تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: القوى والأسس

معاذ صالح

يوضح الفيديو كيفية التعبير عن الضرب المتكرر لنفس العامل، وما الأساس والأس والقوة، وما تربيع العدد وما تكعيبه.

٠٢:٤٧

‏نسخة الفيديو النصية

القوى والأُسُس.

في الفيديو ده هنعرف إيه هي الأُسُس، ويعنى إيه أساس وقوة. وإزاي بنعبّر باستخدامهم عن العمليات.

لمّا بنحتاج نضرب عددين أو أكتر، وبينتج عنهم ناتج. بيبقى كل عدد منهم هو عامل للناتج. ولمّا بنضرب نفس العدد في نفسه أكتر من مرة، ممكن يبقى فيه صورة أسهل للتعبير.

فمثلًا في حالة تكرار الجمع لنفس العدد. يعني لو هنجمع اتنين زائد اتنين زائد اتنين زائد اتنين. فممكن نجمعهم، والمجموع هيساوي تمنية. أو ممكن نبسّط شكل السؤال، فهنعبر عنه باستخدام عملية الضرب. فهنقول إنه برضو ممكن يساوي اتنين اللي هو العدد اللي اتكرر، في أربعة اللي هو عدد مرات التكرار.

فبالشكل ده عبّرنا عن نفس السؤال بصورة أبسط بكتير. ده في حالة تكرار الجمع. طيب في حالة تكرار الضرب. بنعبر عن عملية الضرب المتكررة، وفي حالتنا دي هو اتنين واتكرر أربع مرات، بالصورة اتنين أُس أربعة. حيث اتنين هو العامل اللي اتعرّض للضرب أكتر من مرة، وأربعة هو عدد مرات تكراره. وبنسمي العدد اتنين أو العامل المتكرر الأساس. وبنسمي العدد أربعة أو عدد مرات تكراره الأُس. وبنسمي العدد الموجود في الأُس اللي هو في الحالة دي أربعة القوة.

يعني مثلًا بنقول على اتنين أُس أربعة: القوة الرابعة للعدد اتنين. وبنقول على اتنين أُس تلاتة: القوة التالتة للعدد اتنين. وبنقول عن اتنين أُس اتنين: القوة التانية للعدد اتنين. القوة التالتة للعدد اتنين برضو ممكن نقول عليها اتنين تكعيب. والقوة التانية للعدد اتنين ممكن نقول عليها اتنين تربيع.

يبقى في الفيديو ده عرفنا إزاي بنعبّر عن عمليات الضرب المتكررة لنفس العامل اللي هو الأساس، وإن عدد مرات التكرار بتساوي الأُس المكتوب على العدد، وبتعبّر عن قوة العدد. وعرفنا إن القوة التانية للعدد بنسميها تربيع، والقوة التالتة للعدد بنسميها تكعيب.