقى تلتمية ألف.

عندنا تلات طرق لكتابة الأعداد. أول طريقة اللي هي إن أنا أكتبه بالأرقام؛ يعني خمسة تلاتة خمسة اتنين واحد ستة سبعة. اللي هي خمس ملايين تلتمية اتنين وخمسين ألف مية سبعة وستين.

الطريقة التانية إن أنا أكتبه بالكلمات. يعني هتبقى خمسة ملايين وتلتمائة اتنين وخمسين ألف ومائة سبعة وستين.

الطريقة التالتة لكتابة الأعداد هي القيم المكانية للأعداد. يعني السبعة. بتبقى زائد الستة دي بتمثّل عشرات الوحدات هنحطها ستين. زائد الواحد ده هيبقى مئات الوحدات هتبقى مية. زائد الاتنين في الآحاد الألوف يعني اتنين زائد آحاد الألوف. وبعد كده الخمسة عشرات يعني خمسة في العشرة وهنحط في الآلاف. زائد تلاتة في المئات يعني هنحط تلتمية وبعدين خانة الألوف. زائد خمسة ملايين يعني خمس آحاد الملايين هتبقى خمسة وقدامها عدد الخانات اللي جات قبلها، اللي هي واحد اتنين تلاتة أربعة خمسة ستة. وده بيساوي العدد اللي عندنا اللي هو خمس ملايين تلتمية اتنين وخمسين ألف مية سبعة وستين.

نقلب الصفحة وناخد مثال.

بيقول لنا: اكتب القيمة المكانية لما تحته خط في الأعداد التالية.

العدد الأولاني مكوّن من سبع أرقام؛ يعني واخد لغاية أول خانة في الملايين، اللي هي آحاد الملايين. بنقراه إزّاي؟ مليون وأربعين ألف سبعمية وعشرة. يبقى معناها إن الخانة الأربعة دي هي العشرات بتاعة الآلاف. الخانة الواحد ده يبقى واحد الملايين. طيب بيسألنا الواحد دي إيه القيمة المكانية بتاعتها؟ طبعًا واضح إن دي سابع رقم؛ يعني أول خانة في الملايين اللي هي آحاد الملايين.

طب لو جالنا بعد آحاد الملايين، وحط لنا أرقام تانية، هنعملها بنفس الطريقة اللي عملنا فيها الوحدات والألوف. يعني كل مجموعة بتتكوّن من تلاتة خانات؛ الخانة الأولانية الآحاد، والتانية العشرات، وتالت واحدة المئات. في الملايين نفس الكلام؛ الخانة الأولانية آحاد، وبعدين تاني واحدة عشرات الملايين، وتالت واحدة مئات الملايين. زي الجدول ده؛ كل مجموعة بتتكون من آحاد عشرات مئات بالشكل ده. بالشكل ده.

نطبق على العدد اللي عندنا. العدد اللي عندنا عبارة عن إيه؟ تلات أرقام؛ صفر تسعة تمنية. وبعدين تلاتة أرقام؛ صفر تسعة تمنية. وبعدين رقمين. يعني معناها إن هو واخد التلات مجموعات. أول مجموعة اللي هي الوحدات، حاطط التمنية في الآحاد، والتسعة في العشرات، والصفر في المئات. وتاني مجموعة تمنية تسعة صفر. وبعدين خمسة تلاتة. الخمسة والتلاتة دول. الخمسة دي بتمثّل الخانة رقم كام؟ سابع خانة. دي قلنا عليها خمسة آحاد الملايين؛ يعني قيمتها المكانية آحاد الملايين. طيب التلاتة؟ يبقى عشرات الملايين. يعني لمّا ييجي يسألني على التلاتة هقوله إن التلاتة دي عشرات الملايين. طيب هو هنا بيسألنا على التسعة اللي هي دي. هنقول عليها إنها عشرات الألوف.

ناخد العدد اللي بعده. هنشوف التمنية اللي بيسأل عليها دي رقم الخانة بتاعتها كام. هنعدّ واحد اتنين تلاتة أربعة خمسة ستة سبعة تمنية. وفي الخانات المقابلة رقم تمنية دي هنقول عليها اللي هي عشرات الملايين. يبقى التمنية دي جايّة في عشرات الملايين. طيب لو حبينا نقرا الرقم ده بالصيغة اللفظية، هنقول عليه إيه؟ تلاتة وتمانين مليون، وتلاتة وعشرين ألف، ومائتان وخمستاشر.

يبقى كده عرفنا في الفيديو إزّاي إن إحنا ننطق الأعداد لغاية الملايين. وهنعرف القيمة بتاعتها. ونكتبها بتلات طرق؛ يعني العدد نقدر نكتبه بتلات طرق. الطريقة القياسية اللي هي بالأرقام. الطريقة بالكلمات. الطريقة التالتة اللي هي بالتحليل؛ بإن أنا أكتب القيمة المكانية لكل رقم، وأحطهم أجمعهم على بعض. وأعرف إن ده كله لازم يساوي العدد النهائي.