فيديو: إيجاد قياس زاوية بمعلومية قياس الزاوية المكمِّلة لها

باستخدام الشكل التالي، أوجد قيمة ق∠ﺏود.

٠٢:٤٨

‏نسخة الفيديو النصية

باستخدام الشكل التالي أوجد قيمة قياس الزاوية ب وَ د. ومعطى عندنا الشكل اللي قدامنا ده، وهنلاحظ من الشكل إن قياس الزاوية ب و ج هو مية واحد وأربعين درجة. والمطلوب إننا نوجد قياس الزاوية ب و د، اللي هي الزاوية دي.

فمن الشكل هنلاحظ إن الزاويتين أ و ب وَ ب و ج همّ الاتنين بيكوّنوا زاوية مستقيمة. والزاوية المستقيمة هي الزاوية اللي قياسها مية وتمانين درجة. فمعنى كده إن الزاويتين أ و ب وَ ب و ج زاويتان متكاملتان. والزاويتين المتكاملتين هُمَا الزاويتين اللي مجموع قياسهم مية وتمانين درجة. فمعنى كده إن هيبقى قياس الزاوية أ و ب زائد قياس الزاوية ب و ج بيساوي مية وتمانين درجة. وبما إن مُعطى عندنا في الشكل إن قياس الزاوية ب و ج هو مية واحد وأربعين درجة. فبالتالي هيبقى قياس الزاوية أ و ب بيساوي مية وتمانين درجة ناقص مية واحد وأربعين درجة. فلمّا هنحسبها هتبقى بتساوي تسعة وتلاتين درجة. وبالتالي هيبقى قياس الزاوية أ و ب هو تسعة وتلاتين درجة.

ومن الشكل هنلاحظ إن قياس الزاوية أ و ب بيساوي قياس الزاوية أ و د. وبما إننا أوجدنا إن قياس الزاوية أ و ب بيساوي تسعة وتلاتين درجة. فبالتالي هيبقى قياس الزاوية أ و د بيساوي تسعة وتلاتين درجة.

بعد كده اللي مطلوب عندنا في السؤال إننا نوجد قياس الزاوية ب و د، اللي هي الزاوية دي. فمن الشكل هنلاحظ إن قياس الزاوية ب و د بيساوي مجموع قياسات الزاويتين دول؛ لأن الزاويتين دول همّا اللي بيكوّنوا الزاوية ب و د. إذن هيبقى قياس الزاوية ب و د بيساوي قياس الزاوية أ و ب زائد قياس الزاوية أ و د.

وبما إننا أوجدنا إن قياس كل زاوية فيهم هو تسعة وتلاتين درجة. فبالتالي هيبقى قياس الزاوية ب و د بيساوي تسعة وتلاتين درجة زائد تسعة وتلاتين درجة. فلمّا نحسبها هيبقى المجموع هو تمنية وسبعين درجة. وبالتالي هيبقى قياس الزاوية ب و د يساوي تمنية وسبعين درجة. وهتبقى هي دي إجابة السؤال.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.