تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: جمع الأعداد الصحيحة

أحمد لطفي

يوضح الفيديو كيفية جمع الأعداد الصحيحة بطريقتين: خط الأعداد، وقطع العد الموجبة والسالبة.

٠٧:٠٣

‏نسخة الفيديو النصية

هنتكلم عن جمع الأعداد الصحيحة، وهنعرف إزاي هنقدر نجمع الأعداد الصحيحة باستخدام طريقتين؛ أول طريقة باستخدام خط الأعداد، وتاني طريقة باستخدام قطع العد الموجبة والسالبة.

في البداية هنشوف إزاي هنقدر نجمع عددين صحيحين لهما الإشارة نفسها. في البداية لو عندنا مثال بالشكل ده، اوجد موجب تلاتة زائد موجب اتنين. في البداية هنوجد مجموع موجب تلاتة وموجب اتنين باستخدام الطريقة الأولى، وهي خط الأعداد. لو عندنا خط الأعداد بالشكل ده، أول خطوة هنمثل العدد موجب تلاتة على خط الأعداد، يعني هبدأ من صفر وأتحرك ناحية اليمين تلات خطوات. وعشان أجمع عليه موجب اتنين، يبقى هتحرك خطوتين ناحية اليمين، بدايةً من العدد موجب تلاتة، وبالتالي وصلنا لخمسة، ويبقى موجب تلاتة زائد موجب اتنين هيساوي خمسة.

لو عايزين نوجد نفس الناتج باستخدام الطريقة التانية، وهي طريقة قطع العد الموجبة والسالبة، في البداية هنعبّر عن موجب تلاتة بتلات قطع موجبة بالشكل ده، تاني خطوة هنضيف عليهم قطعتين عد موجبة بالشكل ده، وبالتالي هيكون عندنا خمس قطع عد موجبة؛ يبقى نقدر نقول موجب تلاتة زائد موجب اتنين هيساوي موجب خمسة، أو خمسة. وقدرنا نحصل ع الناتج باستخدام طريقتين مختلفتين؛ أول طريقة هي طريقة خط الأعداد، وتاني طريقة هي طريقة قطع العد الموجبة والسالبة.

لو عندنا مثال آخر بالشكل ده، مطلوب نوجد سالب اتنين زائد سالب أربعة. في البداية باستخدام الطريقة الأولى، وهي طريقة خط الأعداد، هيكون عندنا خط أعداد بالشكل ده، أول خطوة هنبدأ من صفر ونتحرك ناحية اليسار خطوتين عشان نقدر نمثّل العدد سالب اتنين، وعشان نجمع على العدد سالب اتنين، سالب أربعة، فهنتحرك أربع خطوات ناحية اليسار بدايةً من العدد سالب اتنين، يعني بالشكل ده؛ وبالتالي نكون قدرنا نجمع سالب اتنين زائد سالب أربعة باستخدام خط الأعداد.

لو عايزين نشوف الطريقة الأخرى، وهي باستخدام قطع العد الموجبة والسالبة، في البداية هيكون عندنا قطعتين عد سالبة بالشكل ده، تاني خطوة هنضيف عليهم أربع قطع عد سالبة بالشكل ده؛ وبالتالي يبقى عندنا ست قطع عد سالب، ويبقى سالب اتنين زائد سالب أربعة هيساوي سالب ستة. يبقي كده عرفنا إزاي نقدر نجمع عددين صحيحين لهما الإشارة نفسها.

لو عايزين نشوف إزاي هنقدر نجمع عددين صحيحين مختلفي الإشارة، لو عندنا مثال بالشكل ده، مطلوب نوجد ناتج سالب تمنية زائد ستة. هنلاحظ إن العدد اللي مالوش إشارة بيفترض إنه يكون عدد موجب، وبالتالي هنجمع سالب تمنية على موجب ستة. بالنسبة للطريقة الأولى، وهي باستخدام خط الأعداد، فهيكون عندنا خط أعداد بالشكل ده، في البداية عشان نمثل سالب تمنية فهنبدأ من الصفر ونتحرك تمن خطوات ناحية اليسار بالشكل ده، وعشان نجمع ستة على سالب تمنية، فهنبدأ من عند سالب تمنية ونتحرك ست خطوات ناحية اليمين، يعني بالشكل ده؛ وبالتالي نكون وصلنا لسالب اتنين؛ يعني سالب تمنية زائد ستة هيساوي سالب اتنين.

لو عايزين نوصل لنفس الناتج باستخدام طريقة قطع العد الموجبة والسالبة، في البداية هنمثل العدد سالب تمنية، يعني هنضع تمن قطع سالبة بالشكل ده، تاني خطوة هنضع ست قطع عد موجبة بالشكل ده، وعشان نستخدم طريقة قطع العد الموجبة والسالبة لجمع أعداد صحيحة مختلفة الإشارة، من المهم إننا نحذف أي زوج صفري، والزوج الصفري بيتكون من قطعة عد موجبة وقطعة عد سالبة، يعني عندنا أول زوج صفري، وتاني زوج صفري، وهكذا. يبقى عشان نستخدم طريقة قطع العد الموجبة والسالبة عشان نجمع عددين صحيحين مختلفي الإشارة، محتاجين نحذف جميع الأزواج الصفرية اللي موجودة؛ يبقى هنمسح الأزواج الصفرية بالشكل ده، هيتبقى عندنا قطعتين عد سالبتين فقط؛ وبالتالي سالب تمنية زائد ستة هيساوي سالب اتنين. ويبقي كده قدرنا نوصل لنفس الناتج باستخدام طريقة خط الأعداد وطريقة قطع العد الموجبة والسالبة.

عندنا قوانين مهمة ممكن تساعدنا في جمع الأعداد الصحيحة، عند جمع عددين صحيحين موجبين، الناتج دائمًا هيكون عدد صحيح موجب؛ يعني مثلًا خمسة زائد واحد هيساوي ستة. وعند جمع عددين صحيحين سالبين، الناتج هيكون دايمًا عدد صحيح سالب؛ يعني مثلًا سالب خمسة زائد سالب واحد الناتج هيكون بيساوي سالب ستة.

وعند جمع عدد صحيح موجب وعدد صحيح سالب، الناتج أحيانًا بيكون عدد صحيح موجب، وأحيانًا عدد صحيح سالب، وأحيانًا صفر؛ مثلًا خمسة زائد سالب واحد هيساوي أربعة الناتج كان عدد صحيح موجب، أو مثلًا سالب خمسة زائد واحد هيساوي سالب أربعة الناتج كان عدد صحيح سالب، أو مثلًا سالب خمسة زائد خمسة هيساوي صفر.

ويبقى في النهاية عرفنا إزاي نقدر نجمع الأعداد الصحيحة باستخدام طريقتين؛ أول طريقة هي طريقة خط الأعداد، وتاني طريقة هي طريقة قطع العد الموجبة والسالبة.