تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: التقريب إلى أقرب ألف

نهال عصمت

يتناول الفيديو كيفية تقريب الأعداد إلى أقرب ألف باستخدام خط الأعداد، أو خطوات التقريب، ويوضِّح ذلك بالأمثلة.

٠٧:١٢

‏نسخة الفيديو النصية

التقريب إلى أقرب ألف.

هنتعلّم إزاي نعرف نقرّب الأعداد إلى أقرب ألف. طب إيه فايدة التقريب؟ يُستخدم التقريب لتحويل الأعداد إلى أعداد يسهل التعامل معها. وممكن نقرّب باستخدام طريقتين: أول طريقة هي استخدام خطّ الأعداد. والطريقة التانية هي استخدام خطوات التقريب.

أول حاجة هنتكلّم عنها هي التقريب باستخدام خطّ الأعداد. هنبدأ نشوف مثال نوضّح عليه. معطى: سجّل كريم عدد زوّار المتحف المصري خلال خمسة أسابيع كما هو موضّح في الجدول التالي. أول مطلوب: ما العدد التقريبي لزوّار المتحف المصري في الأسبوع الثالث؟

هنبدأ نبصّ في الجدول، هنلاقي إن في الأسبوع التالت عدد الزوار كان أربعة آلاف ستمية أربعة وتمانين. نقدر نقول: إن أقرب ألف أقل من أربعة آلاف ستمية أربعة وتمانين هو أربعة آلاف. لكن أقرب ألف أكبر من أربعة آلاف ستمية أربعة وتمانين هو خمسة آلاف. وبالتالي هنبدأ نرسم خطّ الأعداد مكتوب عليه الأعداد من أربعة آلاف إلى خمسة آلاف بالشكل الآتي.

بعد كده هنحدّد العدد أربعة آلاف ستمية أربعة وتمانين على خطّ الأعداد. هنلاحظ إن العدد أربعة آلاف ستمية أربعة وتمانين أقرب إلى العدد خمسة آلاف عن العدد أربعة آلاف. وبالتالي هنقرّب العدد أربعة آلاف ستمية أربعة وتمانين إلى العدد خمسة آلاف. وبالتالي نقدر نقول: إن العدد التقريبي لزوّار المتحف المصري في الأسبوع الثالث هو: خمسة آلاف.

تاني مطلوب … هنبدأ نجيب صفحة جديدة، هو: ما العدد التقريبي لزوّار المتحف المصري في الأسبوع الثاني؟

هنبدأ نبصّ في الجدول، هنلاقي إن في الأسبوع التاني كان عدد الزوّار ألفين تلتمية واحد وأربعين. وبالتالي نقدر نقول: إن أقرب ألف أقل من ألفين تلتمية واحد وأربعين هي ألفين. لكن أقرب ألف أكبر من ألفين تلتمية واحد وأربعين هي تلات آلاف. وبالتالي هنرسم خطّ الأعداد مكتوب عليه الأعداد من ألفين إلى تلات آلاف بالشكل الآتي.

بعد كده هنبدأ نحدّد العدد ألفين تلتمية واحد وأربعين على خطّ الأعداد. هنلاحظ إن العدد ألفين تلتمية واحد وأربعين أقرب إلى ألفين من تلات آلاف. يبقى معنى كده إن إحنا هنقرّب العدد ألفين تلتمية واحد وأربعين إلى العدد ألفين. وبالتالي نقدر نقول: إن العدد التقريبي لزوّار المتحف المصري في الأسبوع الثاني هو ألفين. يبقى كده اتكلّمنا إزاي نقدر نقرّب الأعداد إلى أقرب ألف باستخدام خطّ الأعداد.

بعد كده، هنجيب صفحة جديدة، ونعرف إزاي نقدر نقرّب الأعداد إلى أقرب ألف باستخدام خطوات التقريب. نبدأ نشوف مثال: في الأسبوع الماضي، زار حديقة الحيوان خمسة آلاف ربعمية تسعة وتسعين زائرًا. المطلوب: ما هو عدد زوّار الحديقة مقرّبًا إلى أقرب ألف؟

عندنا خمسة آلاف ربعمية تسعة وتسعين زائر. عايزين نقرّبها إلى أقرب ألف. هنبدأ نطبّق خطوات التقريب. هنبدأ نكتب العدد، وهو خمسة آلاف ربعمية تسعة وتسعين. الخطوة الأولى هنبدأ نحطّ خطّ تحت الرقم اللي موجود في الخانة التي سيتمّ التقريب إليها. اللي هي خانة الآلاف. اللي هو العدد خمسة.

الخطوة التانية: هنبدأ نحدّد الرقم الذي يقع على يمين الخانة التي سيتمّ التقريب إليها. يبقى عندنا العدد أربعة، هنبدأ نحدّده بالشكل ده.

الخطوة التالتة: لو لقينا الرقم اللي إحنا حدّدنا أقل من خمسة، يبقى مش هنغيّر الرقم اللي تحته خطّ. لكن لو لقينا الرقم ده أكبر من خمسة، هنضيف واحد على الرقم اللي تحته خطّ. عندنا الرقم اللي إحنا حدّدنا هو أربعة. والأربعة أقل من الخمسة. يبقى معنى كده إن إحنا مش هنغيّر الرقم اللي تحته خطّ.

الخطوة الرابعة والأخيرة: هنبدأ ننزّل الرقم اللي تحته خطّ زيّ ما هو. يبقى خمسة. بعد كده هنبدأ نحطّ أصفار مكان كل رقم على يمين الرقم اللي تحته خطّ. يبقى هنشيل الأربعة ونحطّ صفر، ونشيل التسعة ونحطّ صفر، ونشيل التسعة ونحطّ صفر. وبالتالي هنقرّب العدد خمسة آلاف ربعمية تسعة وتسعين إلى أقرب ألف … هو خمسة آلاف.

نبدأ نرسم خطّ الأعداد بالشكل الآتي؛ عشان نتأكّد إن إحنا قرّبنا صح. بعد كده نحدّد العدد خمسة آلاف ربعمية تسعة وتسعين على خطّ الأعداد. هنلاقي فعلًا إن العدد خمسة آلاف ربعمية تسعة وتسعين أقرب إلى العدد خمسة آلاف عن العدد ست آلاف. وبالتالي نقدر نقول: إن عدد زوّار حديقة الحيوان مقرّبًا إلى أقرب ألف هو خمسة آلاف زائر.

يبقى كده عرفنا إزاي نقرّب الأعداد إلى أقرب ألف باستخدام خطّ الأعداد، وباستخدام خطوات التقريب.