فيديو: طرح الأعداد العشرية

سوزان فائق

يوضح الفيديو كيفية طرح الأعداد العشرية باستخدام طريقتين (النماذج وترتيب العلامات العشرية تحت بعضها).

٠٧:٤٤

‏نسخة الفيديو النصية

هنتكلّم في الفيديو ده عن طرح الأعداد العشرية. هنتكلّم عن طريقتين: طريقة استخدام النماذج، وطريقة ترتيب العلامات العشرية تحت بعضها. الأعداد العشرية بيبقى فيها رقم في خانة الآحاد. وبعدين علامة عشرية. ورقم في خانة الجزء من العشرة، والجزء من مائة. ولو فيه بعد كده، بيبقى الجزء من الألف، على حسب العدد.

مواقف كتير في حياتنا بنقابلها، بنحتاج إن إحنا نحسب الفرق بين عددين عشريين. مثلًا كتلة دماغ الشخص البالغ، واحد واتنين وتلاتين من مية كيلوجرام. وكتلة دماغ الطفل حديث الولادة، تسعة وتلاتين من مية كيلوجرام. عايزين نحسب الفرق ما بينهم. فبنطرح واحد واتنين وتلاتين من مية، ناقص تسعة وتلاتين من مية. فيه طريقتين نحسب منهم الفرق. طريقة النماذج، وطريقة ترتيب العلامات العشرية تحت بعضها. هنعرف الأول طريقة استخدام النماذج.

أول حاجة، هنرسم نموذج يمثّل العدد واحد واتنين وتلاتين من مية، على شبكة أجزاء المائة. الواحد واتنين وتلاتين من مائة، بتبقى فيها شبكة كاملة هنا نلوّنها. مية مربع. وبعدين ناخذ من هنا اتنين وتلاتين مربع. هنطرح تسعة وتلاتين من مية. يعني هنعمل هنا علامات، بعدد تسعة وتلاتين، إن إحنا نحذفهم من العدد واحد واتنين وتلاتين من مية. دول كان عددهم اتنين وتلاتين، حذفناهم. باقي كمان سبعة، هنحذفهم من العدد الصحيح.

هنعدّ الباقي من عندنا، اللي هم دول. هنلاقي عددهم تلاتة وتسعين. وإحنا بنكتب على شبكة من المائة، يبقى هيساوي تلاتة وتسعين من مائة. ليه كنا اخترنا الشبكة أجزاء المائة؟ لأن هنا العدد ده، فيه تسعة وتلاتين من مية. والتاني فيه اتنين وتلاتين من مية. فبالتالي بناخد شبكة أجزاء المائة. يبقى ناتج الطرح هيساوي تلاتة وتسعين من مائة.

هنتكلّم على الطريقة التانية، في طرح الأعداد العشرية. اللي هي طريقة استخدام ترتيب العلامات العشرية تحت بعضها. هنرتّب الأعداد، بحيث إن واحد واتنين وتلاتين من مية، يبقى تحتها التسعة وتلاتين من مية. العلامة العشرية تحت العلامة العشرية. وجزء من المائة تحت الجزء من المائة، اللي هو هنا التلاتة. وبعدين التسعة. وهنا فيه صفر في خانة الآحاد. وبعدين هنطرحهم من بعض.

هنطرح اتنين ناقص تسعة، مش هينفع. يبقى لازم هناخد واحد من خانة العشرات، اللي هي التلاتة. يبقى بقت اتناشر. والتلاتة بقت اتنين. يبقى اتناشر ناقص التسعة، هتبقى تلاتة. وبعد كده اتنين ناقص التلاتة، كمان لازم ناخد من الواحد اللي في خانة الآحاد، اللي بعدها. هتبقى دي اتناشر، ودي هتبقى صفر. يبقى الاتناشر ناقص التلاتة، تبقى تسعة. وبعدين نحطّ العلامة العشرية. ودي بقت صفر ناقص الصفر، يبقى صفر. يبقى ناتج الطرح هو ده.

ناخد مثال كمان. احسب أربعة وعشرين وستة من عشرة، ناقص سبعتاشر وخمسة من عشرة. هنرتّب العددين بحيث إن العلامات العشرية تحت بعضها. يبقى أربعة وعشرين وستة من عشرة. العدد التاني هيبقى سبعتاشر وخمسة من عشرة. وبعدين نطرحهم. الستة ناقص الخمسة، بواحد. وبعد كده نحطّ العلامة العشرية. الأربعة ناقص السبعة، صغيرة عنها. يبقى هناخد واحد من الاتنين، تبقى واحد، ودي هتبقى أربعتاشر. يبقى أربعتاشر ناقص السبعة، يبقى سبعة. وبعد كده الواحد ناقص الواحد، بصفر. يبقى الناتج يساوي سبعة وواحد من عشرة.

عند الغطس، شاهد بعد أخصائيي علم المحيطات حوتًا أحدب، طوله تلتاشر وسبعة من عشرة متر. وحوتًا قاتلًا طوله ستة وخمسة وتمانين من مية متر. كم يزيد طول الحوت الأحدب عن الحوت القاتل؟ يبقى عايزين نحسب الفرق بين طولَي الحوتين. يبقى تلتاشر وسبعة من عشرة، ناقص ستة وخمسة وتمانين من مية؛ هتساوي كام؟

هنرتّبهم، بحيث إن العلامات العشرية تبقى تحت بعضها. هنرتّب العددين، بحيث إن العلامات العشرية تبقى تحت بعضها. يبقى العدد الأولاني تلتاشر وسبعة من عشرة. والتاني ستة وخمسة وتمانين من مية. وهنكمّل في العدد اللي فوق هنا بصفر مالوش قيمة. وبعد كده نطرح العددين. هنطرح الصفر ناقص الخمسة، يبقى الصفر لوحدها ما تنفعش. هناخد قيمة العشرة من اللي قبلها. يعني السبعة تبقى ستة، والصفر تبقى عشرة. يبقى عشرة ناقص الخمسة، تساوي خمسة.

الستة ناقص التمنية، كمان لازم ناخد لها من قيم العشرات، عشان تبقى ستاشر. يبقى دي التلاتة هتبقى اتنين. الستاشر ناقص التمنية، هتبقى تمنية. هننزّل العلامة العشرية معانا. وبعد كده الاتنين ناقص الستة، كمان مش هتنفع. يبقى هنخلّيها اتناشر. والواحد دي هتبقى صفر. يبقى الاتناشر ناقص الستة، تساوي ستة. وبعد كده هنا فيه صفر. يبقى التلتاشر وسبعة من عشرة، ناقص الستة وخمسة وتمانين من مية، هتساوي ستة وخمسة وتمانين من مية. يبقى يزيد طول الحوت الأحدب عن الحوت القاتل، بمقدار ستة وخمسة وتمانين من مية متر.

اتكلمنا في الفيديو ده عن طرح الأعداد العشرية. وعرفنا طريقتين. طريقة استخدام النماذج. وطريقة ترتيب العلامات العشرية تحت بعضها. وكمان اتكلمنا على تطبيقات عملية من حياتنا.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.