فيديو: قسمة الأعداد الكسرية

سوزان فائق

يوضح الفيديو كيفية قسمة الأعداد الكسرية.

٠٥:٤٣

‏نسخة الفيديو النصية

في الفيديو ده هنتكلّم على قسمة الأعداد الكسرية.

عملية قسمة الأعداد الكسرية بتشبه قسمة الكسور العادية. لكن لقسمة الأعداد الكسرية بنكتب العدد الكسري في صورة كسر مركّب. وبعد كده نعمل العملية القسمة العادية خالص زيّها زيّ أيّ كسر عادي؛ اللي هنشوفه في المثال ده.

المثال بيقول اوجد ناتج تمنية وأربع أخماس، على تلاتة وخُمس.

أول خطوة عندنا في الحل إن إحنا نحوّل الأعداد الكسرية إلى كسور مركّبة. يعني التمنية والأربع أخماس هتبقى أربعة وأربعين على خمسة. والتلاتة وخُمس هتبقى ستاشر على خمسة.

تاني خطوة في الحل إن إحنا نعمل قسمة زيّ الكسور العادية خالص، اللي هي إزاي؟ إن إحنا نجيب مقلوب الستاشر على خمسة، ونضربه في الأربعة وأربعين على خمسة. يعني أربعة وأربعين على خمسة في مقلوب الستاشر على خمسة اللي هو الخمسة على ستاشر.

ونقوم بالاختصارات اللي نقدر عليها. اللي هي الخمسة هنختصرها مع الخمسة هيبقى واحد. والأربعة وأربعين مع الستاشر العامل المشترك ما بينهم اللي هو الأربعة. يبقى هنقسم ستاشر هتبقى أربعة، والأربعة وأربعين هتبقى حداشر.

يبقى ناتج القسمة اللي حوّلناها إلى ضرب هيبقى حداشر على أربعة. بنضرب البسط في البسط، والمقام في المقام. علشان نبسّط الحداشر عَ الأربعة هنخلّيها اتنين وتلات أرباع. ناخد مثال كمان.

المثال بيقول اوجد ناتج خمسة ونُصّ على اتنين ونُصّ.

أول خطوة عندنا هنحوّل لكسور مرتبة. الخمسة ونُصّ هنحوّلها لكسر مركّب، هيبقى حداشر على اتنين على … الاتنين ونُصّ هنحوّلها لكسر مركّب هتبقى خمسة على اتنين.

بعد كده هنحوّل عملية القسمة إلى عملية ضرب بإن إحنا هنجيب المقلوب، ونضربه في حداشر على اتنين. يبقى الحداشر على الاتنين في مقلوب الخمسة عَ الاتنين اللي هي اتنين على خمسة. ولو فيه أيّ اختصارات بنعملها. هنا هنختصر الاتنين مع الاتنين هتبقى واحد.

هنضرب البسط حداشر في واحد، والمقام واحد في خمسة. هيبقى الناتج عندنا حداشر على خمسة اللي هو يساوي اتنين وخُمس. نقلب الصفحة، وناخد مثال إزاي نحسب قيم العبارات.

إذا كانت م واحد وتلات أرباع، وَ ن تساوي خُمسين. اوجد قيمة م على ن.

م على ن؛ هنعوّض بقيمة كل واحدة فيهم. الـ م هتبقى واحد وتلات أرباع على … الـ ن قيمتها هتبقى اتنين على خمسة. أول خطوة عندنا هنجيب الكسور المركّبة. الواحد وتلات أرباع لمّا هنجيب لها الكسر المركّب هيبقى سبعة عَ الأربعة. على … الاتنين على خمسة زيّ ما هي؛ لأنها مش عدد كسري.

تاني خطوة في الحل إن إحنا هنعمل قسمة للكسور. يبقى سبعة عَ الأربعة، على اتنين على خمسة. هنحوّل عملية القسمة إلى ضرب بإن إحنا ناخد مقلوب الاتنين على خمسة.

يبقى سبعة عَ الأربعة، في خمسة على الاتنين هتساوي … المفروض نضرب البسط في البسط، والمقام في المقام. وقبل ما نضرب نشوف لو فيه عوامل مشتركة. ما فيش عوامل مشتركة يبقى هنضرب البسط في البسط، والمقام في المقام. يبقى خمسة وتلاتين على تمنية. هنبسّطها هتبقى أربعة وتلاتة على تمنية. نقلب الصفحة، وناخد مثال كمان.

المثال بيقول إذا كان متوسط كتلة ذكر الباندا العملاق مية وخمسين كيلوجرام، وتمثّل واحد وخُمس مرة من متوسط كتلة أنثاه تقريبًا. فاوجد متوسط كتلة أنثاه.

هنجيب المية وخمسين هنقسمها على الواحد وخُمس؛ علشان نعرف متوسط كتلة أنثاه. يبقى مية وخمسين على الواحد وخُمس اللي هو العدد الكسري. أول خطوة عندنا إن إحنا هنجيب الكسر المركّب بتاع الواحد وخُمس. يبقى مية وخمسين على، ستة على خمسة. تاني خطوة عندنا مية وخمسين … على هنحوّلها لضرب، ونضرب في مقلوب الستة على خمسة اللي هو خمسة على ستة. ولو فيه اختصارات هنختصرها.

الستة هنختصرها مع المية وخمسين؛ ستة على ستة فيها واحد، المية وخمسين على ستة هتبقى خمسة وعشرين. ونضرب الخمسة وعشرين في خمسة هيطلع مية خمسة وعشرين كيلوجرام. يبقى متوسط كتلة أنثى الباندا يساوي مية خمسة وعشرين كيلوجرام تقريبًا.

يبقى اتكلّمنا في الفيديو ده عن قسمة الأعداد الكسرية. أول خطوة عندنا إن إحنا هنحوّل العدد الكسري إلى كسر مركّب. وبعد كده بنقوم بعمليه القسمة العادية؛ بإن إحنا نجيب مقلوب الكسر، ونضربه في الكسر الأولاني. وبعدين نضرب البسط في البسط، والمقام في المقام. ويبقى كده حوّلنا عملية القسمة إلى عملية ضرب سهلة جدًّا. وبعد كده نبسّط الكسر اللي هيطلع لنا.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.