فيديو: تحديد زوج من القطع المستقيمة المتساوية في الطول في مثلث باستخدام الزوايا المُقابِلة لها بالرأس

أي قطعتين لهما نفس الطول؟ ‎

٠٢:١٢

‏نسخة الفيديو النصية

أيُّ قطعتين لهما نفس الطول؟

ومعطى عندنا الشكل اللي قدّامنا ده. فهنلاحظ إن معطى عندنا قياس الزاوية أ أربعة وتمانين درجة. ومعطى عندنا قياس الزاوية دي بتمنية وأربعين درجة. فمن الشكل هنلاحظ إن الزاوية دي، والزاوية دي زاويتين متقابلتين بالرأس. وخلّينا نفتكر إن الزاويتين المتقابلتين بالرأس، بيبقى ليهم القياس نفسه. فمعنى كده إن هيبقى عندنا قياس الزاوية أ ج ب، هو تمنية وأربعين درجة.

بعد كده لمّا نيجي نشوف المثلث أ ب ج، فهنلاحظ إننا عندنا قياس زاويتين، وعايزين نوجد قياس الزاوية التالتة. وخلّينا نفتكر إن مجموع قياسات الزوايا الداخلية للمثلث، يساوي مية وتمانين درجة. فبالتالي هيبقى عندنا في المثلث أ ب ج. هيبقى قياس الزاوية ب يساوي مية وتمانين درجة ناقص، قياس الزاوية أ زائد قياس الزاوية أ ج ب.

بعد كده هنعوّض عن قياس الزاوية أ بأربعة وتمانين درجة. وهنعوّض عن قياس الزاوية أ ج ب بتمنية وأربعين درجة. فبالتالي هيبقى قياس الزاوية ب يساوي مية وتمانين درجة ناقص، أربعة وتمانين درجة زائد تمنية وأربعين درجة. فلمّا نحسب قيمة المقدار ده، هيبقى بيساوي تمنية وأربعين درجة. وبالتالي هيبقى قياس الزاوية ب يساوي تمنية وأربعين درجة.

بعد كده امّا نيجي نشوف الشكل اللي عندنا. هنلاحظ إن في المثلث أ ب ج عندنا قياس الزاوية ب بيساوي قياس الزاوية أ ج ب. وبما إن عندنا زاويتين في المثلث ليهم القياس نفسه. فبالتالي هيبقى المثلث أ ب ج مثلث متساوي الساقين. لأن بما إن عندنا زاويتين متساويتين في القياس في المثلث. فمعنى كده إن الضلعين المقابلين للزاويتين هيبقى ليهم الطول نفسه. يعني معنى كده إن هيبقى عندنا أ ب يساوي أ ج. وبالتالي هتبقى إجابة السؤال: «أيّ قطعتين لهما نفس الطول؟» هي القطعة المستقيمة أ ب، والقطعة المستقيمة أ ج.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.