فيديو: استخدام معادلات الضرب لمعرفة المعاملات والمضاعفات

نعلم أن ٤ × ٥ = ٢٠. اختر الجملة الصحيحة. [أ] ٢٠ معامل العدد ٤ [ب] ٥ مضاعف العدد ٢٠ [ج] ٢٠ مضاعف العدد ٥ [د] ٢٠ معامل العدد ٥ [ﻫ] ٤ مضاعف العدد ٢٠

٠٢:٥٤

‏نسخة الفيديو النصية

نعلم أن أربعة في خمسة يساوي عشرين. اختر الجملة الصحيحة. واحد: عشرين معامل العدد أربعة. اتنين: خمسة مضاعف العدد عشرين. تلاتة: عشرين مضاعف العدد خمسة. أربعة: عشرين معامل العدد خمسة. خمسة: أربعة مضاعف العدد عشرين.

بصورة عامة لو لقينا إن حاصل ضرب أ في ب بيساوي ﺟ. نقدر نسمّي أ وَ ب معاملان للعدد ﺟ. يعني ﺟ يقبل القسمة على أيّ واحد فيهم. أيّ واحد فيهم بيعتبر معامل لحاصل الضرب، اللي هو ﺟ. أمّا حاصل الضرب ﺟ فبنقدر نعتبره مضاعف لأيٍّ من معاملاته، اللي هم أ وَ ب. يعني ﺟ مضاعف لـ أ، وفي نفس الوقت مضاعف لـ ب.

يبقى لو جينا نشوف حقيقة الضرب اللي عندنا دي. حاصل ضرب أربعة في خمسة بيساوي عشرين. هنقدر نعتبر إن أربعة وخمسة هم الاتنين معاملان لحاصل الضرب، اللي هو عشرين. وفي الوقت نفسه نقدر نعتبر حاصل الضرب اللي هو عشرين ده، مضاعف للأربعة، ومضاعف للخمسة.

دلوقتي هنشوف الاختيارات اللي عندنا، عشان نقدر نحدّد إيه الجملة الصحيحة اللي فيهم. أول جملة عندنا مذكور فيها إن عشرين معامل للعدد أربعة. عشرين ده حاصل الضرب. هل هو معامل للعدد أربعة؟ لأ، هو مضاعف للعدد أربعة. يبقى الجملة دي خاطئة.

الجملة اللي بعد كده بتقول إن العدد خمسة مضاعف للعدد عشرين. هل العدد خمسة مضاعف للعدد عشرين؟ لأ، العدد خمسة ده معامل للعدد عشرين. معامل لحاصل الضرب. فيبقى الجملة التانية دي هي كمان خاطئة.

تالت جملة مذكور فيها إن عشرين مضاعف العدد خمسة. عشرين مضاعف للعدد خمسة. بالفعل الجملة دي صحيحة. عشان حاصل الضرب مضاعف لأَيٍّ من المعاملات بتاعته. يبقى الجملة رقم تلاتة جملة صحيحة.

الجملة اللي بعد كده، عشرين معامل للعدد خمسة. لأ، عشرين مضاعف للعدد خمسة. أمّا خمسة فهي اللي معامل لحاصل الضرب عشرين. فيبقى الجملة أربعة خاطئة.

خامس جملة مذكور فيها إن أربعة مضاعف للعدد عشرين. أربعة ده أحد معاملات حاصل الضرب اللي هو عشرين. يبقى الجملة دي خاطئة.

ويبقى كده الجملة الصحيحة اللي بين الاختيارات اللي قدّامنا هي إن عشرين مضاعف للعدد خمسة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.