فيديو: إيجاد قِيَم البيانات المجهولة بمعلومية وسيط مجموعة بيانات ومداها

هناك قيمتان مجهولتان في مجموعة البيانات الموضَّحة. إذا كان الوسيط ٦٧، والمدى ٤٤، والبيانات مُرتَّبة ترتيبًا تصاعديًّا، فأوجد القيمتين المجهولتين. ٤٣، ٤٧، ٦٢، _، ٧٦، _.

٠٢:٤٥

‏نسخة الفيديو النصية

هناك قيمتان مجهولتان في مجموعة البيانات الموضَّحة. إذا كان الوسيط سبعة وستين، والمدى أربعة وأربعين، والبيانات مُرتَّبة ترتيبًا تصاعديًّا، فأوجد القيمتين المجهولتين. ومعطى عندنا مجموعة البيانات دي، وعندنا قيمتين مجهولتين.

وأول حاجة هنعملها إننا هنرمز للقيمتين المجهولتين بـ س وَ ص. بعد كده هنلاحظ إن معطى عندنا في السؤال إن الوسيط لمجموعة البيانات، هو سبعة وستين. وهنلاحظ إن مجموعة البيانات اللي عندنا عددها زوجي، وهم ستة. وبالتالي هيبقى الوسيط لمجموعة البيانات اللي عندنا، هو المتوسط الحسابي للعددين الأوسطين، اللي هم العددين دول. والمتوسط الحسابي للعددين معناها مجموعهم على عددهم. فبالتالي هيبقى مجموعهم هو اتنين وستين زائد س، مقسوم على عددهم؛ يعني على اتنين. ومعطى عندنا إن الوسيط بيساوي سبعة وستين. فبالتالي هيبقى المقدار اللي عندنا بيساوي سبعة وستين.

بعد كده هنحل المعادلة علشان نوجد قيمة س. وأول حاجة هنعملها هنضرب طرفَي المعادلة في اتنين. فيبقى الطرف الأيمن للمعادلة اتنين في، اتنين وستين زائد س، على اتنين. فنقدر نختصر اتنين مع اتنين، فيبقى الطرف الأيمن هو اتنين وستين زائد س، وأمّا الطرف الأيسر للمعادلة فيبقى سبعة وستين في اتنين. فلمّا نحسبها هتبقى بتساوي مية أربعة وتلاتين.

بعد كده هنطرح اتنين وستين من طرفَي المعادلة. فيبقى الطرف الأيمن للمعادلة هو اتنين وستين زائد س ناقص اتنين وستين، واللي هيساوي س. وأمّا الطرف الأيسر فهنحسب مية أربعة وتلاتين ناقص اتنين وستين، واللي هتساوي اتنين وسبعين. وبالتالي هتبقى قيمة س هي اتنين وسبعين. وده كده أول قيمة مجهولة في مجموعة البيانات.

بعد كده عايزين نوجد قيمة ص. فهنلاحظ إن معطى عندنا في السؤال إن المدى لمجموعة البيانات الموضحة، هو أربعة وأربعين. وخلينا نفتكر إن المدى لمجموعة من البيانات، هو الفرق بين أكبر قيم المجموعة وأصغرها. وبما إن البيانات عندنا مرتّبة ترتيبًا تصاعديًّا، فمعنى كده إن أكبر قيمة هي ص، وأصغر قيمة هي تلاتة وأربعين. فبالتالي هيبقى الفرق بينهم هو ص ناقص تلاتة وأربعين. فيبقى ص ناقص تلاتة وأربعين، اللي هو المدى، بيساوي أربعة وأربعين.

بعد كده علشان نوجد قيمة ص، يبقى هنجمع تلاتة وأربعين على طرفَي المعادلة. فبالتالي هيبقى الطرف الأيمن ص ناقص تلاتة وأربعين زائد تلاتة وأربعين، واللي هتساوي ص. وأمّا الطرف الأيسر للمعادلة، فهنجمع أربعة وأربعين زائد تلاتة وأربعين، واللي هتساوي سبعة وتمانين. وبالتالي هتبقى قيمة ص هي سبعة وتمانين. فمعنى كده إن القيمتين المجهولتين في مجموعة البيانات اللي عندنا، هيبقوا: اتنين وسبعين، وسبعة وتمانين.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.