تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: قياس الزوايا

سوزان فائق

يوضح الفيديو مفهوم الزوايا، وكيفية قياس الزوايا باستخدام المنقلة، وأنواع الزوايا.

٠٥:٢٤

‏نسخة الفيديو النصية

في الفيديو ده هنتكلّم على قياس الزوايا. هنعرف يعني إيه زوايا، وإزّاي هنقيسها باستخدام المنقلة، وهنعرف إيه هي أنواع الزوايا.

في القطاعات الدائرية، اللي زيّ اللي قدّامنا اللي فيها الألوان دي، بنستخدم النسب لتقطيع القطاع الدائري لأجزاء. كل جزء بيبقى يمثّل نسبة معينة علشان توضّح لنا معلومات معينة.

هنا لو عندنا عدد السكان في المحافظات المختلفة بجمهورية مصر العربية مثّلناهم بقطاع دائري زيّ ما إحنا شايفين كده. وكان خمسين في المية من السكان في القاهرة، كانوا هيتمثّلوا باللون الأصفر ده. واحد وعشرين ونُصّ من السكان في الإسكندرية، بيمثّل اللي هو الجزء الأحمر ده. ستاشر في المية في منطقة الدلتا، اللي هو اللون الأزرق. واتناشر ونُصّ لباقي سكان جمهورية مصر العربية، هنمثّلهم باللون الرمادي.

لمّا هنقسّم القطاع الدائري ده لأجزاء فبنعمله قطاعات، القطاعات دي بتبقى متقاسة بزاوية، الزاوية دي نسبة في القطاع الدائري. ده هيوصّلنا يعني إيه زاوية.

الزاوية لها ضلعان يشتركان في نهايتهما، ويكوّنان رأس الزاوية. يعني لو عندنا ضلعين كده مشتركين في نهايتهم، النقطة دي، اللي هي نهايتهم، بتمثّل لي رأس الزاوية. كل جزء من القطاع الدائري بيوضّح زاوية، يعني زيّ ما قلنا ده ضلع، وده ضلع؛ مشتركين في نهايتهم بيكوّنوا زاوية.

الدرجات هي وحدة القياس الشائعة لقياس الزوايا، وبيتمّ تسمية الزاوية باسم رأسها. يعني لو نقطة، اللي هي المشتركة ما بين الضلعين دي، سمّيناها ب؛ يبقى الزاوية دي هتبقى اسمها الزاوية ب. وبنرمز بالعلامة دي للزاوية.

يمكن تقسيم أيّ دايرة إلى تلتمية وستين جزء متساوي، كل جزء بيكوّن زاوية قياسها واحد درجة. يعني لو الدايرة اللي قدّامنا دي؛ نقدر نقسّمها لتلتمية وستين جزء متساوي، وكل جزء فيه زاوية واحد درجة.

في الفيديو بتاعنا عايزين نعرف إزّاي هنقيس الزوايا، هنقيس الزوايا باستخدام المنقلة.

يتمّ قياس الزاوية باستخدام المنقلة زيّ اللي قدّامنا دي. خطوات قياس الزاوية باستخدام المنقلة بيكون عن طريق إن إحنا نطابق مركز المنقلة، اللي هو النقطة دي، على رأس الزاوية. يعني لو عندنا الزاوية بالشكل ده، هنُقَف عند المركز كده، ونحطّه عند رأس الزاوية.

مطابقة أحد أضلاع الزاوية على خط زاوية المنقلة، اللي هو بيساوي صفر، اللي هو اللي قدامنا ده. والضلع التاني بيمثّل قياس الزاوية اللي هي القيمة اللي موجودة على المنقلة. يعني قدّامنا هنا كده، اللي هي القيمة دي، الضلع التاني ده بيطابق عند الزاوية أربعة وتلاتين درجة.

يبقى الخطوات: مطابقة مركز المنقلة على رأس الزاوية. وبعدين مطابقة أحد أضلاع الزاوية على خط زاوية المنقلة اللي بيساوي صفر. وبعد كده نوجد قيمة الزاوية عن طريق الضلع التاني للزاوية من على المنقلة. طب إيه هي أنواع الزوايا؟ عندنا أربع أنواع للزوايا.

أنواع الزوايا هي: الزاوية الحادّة؛ بتبقى أقل من تسعين درجة، وده الشكل بتاعها. الزوايا القائمة؛ بتبقى تساوي تسعين درجة، وده بيبقى الشكل بتاعها. والزوايا المنفرجة؛ بتبقى أكبر من تسعين درجة، وأقل من مية وتمانين درجة، وده بيبقى الشكل بتاعها. والزوايا المستقيمة اللي بتساوي مية وتمانين درجة، ده بيبقى الشكل بتاعها. ناخد مثال.

صنّف الزوايا التالية:

الزاوية الأولانية اللي قدّامنا دي شكلها أكبر من تسعين درجة، وفي نفس الوقت مش زاوية مستقيمة. يبقى هنقول عليها زاوية منفرجة؛ لأنها شكلها أكبر من التسعين درجة، وأقل من مية وتمانين درجة، فهنقول عليها زاوية منفرجة.

الزاوية التانية واضح إن هم مستقيمين متعامدين على بعض، يعني الزاوية ما بينهم هتبقى تسعين درجة. يبقى اسمها: زاوية قائمة، اللي هي بتساوي تسعين درجة.

يبقى اتكلّمنا في الفيديو ده يعني إيه زاوية، إزّاي هنقيس الزاوية باستخدام المنقلة، وإيه هي أنواع الزوايا.