فيديو: حل المسائل الكلامية التي تتضمَّن طرح أعداد مكوَّنة من ثلاثة أرقام

غادة عليوة

مع طالب ٨٥٣ جنيهًا. اشترى درَّاجة بمبلغ ٥٨٧ جنيهًا. ما المبلغ المتبقي معه؟

٠٢:٠٧

‏نسخة الفيديو النصية

مع طالب تمنمية تلاتة وخمسين جنيهًا. اشترى درَّاجة بمبلغ خمسمية سبعة وتمانين جنيهًا. ما المبلغ المتبقي معه؟

يبقى زي ما شايفين عندنا في السؤال. كان فيه طالب كان معاه مبلغ تمنمية تلاتة وخمسين جنيهًا. اشترى من المبلغ ده دراجة كان سعرها خمسمية سبعة وتمانين جنيهًا. والمطلوب مننا نعرف المبلغ المتبقي معه.

يبقى كده لو طرحنا سعر الدراجة من المبلغ الكلي اللي كان معاه، هنقدر نوصل للمبلغ اللي باقي. هنبتدي دلوقتي نطرح سعر الدراجة من المبلغ الكلي اللي كان معاه. هنبتدي نطرح من خانة الآحاد. سبعة ناقص تلاتة [تلاتة ناقص سبعة] مش هينفع نطرح سبعة من تلاتة، عشان السبعة أكبر. فهروح للخانة المكانية اللي قبلها اللي هي خانة العشرات فيها الرقم خمسة. هناخد من الرقم خمسة ده واحد، فيصبح الخانة دي فيها الرقم أربعة. والواحد اللي أخدناه من خانة العشرات هيمثِّل عشرة في خانة الآحاد، فيبقى خانة الآحاد دلوقتي هيبقى فيها تلتاشر.

دلوقتي نقدر نطرح تلتاشر ناقص سبعة، يبقى الناتج ستة. نبتدي نطرح الأرقام اللي في خانة العشرات. عايزين نطرح أربعة ناقص تمنية. مش هينفع برضو نطرح التمنية من الأربعة عشان التمنية أكبر. بنفس الطريقة هنروح للخانة المكانية اللي قبلها اللي هي خانة المئات. هنلاقي فيها الرقم تمنية. هناخد واحد من التمنية، هيصبح فيها سبعة. والواحد اللي هناخده من خانة المئات هيبقى عبارة عن عشرة في خانة العشرات. فكده خانة العشرات هيبقى فيها أربعتاشر.

دلوقتي نقدر نطرح اللي في خانة العشرات هيصبح أربعتاشر ناقص تمنية. يبقى ناتج الطرح ستة. وبعدين نطرح الأرقام اللي في خانة المئات. سبعة ناقص خمسة هيساوي اتنين. وكده يبقى قدرنا نعرف المبلغ المتبقي معاه، وهو ميتين ستة وستين جنيهًا.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.