تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: وصف الأشكال الثلاثية الأبعاد

سوزان فائق

يوضح الفيديو مفهوم الأشكال الثلاثية الأبعاد، ومفهوم الوجه والحرف والرأس، وكيفية وصف الأشكال الثلاثية الأبعاد.

٠٦:٣٩

‏نسخة الفيديو النصية

في الفيديو ده، هنتكلّم عن وصف الأشكال الثلاثية الأبعاد. وهنوصف الأشكال الثلاثية الأبعاد حسب عدد أوجهها، وعدد أحرفها، وعدد رؤوسها.

الأشكال الثلاثية الأبعاد هي أشكال لها طول وعرض وارتفاع. وبنقول عليها كمان: المجسَّمات. يعني مثلًا الشكل اللي قدامنا ده مكعَّب. وهو شكل ثلاثي الأبعاد؛ له طول، وعرض، وارتفاع. عايزين نعرف في الفيديو ده إزّاي هنوصف الأشكال الثلاثية الأبعاد.

فهنعرف الأول إيه هو الوجه، والحرف، والرأس. الوجه هو سطح مستوي. يعني الشكل اللي قدامنا ده متوازي مستطيلات. ده اسمه وجه؛ عبارة عن سطح مستوي. ولو عدِّينا عدد الأسطح المستوية في متوازي المستطيلات، هنلاقي عددهم ستة. لكن الحرف هو تقاطع وجهين. يعني لو عندنا ده كمان وجه، يبقى تقاطع الوجهين هو الخطّ ده. ولو عدّينا عدد الأحرف، آدي واحد، اتنين، تلاتة، أربعة، خمسة، ستة، سبعة، وتمنية ورا كده، وتسعة، وعشرة، وحداشر، واتناشر. يبقى عدد الأحرف في متوازي المستطيلات هتبقى اتناشر حرف.

الرأس هي نقطة الْتِقاء تلات أحرف أو أكتر. يعني الحرف، اللي هو رقم اتنين مع رقم تلاتة مع رقم ستة، بيلتقوا في نقطة هنا دي، بنسمّيها رأس. هنعدّ عدد الرؤوس، يبقى آدي واحد، اتنين، تلاتة، أربعة، خمسة، ستة، سبعة، تمنية. كده متوازي المستطيلات يحتوي تمن رؤوس. يبقى كده متوازي المستطيلات: ستة أوجُه، اتناشر حرف، تمن رؤوس، زيّ المكعَّب بالظبط. وكمان المكعَّب زيّ متوازي المستطيلات؛ بيحتوي ستة أوجُه، واتناشر حرف، وتمن رؤوس.

هنوصف كل شكل من الأشكال اللي قدامنا دي. متوازي المستطيلات له كام وجه. وله كام حرف. وله كام رأس. عدد الأوجه في متوازي المستطيلات، اللي هو عدد الأسطح المستوية، هيبقى ستة. وعدد الأحرف هيبقى اتناشر. وعدد الرؤوس هيبقى تمنية. وبالظبط زيّ المكعب؛ ستة أوجُه، اتناشر حرف، تمن رؤوس.

هنوصف الشكلين اللي قدامنا دول؛ الكرة والمخروط. الكرة عدد الأوجُه … لا يوجد فيها أسطح مستوية، يبقى معنى كده إن عدد الأوجُه صفر. وعلشان ما فيش أوجُه، يبقى ما فيش أحرف؛ لأن الأحرف هي تقاطع الأوجُه. يبقى كمان الأحرف صفر. وعدد الرؤوس كمان صفر؛ لأن ما فيش أحرف بتتقاطع علشان تكوّن الرؤوس. المخروط، عدد الأوجُه هو وجه واحد بس، اللي هو ده، على شكل دايرة. يبقى عدد الأوجُه واحد، وما فيش أحرف؛ لأن ما فيش تقاطع للأسطح المستوية. يبقى عدد الأحرف صفر. عدد الرؤوس هو رأس واحد بس، اللي هو ده. يبقى عدد رؤوس المخروط واحد.

هنوصف كمان شكلين، اللي همّ الهرم والأسطوانة. الهرم، لمّا هنعدّ عدد الأوجُه، هنلاقي هنا فيه وجه على شكل مثلث. وكمان وجه تاني. وفيه كمان واحد ورا هنا. وواحد ورا هنا. يبقى أربع أوجُه على شكل مثلث. وكمان فيه وجه، اللي هو القاعدة دي، على شكل مربع. يبقى عدد الأوجُه في الهرم خمسة. عدد الأحرف، لمّا هنعدّ تقاطع الأوجُه يبقى آدي واحد، اتنين، تلاتة، أربعة، خمسة، ستة، سبعة، وفيه واحد ورا يبقى تمنية. هنشوف عدد الرؤوس، هنلاقي واحد، اتنين، تلاتة، أربعة، خمسة. يبقى عدد الرؤوس خمسة.

نتكلّم على الأسطوانة. عدد الأوجه، اللي هو الأسطح المستوية، هيبقى … آدي واحد، اتنين. يبقى عدد الأوجُه اتنين. ما فيش تَلاقِي للأوجه، يبقى عدد الأحرف صفر. وكمان عدد الرؤوس صفر؛ لأن ما فيش أحرف بتتقاطع مع بعض.

هنشوف مثال من حياتنا العملية. إزّاي نوصف كلّ مجسّم مستخدمين عدد الأوجُه وعدد الأحرف وعدد الرؤوس.

أول حاجة علبة المربَّى دي على شكل أسطوانة. هنعدّ عدد الأوجُه. هنا سطح مستوي، وكمان فيه سطح مستوي، يبقى وجهين. يبقى الأسطوانة لها وجهين دائريين، ولا يوجد أحرف أو رؤوس. هنشوف تاني شكل. دي كرة. دي برتقالة على شكل كرة. يبقى مجسَّم ليس له أوجُه أو أحرف أو رؤوس. هنشوف تالت شكل، اللي هو علبة الكبريت. على شكل متوازي مستطيلات. يبقى مجسَّم له ستة أوجُه على شكل مستطيلات، واتناشر حرف، وتمن رؤوس.

اتكلّمنا في الفيديو ده … الأشكال الثلاثية الأبعاد؛ إيه مفهومها، ويعني إيه وجه، ويعني إيه حرف، ويعني إيه رأس. وإزّاي بنوصف الشكل الثلاثي الأبعاد على حسب عدد الأوجُه، وشكلها، والأحرف، والرؤوس.