فيديو: إيجاد مُكمِّلة اتحاد مجموعتين باستخدام شكل فِن

استخدم شكل فِن التالي لإيجاد (س ∪ ص)′.

٠٢:٥٧

‏نسخة الفيديو النصية

استخدم شكل فِن التالي لإيجاد مكمّلة س اتحاد ص.

عاوزين باستخدام الشكل اللي قدامنا ده، نعرف إيه هي مكمّلة س اتحاد ص. طيب قبل ما نجيب مكمّلة س اتحاد ص، أو س اتحاد ص شرطة؛ أول حاجة هنجيب س اتحاد ص بس. طيب نجيبها إزاي؟ هنجيب مجموعة س. المجموعة س فيها إيه؟ فيها واحد وتسعة وأربعة وخمسة. طيب وبعديها المجموعة ص. المجموعة ص فيها إيه؟ خمسة وأربعة.

نجيب بقى اتحادهم، فنقول س اتحاد ص. بنلمّ كل العناصر اللي في س على اللي في ص. يعني نحطّ الواحد والتسعة والأربعة والخمسة. ونبصّ عَ الـ ص، هنلاقي فيها خمسة وأربعة، اللي هي أصلًا موجودة قبل كده، وكتبناها. فيبقى س اتحاد ص هو واحد وتسعة وأربعة وخمسة.

طيب عاوزين بقى نعرف مكمّلتهم. مكملتهم يعني كل حاجة موجودة في ش، أو اللي هي المجموعة الشاملة، ما عدا الـ س اتحاد ص. طيب هو إيه اللي موجود في ش؟ تعالوا نقول. آدي دي ش، موجود فيها إيه؟ هنلمّ كل الأعداد اللي عندنا. واحد وتسعة وأربعة وخمسة وستة وسبعة وتمنية. بعدين هنشيل من ش الواحد والتسعة والأربعة والخمسة دول. واللي هيتبقّى، هيبقى هو المكمّلة.

طيب تعالوا كده نشطب عليهم في ش. آدي الواحد، وآدي التسعة، وآدي الأربعة، وآدي الخمسة. اتبقّى لنا مين؟ اتبقّى لنا دول. يبقى هم دول مكمّلة س اتحاد ص. فنقول: س اتحاد ص، شرطة، تساوي ستة وسبعة وتمنية. فتبقى الإجابة بتاعتنا هي إيه؟ المجموعة ستة وسبعة وتمنية. هي دي مكمّلة س اتحاد ص.

تعالوا بقى نشوفها كده من على الرسمة تاني. إحنا قلنا س اتحاد ص هو الجزء ده كله، اللي هو فيه واحد وتسعة وأربعة وخمسة. وَ ش المستطيل ده كله، هو ش. عاوزين بقى نطرحهم. يعني إيه؟ يعني نشيل الجزء ده من ش. لمّا نشيله، هيتبقّى لنا إيه؟ هيتبقّى لنا الجزء ده، اللي هو في ستة وسبعة وتمنية. فتبقى الإجابة هي المجموعة ستة وسبعة وتمنية.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.