تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: إيجاد الربيعات لمجموعة بيانات

أحمد مدحت

يوضح الفيديو مفهوم الربيعات، وكيفية إيجادها لمجموعة بيانات من خلال أمثلة توضيحية.

٠٦:٤٦

‏نسخة الفيديو النصية

هنتكلم عن إيجاد الرُّبيعات لمجموعة بيانات. هدفنا من الفيديو إن إحنا نعرف مفهوم الرُّبيعات، والرُّبيع الأدنى، والرُّبيع الأعلى، وكمان نعرف إزاي نوجد الرُّبيعات لمجموعة بيانات.

بتعتبر الرُّبيعات من مقاييس التشتت اللي بتوصف انتشار البيانات، وهي عبارة عن قيم بتقسّم مجموعة البيانات لأربع أجزاء متساوية. فمثلًا لو عندنا مجموعة بيانات هي: أربعة وتلاتين وعشرة من مية، وسبعة وتلاتين وأربعين من مية، وسبعة وتلاتين وستين من مية، وتمنية وتلاتين وعشرة من مية، وأربعين وخمسين من مية، وواحد وأربعين وتلاتين من مية. بالنسبة للوسيط بتاع مجموعة البيانات دي، فهيِقسمها لجزئين متساويين. كده البيانات اتقسمت نصين؛ نص قبل الوسيط، ونص بعد الوسيط. النص اللي قبل الوسيط بيُسمى النصف الأدنى، والنص اللي بعد الوسيط بيُسمى النصف الأعلى. والرُّبيع الأدنى لمجموعة بيانات بيكون الوسيط للنص الأدنى لمجموعة البيانات دي؛ بالتالي الرُّبيع الأدنى لمجموعة البيانات اللي عندنا هيبقى سبعة وتلاتين وأربعين من مية؛ وده لأن القيمة سبعة وتلاتين وأربعين من مية هي الوسيط للنص الأدنى لمجموعة البيانات.

أما الرُّبيع الأعلى فهو وسيط النصف الأعلى لمجموعة البيانات؛ بالتالي الرُّبيع الأعلى لمجموعة البيانات اللي عندنا هو أربعين وخمسين من مية؛ وده لأن القيمة دي هي الوسيط للنص الأعلى من مجموعة البيانات.

هنلاحظ إن مجموعة البيانات اللي عندنا اتقسّمت لأربعة أرباع؛ ده هو الربع الأول، وده الربع التاني، وده هو الربع التالت، وده هو الربع الرابع. والقيم اللي قسّمت مجموعة البيانات دي لأربعة أرباع هي الرُّبيع الأدنى والوسيط والرُّبيع الأعلى؛ معنى كده إن المقصود بالرُّبيعات لمجموعة بيانات هو الوسيط والرُّبيعين الأدنى والأعلى. كمان هنلاحظ إن نص البيانات بيقع بين الرُّبيع الأدنى والرُّبيع الأعلى.

كده إحنا عرفنا مفهوم الرُّبيعات، وإيه المقصود بيها، بعد كده هنشوف من خلال مثال إزاي نوجد الرُّبيعات لمجموعة بيانات. عندنا في المثال جدول بيوضح برامج قناة رياضية خلال عام، وعايزين نوجد المدى والرُّبيعات للبيانات اللي في الجدول ده.

بالنسبة للمدى فهو عبارة عن الفرق بين القيمتين العظمى والصغرى لمجموعة البيانات. فلما هنرجع للجدول اللي عندنا هنلاقي إن القيمة العظمى هي ميتين وأربعة، والقيمة الصغرى هي عشرين؛ يعني المدى يساوي ميتين وأربعة ناقص عشرين؛ يعني يساوي مية أربعة وتمانين مباراة. بكده إحنا أوجدنا المدى، بعد كده هنوجد الرُّبيعات، واللي هي عبارة عن الوسيط والرُّبيعين الأدنى والأعلى. وعلشان نوجدهم فإحنا هنرتب البيانات اللي عندنا ترتيب تصاعدي، فالترتيب هيبقى عشرين، وأربعة وعشرين، وواحد وأربعين، وخمسة وتمانين، وخمسة وتمانين، ومية تلاتة وعشرين، ومية تسعة وتلاتين، وميتين وأربعة.

هنبدأ الأول نوجد الوسيط اللي بيِقسم مجموعة البيانات لجزئين متساويين، والوسيط هو القيمة اللي بتتوسط مجموعة البيانات بعد ترتيبها ترتيب تصاعدي، لكن هنلاقي إن إحنا عندنا قيمتين بيتوسطوا الترتيب؛ وهم خمسة وتمانين، وخمسة وتمانين. الوسيط في الحالة دي هيساوي الوسط الحسابي للقيمتين دول، أما مكانه فهيكون بين القيمتين؛ يعني هنا. بكده الوسيط هيساوي خمسة وتمانين زائد خمسة وتمانين على اتنين؛ يعني يساوي خمسة وتمانين. بكده الوسيط قسم مجموعة البيانات اللي عندنا لنصين؛ النص اللي قبل الوسيط هو النص الأدنى، والنص اللي بعد الوسيط هو النص الأعلى.

بالنسبة للربيع الأدنى فهو وسيط النصف الأدنى لمجموعة البيانات، في النص الأدنى لمجموعة البيانات هنلاقي قيمتين بيتوسطوا الترتيب؛ هم أربعة وعشرين، وواحد وأربعين؛ بالتالي الوسيط للنص الأدنى لمجموعة البيانات هيساوي الوسط الحسابي للقيمتين دول، ومكانه هيكون بين القيمتين، واللي هو مكان الرُّبيع الأدنى اللي هيساوي أربعة وعشرين زائد واحد وأربعين على اتنين، يعني يساوي اتنين وتلاتين ونص؛ معنى كده إن الرُّبيع الأدنى لمجموعة البيانات اللي عندنا هو اتنين وتلاتين ونص، ومكانه بين القيمتين أربعة وعشرين وواحد وأربعين.

بعد كده الرُّبيع الأعلى، واللي هو وسيط النص الأعلى لمجموعة البيانات، يعني هيساوي الوسط الحسابي للقيمتين مية تلاتة وعشرين، ومية تسعة وتلاتين، ومكانه هيكون بين القيمتين دول. بكده الرُّبيع الأعلى هيساوي مية تلاتة وعشرين زائد مية تسعة وتلاتين على اتنين، يعني يساوي مية واحد وتلاتين؛ بالتالي الرُّبيع الأعلى لمجموعة البيانات اللي عندنا هو مية واحد وتلاتين. وبكده يبقى إحنا أوجدنا المدى والرُّبيعات للبيانات اللي موجودة عندنا في الجدول.

هنشوف مثال كمان، عندنا في المثال جدول بيوضح مدخرات مجموعة من تمن أطفال، ومطلوب إيجاد الرُّبيعين الأدنى والأعلى لمجموعة البيانات.

أول حاجة هنعملها إن إحنا هنرتب مجموعة البيانات اللي عندنا ترتيب تصاعدي، فهنلاقي الترتيب التصاعدي لمجموعة البيانات هو: تمنتاشر وتلاتين من مية، وتمنتاشر وأربعين من مية، وواحد وعشرين وخمسين من مية، وتلاتة وعشرين وأربعين من مية، وتسعة وعشرين وخمسين من مية، وتلاتين وأربعين من مية، وتلاتة وتلاتين وخمسين من مية، وخمسة وتلاتين. بعد كده هنحدد مكان الوسيط اللي هيقسم مجموعة البيانات اللي عندنا لجزئين متساويين، فهنلاقيه بين القيمتين تلاتة وعشرين وأربعين من مية، وتسعة وعشرين وخمسين من مية، يعني مكانه هيبقى هنا. بعد كده هنوجد الرُّبيع الأدنى، واللي هو عبارة عن الوسيط للنص الأدنى من مجموعة البيانات، معنى كده إن الرُّبيع الأدنى يساوي الوسط الحسابي للقيمتين تمنتاشر وأربعين من مية، وواحد وعشرين وخمسين من مية، ومكانه هيكون بين القيمتين دول، يعني هنا. معنى كده الرُّبيع الأدنى يساوي تمنتاشر وأربعين من مية زائد واحد وعشرين وخمسين من مية على اتنين، يعني يساوي تسعتاشر وخمسة وتسعين من مية جنيهًا.

بعد كده هنوجد الرُّبيع الأعلى، واللي هو الوسيط للنص الأعلى من مجموعة البيانات، فهنلاقيه عبارة عن الوسط الحسابي للقيمتين تلاتين وأربعين من مية، وتلاتة وتلاتين وخمسين من مية، ومكانه هيكون بين القيمتين دول؛ بالتالي الرُّبيع الأعلى يساوي تلاتين وأربعين من مية زائد تلاتة وتلاتين وخمسين من مية على اتنين، يعني يساوي واحد وتلاتين وخمسة وتسعين من مية جنيهًا.

بكده يبقى إحنا في الفيديو ده عرفنا إن الرُّبيعات بتعتبر من مقاييس التشتت اللي بتوصف انتشار البيانات، وهي عبارة عن قيم بتقسّم مجموعة البيانات لأربع أجزاء متساوية، والرُّبيعات هي الوسيط والرُّبيع الأدنى والرُّبيع الأعلى، وكمان عرفنا إزاي نوجد الرُّبيعات لمجموعة بيانات.