تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: التقريب إلى أقرب عشرة وإلى أقرب مائة

نهال عصمت

يتناول الفيديو كيفية تقريب الأعداد إلى أقرب عشرة، وإلى أقرب مائة، ويوضِّح ذلك بالأمثلة.

٠٧:٣٦

‏نسخة الفيديو النصية

التقريب إلى أقرب عشرة وإلى أقرب مائة.

هنتعلّم إزاي نقرّب الأعداد إلى أقرب عشرة وإلى أقرب مائة. طب التقريب هيفيدنا في إيه؟ يُستخدم التقريب لتحويل الأعداد إلى أعداد يسهل التعامل معها.

في البداية، هنبدأ نتعلّم إزاي نقرّب الأعداد إلى أقرب عشرة. هنبدأ نشوف مثال، ونفهم عليه إزاي نقدر نقرّب إلى أقرب عشرة.

تستخدم مريم الحاسوب اتنين وستين دقيقة يوميًّا. أمّا أخوها يوسف، يستخدم الحاسوب مية وستاشر دقيقة يوميًّا. أول مطلوب: كم دقيقة تقريبًا استخدمت مريم الحاسوب؟

عندنا مريم تستخدم الحاسوب اتنين وستين دقيقة يوميًّا. أول حاجة، هنلاقي إن أقرب عشرة أقل من اتنين وستين هي ستين. وهنلاقي كمان إن أقرب عشرة أكبر من اتنين وستين هي سبعين. هنبدأ نستخدم خطّ الأعداد، وهنكتب عليه الأعداد من ستين إلى سبعين بالشكل ده.

بعد ما رسمنا خطّ الأعداد وكتبنا عليه الأعداد من ستين لسبعين، هنبدأ نحدّد العدد اتنين وستين. هنلاحظ إن اتنين وستين أقرب إلى ستين من العدد سبعين. وبالتالي نقدر نقول: إن إحنا ممكن نقرّب العدد اتنين وستين إلى العدد الأقرب منه، وهو ستين. وبالتالي نقدر نقول: إن استخدمت مريم الحاسوب ستين دقيقة. يبقى كده عرفنا نحسب كم دقيقة تقريبًا استخدمت مريم الحاسوب.

هنبدأ نجيب صفحة جديدة، ونشوف تاني مطلوب. وهو كم دقيقة تقريبًا استخدم يوسف الحاسوب؟

يوسف استخدام الحاسوب مية وستاشر دقيقة تقريبًا. وبالتالي نقدر نقول: إن أقرب عشرة أقل من مية وستاشر هي مية وعشرة. لكن أقرب عشرة أكبر من مية وستاشر هي مية وعشرين. وبالتالي هنرسم خطّ الأعداد من مية وعشرة لحدّ مية وعشرين بالشكل الآتي.

بعد كده هنبدأ نحدّد العدد مية وستاشر على خطّ الأعداد. هنلاحظ إن العدد مية وستاشر أقرب إلى مية وعشرين عن مية وعشرة. وبالتالي نقدر نقول: إن إحنا ممكن نقرّب العدد مية وستاشر إلى مية وعشرين. وبالتالي نقدر نقول: استخدم يوسف الحاسوب مية وعشرين دقيقة تقريبًا.

يبقى كده اتعلّمنا إزاي نقرّب الأعداد إلى أقرب عشرة. بعد كده هنتكلّم إزاي نقرّب الأعداد إلى أقرب مائة. هنبدأ نجيب صفحة جديدة، ونشوف أمثلة توضّح أكتر.

قرأ ماجد كتابًا فيه ميتين سبعة وستين صفحة. ما عدد الصفحات التي قرأها مقرّبًا إلى أقرب مائة؟

عندنا ماجد قرأ كتابًا فيه ميتين سبعة وستين صفحة. هنلاحظ إن أقرب مائة أقل من ميتين سبعة وستين هي ميتين. لكن أقرب مائة أكبر من ميتين سبعة وستين هي تلتمية. وبالتالي هنرسم خطّ الأعداد من تلتمية، عفوًا، من ميتين إلى تلتمية.

بعد كده هنبدأ نحدّد العدد ميتين سبعة وستين على خطّ الأعداد. وبالتالي هيبقى في المكان ده. هنلاحظ إن ميتين سبعة وستين أقرب إلى تلتمية عن الميتين. وبالتالي نقدر نقول: إن ممكن نقرّب العدد ميتين سبعة وستين إلى تلتمية. معنى كده إن ماجد قرأ تلتمية صفحة تقريبًا، أو إن عدد الصفحات التي قرأها ماجد تلتمية صفحة تقريبًا.

هنبدأ نجيب صفحة جديدة، ونشوف مثال آخر؛ إزاي نقرّب إلى أقرب مائة. جمعت سارة ألف ربعمية تلاتة وعشرين صدفة. كم صدفة جمعت سارة، مقرّبًا إلى أقرب مائة؟

عندنا سارة جمعت ألف ربعمية تلاتة وعشرين صدفة. هنلاحظ إن أقرب مائة أقل من ألف ربعمية تلاتة وعشرين هي ألف وربعمية. ونقدر نقول كمان: إن أقرب مائة أكبر من ألف ربعمية تلاتة وعشرين هي ألف وخمسمية. وبالتالي هنرسم خطّ الأعداد مكتوب عليه الأعداد من ألف وربعمية إلى ألف وخمسمية بالشكل الآتي.

بعد كده هنحدّد العدد ألف ربعمية تلاتة وعشرين على خطّ الأعداد. هيبقى تقريبًا في المكان ده. هنلاحظ إن ألف ربعمية تلاتة وعشرين أقرب إلى ألف وربعمية عن ألف وخمسمية. وبالتالي هنقرّب العدد ألف ربعمية تلاتة وعشرين إلى العدد ألف وربعمية. وبالتالي نقدر نقول: إن جمعت سارة ألف وربعمية صدفة تقريبًا.

يبقى كده اتكلّمنا إزاي نقرّب الأعداد إلى أقرب عشرة وإلى أقرب مائة. وشُفنا أمثلة توضّح ذلك.