نسخة الفيديو النصية
أوجد حجم المكعب الذي محيط أوجهه المربعة يساوي ستة وتلاتين سنتيمتر.
وخلّينا في الأول نفتكر إن المكعب بيبقى ليه ستة أوجُه. وبتبقى جميع الأوجُه مربعة، يعني على شكل مربع. وبما إن معطى عندنا في السؤال إن محيط أوجُه المكعب المربعة يساوي ستة وتلاتين سنتيمتر. فمعنى كده إن هيبقى عندنا طول حرف المكعب بيساوي المحيط مقسوم على أربعة. لأن محيط الوجه الواحد يعني محيط المربع، واللي بيساوي أربعة في طول الضلع، أو أربعة في طول الحرف.
فبالتالي هيبقى طول حرف المكعّب بيساوي المحيط، اللي هو ستة وتلاتين، مقسوم على أربعة. فلمّا نحسبها هتبقى بتساوي تسعة. وأمَّا الوحدة، فهتبقى سنتيمتر. فبالتالي هيبقى طول حرف المكعب بيساوي تسعة سنتيمتر.
بعد كده المطلوب في السؤال إننا نوجد حجم المكعب. وخلّينا نفتكر إن حجم المكعب بيساوي طول الحرف، في طول الحرف، في طول الحرف. وبما إننا أوجدنا طول حرف المكعب بتسعة سنتيمتر. فبالتالي هيبقى حجم المكعب بيساوي تسعة سنتيمتر، في تسعة سنتيمتر، في تسعة سنتيمتر. ولمّا نحسبها هتبقى بتساوي سبعمية تسعة وعشرين. وأمَّا الوحدة فهتبقى سنتيمتر مكعب؛ لأننا بنوجد حجم.
وبالتالي هتبقى إجابة السؤال هي: سبعمية تسعة وعشرين سنتيمتر مكعب.
